2026 جىلعى 5 ماۋسىمدا قاراعاندى مەديتسينا ۋنيۆەرسيتەتىنىڭ بازاسىندا قازاقستان رەسپۋبليكاسى تاۋەلسىزدىگىنىڭ 35 جىلدىعىنا ارنالعان قازاقستان نەيروحيرۋرگتارىنىڭ VI كونگرەسى ءوز جۇمىسىن باستادى.

سۋرەت: شارا ۇيىمداستىرۋشىلارىنان الىندى.

كونگرەسس نەيروحيرۋرگيا سالاسىنداعى ەلىمىزدەگى ەڭ ءىرى كاسىبي الاڭداردىڭ ءبىرى بولىپ تابىلادى جانە جەتەكشى وتاندىق مامانداردى، ۇلتتىق نەيروحيرۋرگيا ورتالىعىنىڭ وكىلدەرىن، وڭىرلەردەن كەلگەن دارىگەرلەردى، سونداي-اق جاس مامانداردى بىرىكتىردى. فورۋم جۇمىسىنا ەلىمىزدىڭ بارلىق وڭىرلەرىنەن 200-گە جۋىق دەلەگات قاتىسۋدا.

كونگرەسس قاتىسۋشىلارىنا قازاقستان رەسپۋبليكاسىنىڭ دەنساۋلىق ساقتاۋ ءمينيسترى اقمارال ءالنازاروۆانىڭ قۇتتىقتاۋ حاتى جولدانىپ, ول اشىلۋ سالتاناتىندا وقىلدى.

ءىس-شارانىڭ قۇرمەتتى قوناقتارى رەتىندە مەملەكەت جانە قوعام قايراتكەرلەرى ورالباي ابدىكارىموۆ، قاراعاندى وبلىسى اكىمىنىڭ دەنساۋلىق ساقتاۋ، جۇمىسپەن قامتۋ جانە ەڭبەك قاۋىپسىزدىگى ماسەلەلەرىنە جەتەكشىلىك ەتەتىن ورىنباسارى وراز تاۋربەكوۆ، سونداي-اق مەديتسينالىق قاۋىمداستىق وكىلدەرى قاتىستى.

كونگرەستىڭ اشىلۋىندا قازاقستان نەيروحيرۋرگتار قاۋىمداستىعىنىڭ پرەزيدەنتى، «ۇلتتىق نەيروحيرۋرگيا ورتالىعى» اق باسقارما توراعاسى، اكادەميك سەرىك اقشولاقوۆ قۇتتىقتاۋ ءسوز سويلەدى.​

5–6 ماۋسىم ارالىعىندا وتەتىن كونگرەسس بارىسىندا قاتىسۋشىلار قازاقستانداعى نەيروحيرۋرگيالىق قىزمەتتى دامىتۋدىڭ وزەكتى ماسەلەلەرىن، نەيروحيرۋرگيالىق اۋرۋلاردى دياگنوستيكالاۋ مەن ەمدەۋدىڭ زاماناۋي تاسىلدەرىن، كۇردەلى كلينيكالىق جاعدايلاردى جانە وڭىرلىك نەيروحيرۋرگيانى ودان ءارى دامىتۋ پەرسپەكتيۆالارىن تالقىلايدى. سونىمەن قاتار پراكتيكالىق دەنساۋلىق ساقتاۋعا جاڭا تەحنولوگيالار مەن يننوۆاتسيالىق ەمدەۋ ادىستەرىن ەنگىزۋ ماسەلەلەرىنە ەرەكشە نازار اۋدارىلادى.

كونگرەستىڭ ەكى كۇندىك باعدارلاماسىنا 53-تەن استام عىلىمي بايانداما، پلەنارلىق جانە سەكتسيالىق وتىرىستار، كاسىبي پىكىرتالاستار، شەبەرلىك ساباقتارى، سيمۋلياتسيالىق ترەنينگتەر مەن پراكتيكالىق ساباقتار ەنگىزىلگەن. قاتىسۋشىلار يننوۆاتسيالىق نەيروحيرۋرگيالىق تاسىلدەردى، جوعارى تەحنولوگيالاردى قولدانۋ ماسەلەلەرىن، كۇردەلى قان تامىرلارى جانە ونكولوگيالىق اۋرۋلاردى، ەرەسەكتەر مەن بالالارداعى ەپيلەپسيانى ەمدەۋ جولدارىن، سونداي-اق فۋنكتسيونالدىق جانە بالالار نەيروحيرۋرگياسىنىڭ جاڭا باعىتتارىن تالقىلاۋدا.

