تاۋەلسىزدىك سارايىندا ەلىمىزگە رەسمي ساپارمەن كەلگەن كيپر رەسپۋبليكاسىنىڭ پرەزيدەنتىن رەسمي قارسى الۋ ءراسىمى ءوتتى.

ءىس-شارا اياسىندا قاسىم-جومارت توقاەۆ پەن نيكوس حريستودۋليديس ءبىر بىرىنە رەسمي دەلەگاتسيا مۇشەلەرىن تانىستىردى. قۇرمەت قاراۋىلى روتاسىنىڭ باستىعى راپورت بەرگەن سوڭ قازاقستان مەن كيپردىڭ ءانۇراندارى شىرقالدى.

سودان كەيىن پرەزيدەنتتەر شاعىن قۇرامدا كەلىسسوز جۇرگىزدى.

مەملەكەت باسشىسى كيپر پرەزيدەنتىنە ءىلتيپات ءبىلدىرىپ، ونىڭ قازاقستانعا جاساعان العاشقى رەسمي ساپارىنىڭ تاريحي ءمانىن اتاپ ءوتتى.

– 2019 جىلى سىرتقى ىستەر ءمينيسترى لاۋازىمىن اتقارىپ جۇرگەنىڭىزدە ەلىمىزگە كەلىپ، قازاقستاننىڭ ەۋروپا وداعىنداعى سەنىمدى دوسى ءارى قولداۋشىسى رەتىندە ارەكەت ەتەتىنىڭىزدى مالىمدەگەن ەدىڭىز. بۇگىندە ءبىز ايتارلىقتاي ناتيجەگە قول جەتكىزدىك دەپ سەنىممەن ايتۋعا بولادى. مەملەكەتتەرىمىزدىڭ استانالارىندا ەلشىلىكتەرىمىزدى اشتىق. ەكى ەل اراسىندا تىكەلەي اۋە رەيسى ىسكە قوسىلدى، باسقا دا بىرقاتار ماڭىزدى جوبا جۇزەگە اسىرىلدى. دەگەنمەن ەكىجاقتى ىقپالداستىقتى كەڭەيتۋ ءۇشىن الەۋەتىمىز جەتكىلىكتى دەپ ويلايمىن. ءوز تاراپىمنان كوپتەگەن باعىتتا ىنتىماقتاستىعىمىزدى ودان ءارى دامىتۋعا كۇش سالۋعا دايىنمىن، – دەدى قاسىم-جومارت توقاەۆ.

نيكوس حريستودۋليديس قازاقستان پرەزيدەنتىنە قوناقجايلىق كورسەتكەنى ءۇشىن العىس ايتتى.

– ءسىزدىڭ ەلىڭىزگە كيپردەن تىكەلەي قاتىنايتىن العاشقى رەيس ارقىلى ىسكەرلىك دەلەگاتسيا وكىلدەرىمەن بىرگە ۇشىپ كەلگەنىمە وتە قۋانىشتىمىن. ەلدەرىمىزدىڭ الەۋەتى مول. بۇگىنگى كەلىسسوزدەر ءوزارا ىنتىماقتاستىقتى ارتتىرۋعا سەپتىگىن تيگىزەدى دەپ سانايمىن. سونداي-اق قازاقستانعا باسقا لاۋازىمدا كەلىپ وتىرمىن. قازىرگى ۋاقىتتا ەلىمىز ەۋروپا وداعى كەڭەسىنە توراعالىق ەتىپ جاتىر. اتالعان ءوڭىردىڭ ماڭىزىن جانە قازاقستاننىڭ ەرەكشەلىكتەرىن ەسكەرە وتىرىپ، ەۋروپا وداعى مەن قازاقستان اراسىنداعى ىقپالداستىقتى ودان ءارى ىلگەرىلەتۋ جولدارىن تالقىلاۋعا ءازىرمىن، – دەدى كيپر پرەزيدەنتى.

Abai.kz