«دۇيسەنبىدە شامامەن 1,5 ميلليون مۇسىلمان مەككەگە قاجىلىق ساپارىن باستادى» دەپ جازادى فرانتسپرەس اگەنتتىگى. الەمنىڭ ءار تۇكپىرىنەن كەلگەن مۇسىلماندار 45 گرادۋس ىستىقتا ۇلكەن مەشىتتىڭ ورتالىعىنداعى قاعبانى اينالىپ وتكەن.

ساۋد ارابياسى بيلىگى قاجىشىلارعا اپتاپ ىستىقتىڭ الدىن الۋ ءۇشىن قولشاتىرلاردى پايدالانۋعا رۇقسات بەرگەن.

بيىلعى قاجىلىق - امەريكا قۇراما شتاتتارى مەن يران اراسىنداعى كەلىسسوزدەردىڭ شەشۋشى كەزەڭىمەن تۇسپا-تۇس كەلدى. 28 اقپاندا يزرايل مەن اقش يرانعا جاپپاي شابۋىل جاساعاننان كەيىن يران بيلىگى كەك الۋ ماقساتىندا اراسىندا ساۋد ارابيا دا بار پارسى شىعاناعى مەملەكەتتەرىنە بىرنەشە اپتا بويى درون جانە زىمىرانمەن سوققى جاساعانى بەلگىلى.

ساۋد بيلىگىنىڭ مالىمەتىنشە، جالعاسىپ جاتقان قاقتىعىستارعا جانە قاقتىعىستىڭ قايتالانۋ قاۋپىنىڭ ارتۋىنا قاراماستان، بيىلعى قاجىلىققا كەلۋشىلەر سانى وتكەن جىلعىدان اسىپ تۇستەن.

اقش پرەزيدەنتى دونالد ترامپ دۇيسەنبىدە: «مۇسىلمان ەلدەرى، سونىڭ ىشىندە ساۋد ارابياسى، بەيبىتشىلىك كەلىسىمى اياسىندا يزرايلمەن قارىم-قاتىناستى قالپىنا كەلتىرۋى، اۆراام كەلىسىمدەرىنە قوسىلۋى كەرەك» دەپ مالىمدەدى. ساراپشىلار اق ءۇي باسشىسىنىڭ بۇل قادامى "كەلىسسوزدەرگە جاڭا بەلگىسىزدىك اكەلدى" دەپ پىكىر ءبىلدىردى.

ءوز كەزەگىندە ەر-ريادتاعى ساۋد ارابياسى بيلىگى ساياساتتى قاجىلىق ءىس-شارالاردان ءبولىپ قاراۋدى تالاپ ەتتى. قازىرگى ۋاقىتتا مىڭداعان يراندىق قاجىلار مەككە-مەدينادا ءجۇر.

قاسيەتتى جەرگە كەلگەن قاجىلار يسلامنىڭ بەس پارىزىنىڭ ءبىرىن ورىنداپ جاتقانىنا قۋانىشتى بولسا، ساۋد ارابياسى كورولدىگى جوعارى دايىندىقتا.

ساۋد ارابياسىنىڭ قورعانىس مينيسترلىگى الەۋمەتتىك جەلىلەردە «اۋە قورعانىسى كۇشتەرى قاسيەتتى جەردىڭ اۋە كەڭىستىگىن قورعاۋعا، كەز كەلگەن اۋە قاۋىپتەرىنە جاۋاپ بەرۋگە جانە كەلۋشىلەردىڭ قاۋىپسىزدىگى مەن تىنىشتىعىن قامتاماسىز ەتۋگە جاۋاپتى» دەپ مالىمدەمەلەر تاراتتى ءارى مەككە ماڭىندا ورنالاستىرىلعان اۋە قورعانىسى كۇشتەرىن كورسەتەتىن بەينەجازبا جاريالادى.

يسلامنىڭ ەڭ قاسيەتتى قالالارى مەككە مەن مەدينا ورنالاسقان ساۋد ارابياسى جىل سايىن قاجىلىق پەن ۋمرادان ميللياردتاعان دوللار تابادى.

فرانتسپرەس اگەنتتىگىنە سۇحبات بەرگەن قاجىلار بەيبىتشىلىكتىڭ قايتا ورناۋىنا ءۇمىت بىلدىرگەن.

«يرانداعى قاقتىعىس بۇكىل الەمگە اسەر ەتتى، ەشكىم سوعىستى قالامايدى»، - دەپ پىكىر بىلدىرگەن 50 جاستاعى مىسىرلىق مۇحاممەد شاحدا ۇلكەن مەشىتتەن شىعىپ كەلە جاتىپ.

Abai.kz