2026 جىلعى 19-21 مامىر ارالىعىندا استانادا مادەنيەت جانە ونەر قىزمەتكەرلەرى كۇنىنە وراي «مادەنيەت جانە يننوۆاتسيا» رەسپۋبليكالىق فورۋمى ۇيىمداستىرىلادى.

ءىس-شاراعا ەلىمىزدىڭ بارلىق وڭىرىنەن مۋزەي، كىتاپحانا، ارحيۆ، مادەنيەت ۇيلەرى مەن وزگە دە سالا ۇيىمداردىڭ وكىلدەرى جينالادى. فورۋمعا سونداي-اق حالىقارالىق جانە قازاقستاندىق ساراپشىلار، بيزنەس قاۋىمداستىق وكىلدەرى، كرەاتيۆتى يندۋستريا جانە تەحنولوگيالىق كومپانيالاردىڭ ماماندارى قاتىسادى.

بيىلعى فورۋمنىڭ باستى ەرەكشەلىگى – ءداستۇرلى وقىتۋ فورماتىنان ناقتى جوبالار ازىرلەۋگە نەگىزدەلگەن تاجىريبەلىك جۇمىسقا باسىمدىق بەرىلۋى. قاتىسۋشىلار مادەنيەت ۇيىمدارىن جاڭعىرتۋعا، اۋديتوريا اياسىن كەڭەيتۋگە، جاڭا تەحنولوگيالاردى ەنگىزۋگە جانە سەرىكتەستىك بايلانىستاردى دامىتۋعا باعىتتالعان باستامالار ازىرلەيدى.

ءۇش كۇندىك فورۋم باعدارلاماسى سالانىڭ وزەكتى ماسەلەلەرىن تالقىلاۋدان باستاپ، ناقتى جوبالاردى ازىرلەپ، ولاردى تانىستىرۋ كەزەڭىنە دەيىنگى كەشەندى جۇمىستى قامتيدى. العاشقى كۇنى سالاداعى ترانسفورماتسيا ۇدەرىستەرى، تسيفرلاندىرۋ، جاساندى ينتەللەكت مۇمكىندىكتەرى جانە اۋديتوريامەن ءوزارا بايلانىس ورناتۋدىڭ جاڭا تاسىلدەرى قاراستىرىلادى. 

ەكىنشى كۇنى قاتىسۋشىلار تاجىريبەلىك فورماتتا جۇمىس ىستەپ، زاماناۋي تسيفرلىق مۇمكىندىكتەردى مەڭگەرىپ، بىرلەسكەن سەسسيالار بارىسىندا مادەنيەت ۇيىمدارىنا ارنالعان جاڭا باستامالاردى پىسىقتايدى. سوڭعى كۇنى كوماندالار ءوز جوبالارىن ساراپشىلار نازارىنا ۇسىنىپ، وڭىرلەردە جۇزەگە اسىرۋعا ۇسىنىلاتىن ۇزدىك شەشىمدەر انىقتالادى.

فورۋم اياسىندا سالاارالىق ارىپتەستىكتى دامىتۋعا، جاڭا سەرىكتەستەردى تارتۋعا جانە وڭىرلەردىڭ قاجەتتىلىگىنە ساي باستامالاردى ىسكە اسىرۋعا ايرىقشا نازار اۋدارىلادى.

Abai.kz