كونگرەستىڭ قازاقستان رەسپۋبليكاسى تاۋەلسىزدىگىنىڭ 35 جىلدىعى قارساڭىندا ءوتۋىنىڭ ماڭىزى ەرەكشە. تاۋەلسىزدىك جىلدارى ەلىمىزدە زاماناۋي نەيروحيرۋرگيالىق قىزمەت قالىپتاستى، مامانداندىرىلعان ورتالىقتار اشىلدى، جوعارى تەحنولوگيالىق دياگنوستيكا مەن ەمدەۋدىڭ ونداعان ادىستەرى ەنگىزىلدى، ال قازاقستاندىق ماماندار حالىقارالىق دەڭگەيدە مويىندالدى.​

«تاۋەلسىزدىكتىڭ 35 جىلى – بۇل مەملەكەتتىڭ عانا ەمەس، قازاقستاندىق نەيروحيرۋرگيانىڭ قالىپتاسۋى مەن دامۋىنىڭ تاريحى. وسى ۋاقىت ىشىندە سالا مامانداندىرىلعان قىزمەتتى قالىپتاستىرۋدان باستاپ جوعارى تەحنولوگيالىق مەديتسينالىق كومەكتى ەنگىزۋگە جانە حالىقارالىق دەڭگەيگە شىعۋعا دەيىنگى ۇلكەن جولدان ءوتتى»، – دەدى سەرىك اقشولاقوۆ.​

اكادەميك سەرىك اقشولاقوۆتىڭ ايتۋىنشا، وتاندىق دەنساۋلىق ساقتاۋ سالاسىنىڭ جەتىستىكتەرىنىڭ جارقىن مىسالدارىنىڭ ءبىرى – تاۋەلسىزدىك جىلدارى قۇرىلعان ۇلتتىق نەيروحيرۋرگيا ورتالىعى.

«بۇگىندە ۇلتتىق نەيروحيرۋرگيا ورتالىعى قازاقستاننان تىس جەرلەردە دە جوعارى تەحنولوگيالار، عىلىمي زەرتتەۋلەر مەن بىلىكتى ماماندار دايارلاۋ ۇيلەسىم تاپقان جەتەكشى ورتالىق رەتىندە تانىمال»، – دەپ اتاپ ءوتتى ول.

قازىرگى تاڭدا قازاقستاندىق نەيروحيرۋرگتار حالىقارالىق عىلىمي جوبالارعا بەلسەندى قاتىسىپ، جەتەكشى مامانداندىرىلعان باسىلىمداردا زەرتتەۋ ناتيجەلەرىن جاريالاپ، ەلىمىزدىڭ اتىن الەمدىك كاسىبي الاڭداردا تانىتىپ كەلەدى. سوڭعى جىلدارى قازاقستاندا حالىقارالىق دەڭگەيدەگى ءىرى عىلىمي جانە ءبىلىم بەرۋ ءىس-شارالارىنىڭ وتكىزىلۋى دە وتاندىق نەيروحيرۋرگيانىڭ جوعارى دەڭگەيىن جانە قازاقستاندىق مامانداردىڭ الەمدىك كاسىبي قاۋىمداستىقتاعى بەدەلىن كورسەتەدى.

كونگرەسس اياسىندا جاس عالىمدار بايقاۋى وتۋدە. بايقاۋدا رەزيدەنتتەر مەن جاس نەيروحيرۋرگ دارىگەرلەر وزدەرىنىڭ عىلىمي جۇمىستارى مەن كلينيكالىق زەرتتەۋلەرىن تانىستىرۋدا. بايقاۋ قورىتىندىسى بويىنشا ۇزدىك قاتىسۋشىلار اكادەميك سەرىك اقشولاقوۆ اتىنداعى سىيلىقپەن ماراپاتتالادى.

سونىمەن قاتار فورۋم اياسىندا ەلىمىزدىڭ ءار وڭىرىنەن كەلگەن 18 نەيروحيرۋرگ قازاقستاننىڭ نەيروحيرۋرگيالىق قىزمەتىن دامىتۋعا قوسقان ەلەۋلى ۇلەسى ءۇشىن ماراپاتتالادى.​

قازاقستان نەيروحيرۋرگتارىنىڭ VI كونگرەسى كاسىبي ديالوگتى دامىتۋعا، تاجىريبە الماسۋعا جانە ەلىمىزدىڭ ءار وڭىرىندەگى ماماندار اراسىنداعى ىنتىماقتاستىقتى نىعايتۋعا ارنالعان ماڭىزدى الاڭعا اينالدى. وسىنداي عىلىمي-پراكتيكالىق ءىس-شارالاردى وتكىزۋ وتاندىق نەيروحيرۋرگيانىڭ ودان ءارى دامۋىنا، مەديتسينالىق كومەكتىڭ ساپاسىن ارتتىرۋعا جانە جاس مامانداردى دايارلاۋعا ىقپال ەتەدى.

«ۇلتتىق نەيروحيرۋرگيا ورتالىعى» اق ءباسپاسوز قىزمەتى,

87779995229 ميرامگۋل جۋبانيازوۆا

Abai.kz