الەمدىك فۋتبول چەمپيوناتىندا 1/8 فينال ويىندارى اياقتالدى. ءبىز بۇگىن وسى كەزەڭنەن اسا الماعان كوماندالارعا شولۋ جاسايمىز.

16-ورىن. پاراگۆاي (5 ۇپاي، دوپ ايىرماسى 3:6)

وڭتۇستىك امەريكاداعى قورعانىسى ەڭ مىعىم كوماندالاردىڭ ءبىرى سانالاتىن، الدىمەن تىلدى تاستاي قىلىپ، شابۋىل دەگەندى سونان سوڭ بارىپ ەسكە الاتىن پاراگۆاي بيىلعى ءتۋرنيردىڭ العاشقى ويىنىندا-اق اقش-تان 1:4 ەسەبىمەن شاشىلىپ ءتۇستى. وسى ماسقارادان قورىتىندى شىعارۋدى ويلاعان ولار كەيىنگى ويىنداردا ارتقى شەپتى تىپتەن كۇشەيتتى. گەرمانيانىڭ تەگەۋرىنىنە دە وسى ىجداعاتتىلىعىمەن توتەپ بەرۋگە تىرىستى. قاقپاشى ورلاندو حيل دە ەرەكشە كوزگە ءتۇستى. ال فرانتسياعا وسى قىرلارىمەن قاتار وتە لاس تا دورەكى ويىنىن قارسى قويىپ، جۇرتشىلىقتىڭ كوڭىلىن قالدىردى. وزبەك تورەشىسىنىڭ ولارعا بىردە-ءبىر ەسكەرتۋ بەرمەۋىنىڭ ءوزى تاڭ قالارلىق. وزىڭنەن دەڭگەيى الدەقايدا جوعارى كومانداعا شاما-شارقىنشا قارسىلاسىپ باققان جاقسى، بىراق ونى كەسكىلەسكەن قىرقىسقا اينالدىرۋ ارتىق. جەڭىلە بىلمەك تە ءلازىم.

سۋرەت: championat.com سايتىنان الىندى.

15-ورىن. ەگيپەت (6 ۇپاي، 8:7)

ءوز توبىندا ءبىرىنشى ورىن دا الار ەدى، تەك يراننىڭ مىعىم قارسىلىعىنا تاپ بولدى. اۆستراليادان باسىم ويناسا دا، سول باسىمدىعىن گولعا اينالدىرا الماي، اقىرى پەنالتيدەن عانا جەڭىسكە جەتتى. ارگەنتيناعا دا لايىقتى قارسىلاس بولا ءبىلدى. 79-مينۋتقا دەيىن 2:0 ەسەبىمەن ۇتىپ تۇردى. تاعى ءبىر گولىن تورەشى ەسەپتەمەدى. بۇل ەداۋىر داۋعا ۇلاستى. ءبىر جاعىنان، «ويىن ءتارتىبىنىڭ بۇزىلعانى راس قوي» دەۋشىلەر دە، «اياعىنىڭ ۇشىن ءسال عانا باسىپ كەتتى ەكەن دەپ، سوعان دا ايىپ دوبىن بەلگىلەپ، گولدى ساناماي قويۋعا بولا ما؟» دەپ نارازىلىق تانىتۋشىلار دا از بولعان جوق. ەگيپەت قۇراماسى شەبەر ويىنىمەن جانكۇيەر قاۋىمدى ريزا ەتىپ، ەلىنە ەڭسەسى تىك اتتاندى.

14-ورىن. كانادا (7 ۇپاي، 9:6)

العاشقى ۇپاي، العاشقى جەڭىستەر، تۇڭعىش رەت توپتان وزىپ شىعۋ – كانادا كومانداسى ءتۋرنيردىڭ ءىشىنارا ءوز ەلىندە ءوتۋىن ءساتتى پايدالانا الدى. بۇلار شيرەك فينالعا شىعىپ كەتسە، فۋتبولعا وبال بولار ەدى.

سۋرەت: championat.com سايتىنان الىندى.

