بۇگىن – قازاق دالاسى ءۇشىن ايرىقشا كۇن. ءبىز ەڭسەلى ەلوردامىز استانانىڭ تۋعان كۇنىن تويلاۋمەن قاتار، ۇلتتىق رۋحىمىزدىڭ جانى، حالقىمىزدىڭ ءتول بولمىسىنىڭ ايناسى سانالاتىن ۇلتتىق دومبىرا كۇنىن ەرەكشە ىلتيپاتپەن اتاپ ءوتىپ جاتىرمىز. بۇل قوس مەرەكەنىڭ ءبىر كۇنگە تۇسپا-تۇس كەلۋىندە تەرەڭ سيمۆولدىق ءمان بار. ەگەر استانا – ەگەمەن ەلىمىزدىڭ ساياسي جۇرەگى، جارقىن بولاشاققا ۇمتىلعان جاسامپازدىعىمىزدىڭ سيمۆولى بولسا، قاسيەتتى دومبىرا – سول ۇلتتىق ءدىلىمىز بەن بابالار تاريحىن جۇرەگىندە ساقتاپ، ۇرپاقتار جالعاستىعىن قامتاماسىز ەتىپ تۇرعان التىن دىڭگەگىمىز.

ۇلتتىق دومبىرا كۇنى – تامىرى تەرەڭ مادەنيەتىمىزدى جاڭعىرتاتىن ەڭ قادىرلى مەرەكەلەردىڭ ءبىرى. اقىن قادىر مىرزا ءالىنىڭ «ناعىز قازاق – دومبىرا» دەگەن قاناتتى ءسوزى وسى اسپاپتىڭ ۇلت ومىرىندەگى ورنىن ايقىنداپ بەرگەندەي. قوس ىشەكتى قارا دومبىرا – جاي عانا اسپاپ ەمەس، ول – ۇلتىمىزدىڭ ءۇنى، تاريحىمىزدىڭ شەجىرەسى جانە رۋحاني جادىمىزدىڭ ساقتاۋشىسى. قازاق حالقىنىڭ قۋانىشىندا دا، قيىندىعىندا دا قاسىنان تابىلىپ، جىگەرىن جانىعان، رۋحىن اسقاقتاتقان قاسيەتتى اسپاپ بۇگىنگى جاھاندانۋ زامانىندا ءتول مادەنيەتىمىزدىڭ مىزعىماس تۇعىرى بولىپ قالا بەرەدى. دومبىرانىڭ كۇمبىرى ەستىلگەن جەردە ەلدىڭ رۋحى ويانىپ، بىرلىگىمىز بەكي تۇسەدى. وسى ورايدا، حالىقارالىق قاۋىمداستىققا قازاق دومبىراسىنىڭ سازدى اۋەنىن تانىستىرۋ – ءبىزدىڭ ورتاق پارىزىمىز. سوندىقتان دا بۇل كۇنى ونەرىمىزدى دارىپتەپ، ءومىرىن وسى ونەرگە ارناعان كۇيشىلەر مەن ۇستازداردىڭ ەڭبەگىن باعالاپ، جاس ۇرپاقتىڭ بويىنا ۇلتتىق قۇندىلىقتارىمىزدى ءسىڭىرۋ – وتە ماڭىزدى مىندەت. تاريحي-مادەني مۇرانى ساقتاۋ، ءتول مادەنيەتتى قولداۋ العاش رەت حالىق اتا زاڭىنىڭ نەگىزگى قاعيداتى رەتىندە ايقىندالعانى دا وسىنىڭ دالەلى.

ەلوردامىز استانا دا جىل وتكەن سايىن جاڭارۋ ۇستىندە. بۇگىندە استانا – تەك ساياسي-ەكونوميكالىق ورتالىق قانا ەمەس، سونىمەن بىرگە ايماقتىق جانە جاھاندىق ساياساتتىڭ اسا ماڭىزدى ماسەلەلەرى شەشىلەتىن الاڭعا اينالدى. قالادا ماسشتابتى ينفراقۇرىلىمدىق جوبالار جۇزەگە اسىرىلىپ، «Tarlan» جەڭىلرەلستى كولىك جەلىسىنىڭ قۇرىلىسى جالعاسۋدا. سونىمەن قاتار، قازاقستان تەمىر جولى تاريحىنىڭ مۇراجايى اشىلىپ، بۇرىن اياقتالماعان نىسانداردى قاتارعا قوسۋ جانە زاماناۋي قالالىق ورتانى قالىپتاستىرۋ بويىنشا كەشەندى جۇمىستار اتقارىلۋدا. قالا اكىمى جەڭىس قاسىمبەكتىڭ باسشىلىعىمەن ينفراقۇرىلىمدى دامىتۋ، ساياباقتار مەن قوعامدىق كەڭىستىكتەردى اباتتاندىرۋ، كوگالداندىرۋ جانە قالا تۇرعىندارى مەن قوناقتارى ءۇشىن جايلى جاعداي جاساۋعا ەرەكشە ءمان بەرىلۋدە. مەملەكەت باسشىسى اتاپ وتكەندەي، ەلوردامىز «زاڭ مەن ءتارتىپ» جانە «تازا قازاقستان» قاعيداتتارىنا نەگىزدەلگەن جاڭا قوعامدىق ەتيكانىڭ ورتالىعى بولۋى ءتيىس.

استانانىڭ مەرەيى مەن دومبىرانىڭ كۇمبىرى استاسىپ جاتقان وسى ءبىر ماڭىزدى كۇندە بارشا وتانداستارىمىزدى مەرەكەمەن قۇتتىقتايمىن. ۇلتتىق اسپابىمىزدىڭ قاسيەتتى ءۇنى ۇرپاقتان-ۇرپاققا جالعاسىپ، قازاقتىڭ رۋحىن الەمگە پاش ەتە بەرسىن. ەلىمىز امان، جۇرتىمىز تىنىش بولىپ، ادىلەتتى ءارى قۋاتتى قازاقستاندى قۇرۋ جولىنداعى يگى ىستەرىمىز ءاردايىم جەمىستى بولسىن. ءار شاڭىراققا باق-بەرەكە، ىرىس پەن اماندىق تىلەيمىن. مەرەكەلەرىڭىز قۇتتى بولسىن، قىمباتتى وتانداستار!

Abai.kz