پرەزيدەنت قول قويعان جاڭا كونستيتۋتسيا زاڭناماسىنا سايكەس الداعى 1-شىلدەدە قازىرگى پارلامەنت تاراپ، جاڭا قۇرىلتاي سايلاۋى ناۋقانى باستالاتىنى جۇرتقا ايان. ەلدىڭ ساياسي ومىرىندەگى ايتۋلى وقيعا بولعالى تۇرعان قۇرىلتايعا قاي پارتيالاردىڭ وتەتىنى قازىردىڭ وزىندە كوپ نازارىن اۋدارىپ وتىر.

ەلدە ءوتىپ كەلە جاتقان ءار كەزەكتى پارلامەنت سايلاۋى كەزىندە جاڭا پارتيالاردىڭ پايدا بولىپ، وزىنەن بۇرىنعىلاردان اتى وزىپ شىعاتىنى ۇيرەنشىكتى جاعدايعا اينالعان جايى بار. بيىلعى ءبىر پالاتالى قۇرىلتاي سايلاۋى باستالار الدىندا سول جاعداي تاعى قايتالاندى.

كەشە 1 ماۋسىمدا ادىلەت مينيسترلىگى قازاقستان رەسپۋبليكاسىنىڭ زاڭناماسىنا سايكەس «ادىلەت» ساياسي پارتياسىن رەسمي تۇردە تىركەگەنىن جاريا ەتتى.

«ادىلەت» پارتياسىنا ءارتۇرلى سالا وكىلدەرى ەنگەن ەكەن. قاتارداعى ەڭبەك ادامدارىنان باستاپ، مۇناي سەرۆيستىك جانە تاۋ-كەن مەتاللۋرگياسى سالاسىنىڭ قىزمەتكەرلەرى، شاحتەرلەر، سپورت، ءبىلىم بەرۋ، دەنساۋلىق ساقتاۋ، عىلىم، كاسىپكەرلىك، IT-سەكتور، قۇقىقتانۋ جانە كرەاتيۆ يندۋستريا وكىلدەرىن قامتىپتى.

پارتيا باعدارلاماسىندا باستى باسىمدىقتار رەتىندە زاڭدىلىق پەن قۇقىقتىق ءتارتىپ قاعيداتتارىن نىعايتۋ، ءتيىمدى ينستيتۋتتاردى دامىتۋ، وڭىرلەردى قولداۋ، تسيفرلاندىرۋ، ادامي كاپيتالدى دامىتۋ جانە باسەكەگە قابىلەتتى ەكونوميكانى قالىپتاستىرۋ بەلگىلەنگەن ەكەن.

2023 جىلعى پارلامەنت سايلاۋىندا جاڭا بيزنەس وكىلدەرىنەن قۇرالعان «رەسپۋبليكا» پارتياسى ساياسي الاماندا اياق استىنان توسكە ورلەپ، ايدىك ولجاس سۇلەيمەنوۆتىڭ باتاسىن العان «بايتاق» جاسىلدار پارتياسىن ىعىستىرىپ، مانداتسىز قالدىرعان ەدى.

مىنە بۇل جولى «ادىلەت» پارتياسى جاڭارعان كەيىپتە قۇرىلتاي دوداسىنا تىڭنان قوسىلعالى وتىر. وسى جولى دا الدىنعى جولعى جاعداي قايتالانۋى مۇمكىن بە؟ قوعامدا ءارتۇرلى بولجامدار ايتىلۋدا. بىرەۋلەر «ادىلەت» پارتياسى الداعى 10 ماۋسىمدا پارتيا سيەزىن وتكىزۋدى جوسپارلاپ وتىرعان «امانات» پارتياسىنىڭ ورنىن باسۋى مۇمكىن دەسە، ەندى بىرەۋلەر وزدەرىن قازىرگى پارلامەتتەگى وپپوزيتسيا سانايتىن «اق جول» پارتياسىن ىعىستىرۋى مۇمكىن دەيدى.

ساياساتتانۋشى اسحات قاسەنعالي پرەزيدەنتتىڭ «جاڭا قازاقستان» يدەاسى كەڭ قولداۋ تاۋىپ وتىرعان كەزەڭدە وتكەلى وتىرعان «بۇل جولعى قۇرىلتاي سايلاۋى «بايتاق» جاسىلدار پارتياسىنا جاقسى مۇمكىندىك» دەيدى. تاۋەلسىز جۋرناليست نۇربەك ءتۇسىپحاننىڭ پىكىرىنشە قۇرىلتايعا «امانات»، «ادىلەت»، «اۋىل»، «اق جول»، «رەسپۋبليكا»، «قازاقستان حالىق پارتياسى» عانا ءوتۋى مۇمكىن ەكەن.

قۇرىلتايدان جوعارىداعى پارتيالار عانا ماندات السا، موجوريتارلىق جۇيەمەن سايلانعان از بولسا دا ساز دەپۋتاتى بار قازىرگى ءماجىلىس سياقتى جۇرتتىڭ نازارىندا بولۋى ەكىتالاي دەپ ايتا بەرۋگە بولادى. ءبىزدىڭ ويىمىزشا بۇل جولى اۋسايدەر بولاتىن پارتيا باسقا ەمەس، اتىن وزگەرتسە دە باعىتىن وزگەرتپەگەن «حالىق» (بۇرىنعى كوممۋنيستىك پارتيا) بولۋى كەرەك. ولاردىڭ وكىلدەرى قۇرىلتاي تورىنە ەمەس، حالىق كەڭەسىنەن ورىن السا دا جەتىپ جاتىر.

Abai.kz