مەملەكەت باسشىسى وزبەكستان پرەزيدەنتى اكىمشىلىگىنىڭ باسشىسى سايدا ميرزيوەۆانى قابىلدادى. قاسىم-جومارت توقاەۆ سايدا ميرزيوەۆانىڭ ساپارى استانا مەن تاشكەنتتىڭ ستراتەگيالىق سەرىكتەستىگىن ىلگەرىلەتۋ تۇرعىسىنان ەرەكشە مانگە يە ەكەنىن اتاپ ءوتتى.

– ءسىزدىڭ ساپارىڭىز قازاقستان مەن وزبەكستان اراسىنداعى ورتاق ىنتىماقتاستىقتى دامىتۋ ءۇشىن وتە پايدالى بولادى دەپ سانايمىز. ءبىزدىڭ ساياسي جۇيەلەرىمىزدە پرەزيدەنت اكىمشىلىكتەرى ايرىقشا ءرول اتقارادى. مەن اكىمشىلىكتەر اراسىنداعى جۇمىس قاتىناستارىنىڭ جاندانعانىن ءاردايىم قولدايمىن. ءبىر-بىرىمىزبەن بايلانىستارىمىز ارتقان سايىن ورتالىق ازياداعى تۇراقتىلىق، وڭىرلىك ىقپالداستىق نىعايا تۇسەدى. ويتكەنى قازاقستان دا، وزبەكستان دا تۇتاس كورسەتكىشتەر بويىنشا ءىرى مەملەكەتتەر سانالادى. ەلدەرىمىز قازىر دامۋدىڭ بەتبۇرىس كەزەڭىندە تۇر. بىزگە بەيبىتشىلىك پەن قاۋىپسىزدىك قاجەت. سوندا عانا رەفورمالاردى ءساتتى ىسكە اسىرا الامىز، – دەدى پرەزيدەنت.

مەملەكەت باسشىسى 2026 جىل قازاقستاندا تسيفرلاندىرۋ جانە جاساندى ينتەللەكت جىلى دەپ جاريالانعانىنا توقتالدى.

– مەن بۇحاراعا جاساعان جۇمىس ساپارىمدى ريزاشىلىقپەن ەسكە الامىن. ءبىز وزبەكستاننىڭ كوپتەگەن سالادا، سونىڭ ىشىندە جاساندى ينتەللەكتىنى ەنگىزۋ مەن تسيفرلاندىرۋ باعىتىندا قول جەتكىزگەن تابىستارىمەن تانىسۋعا مۇمكىندىك الدىق. الەم جاساندى ينتەللەكتىنى قارقىندى تۇردە دامىتۋعا بەت بۇردى. وسى ورايدا ءبىز دە قازىرگى زامان اعىمىنا ىلەسە ءبىلۋىمىز كەرەك، – دەدى قاسىم-جومارت توقاەۆ.

مەملەكەت باسشىسى وزبەكستان پرەزيدەنتى شاۆكات ميرزيوەۆكە جىلى لەبىزىن جولدادى.

Abai.kz