13-ورىن. پورتۋگاليا (8 ۇپاي، 8:3) 

ءوز توبىندا ەكى رەت تەڭ ويناپ، ەكىنشى ورىنعا سىرعىعان سوڭ، پورتۋگال كومانداسىنىڭ تۋرنيرلىك جولى قيىنداي ءتۇستى – الدىمەن حورۆاتيا، سوسىن يسپانيا... حورۆاتتاردى سوڭعى مينۋتتاردا گول سوعىپ، جەڭە الدى، ال يسپاندارعا سول سوڭعى ساتتە ەسە جىبەرىپ، جارىستان شىعىپ قالدى. ماماندار دا، جانكۇيەرلەر دە كريشتيانۋ رونالدۋدى باستى نازاردا ۇستاپ، سونىڭ ءار گولىن، ءار قيمىلىن ميكروسكوپپەن قاراۋمەن بولدى. بىراق قاتارىنان ەكى رەت «پسج» ساپىندا چەمپيوندار ليگاسىن جەڭىپ العان ۆيتينيا، جواۋ نەۆەش، سونداي-اق برۋنۋ فەرناندەش، بەرناردۋ سيلۆا سەكىلدى عاجاپ شەبەرلەرى بار ورتاڭعى شەپ تە ونشا كوزگە تۇسە العان جوق. پورتۋگالياعا باسقا، باتىل باپكەر كەرەك.

12-ورىن. اقش (9 ۇپاي، 11:8)

ارگەنتينالىق مامان ماۋريسيو پوچەتتينو ءتاپ-ءتاۋىر ۇيىمشىل ۇجىم جاساقتاعان ەكەن. توپتان قينالماي شىقتى. پلەي-وففتاعى العاشقى كەدەرگىدەن دە ەركىن ءوتتى. تەك بوسنيامەن ويىندا قىزىل قاعاز العان فولارين بالوگۋنعا قاتىستى داۋ-داماي كوماندا پسيحولوگياسىنا كەرى اسەرىن تيگىزگەن سەكىلدى. ونىڭ ۇستىنە، بەلگيا دا وسال قارسىلاس ەمەس. كەيىنگى ءۇش ويىندا 12 گول سوققان بەلگيالىقتاردىڭ بەت قاراتپاس شابۋىلىنا اقش فۋتبولشىلارى توتەپ بەرە المادى.

سۋرەت: championat.com سايتىنان الىندى.

11-ورىن. برازيليا (10 ۇپاي، 10:4)

گايتي مەن شوتلانديانى وڭاي ۇتقانى بىلايعى جۇرتتىڭ كوزىن الداعانى راس. ال ءسال دە بولسىن قۇرامى مىقتى، ويىنى مىعىم، وزىنە دەگەن سەنىمى مول، ۇيىمشىل كوماندامەن ۇشىراسىپ ەدى، بۇكىل كەمشىلىگى بادىرايىپ كورىنىپ شىعا كەلدى. باستاپقى تۋردا ماروككومەن تەڭ تۇسكەنىنىڭ وزىنە قۋاندى. سوسىن جاپونياعا قارسى ەشتەڭە ىستەي الماي، نۇشايمان بولدى، تەك سوڭعى ساتتە عانا جەڭىس گولىن سوعىپ، «ۋھ» دەدى. ال نورۆەگيامەن ويىندا ناعىز برازيليالىق فۋتبولدى... نورۆەگتەر كورسەتتى. برازيليا قۇراماسى وزدەرى «شاڭعىشىلار» دەپ مەنسىنە بەرمەيتىن سكانديناۆتارعا دوپتى بەرىپ قويىپ، كوپ ۋاقىت قورعانۋمەن بولدى. نورۆەگيامەن كەزدەسۋدە دوپقا تەك 34 پايىز عانا يەلىك ەتۋ دەگەن – الەمنىڭ بەس دۇركىن چەمپيوندارى ءۇشىن ناعىز ماسقارا ەمەس پە؟ برازيليا ويناعاندا شابۋىلدىڭ اقبورانى ۇيىتقي سوعۋى كەرەك دەپ كۇتكەن جوق پا كۇللى جانكۇيەر؟ نورۆەگتەر سول اقبوراندا اداسىپ، بىلگەنىنەن جاڭىلۋعا ءتيىس ەمەس پە ەدى؟

جوق، باس باپكەر كارلو انچەلوتتي «ءبىز دوپتى قارسىلاسقا ادەيى بەرىپ قويدىق، ءوزىمىز ولاردىڭ قاتەلىگىن پايدالانىپ، زۋ ەتىپ قارىمتا شابۋىلعا شىعىپ، ماتچ تاعدىرىن شەشۋدى جوسپارلادىق» دەدى كەزدەسۋدەن سوڭ. نورۆەگتەرگە (يسپاندارعا ەمەس!) دوپ بەرىپ قويىپ، سوسىن ونى ولاردان تارتىپ الا الماي جارتى ماتچ بويى سالپاقتاۋ – وسى ما تاكتيكا؟ برازيليا – پاراگۆاي مەن ەكۆادور ەمەس قوي! الدە «پاپا كارلو» برازيليانى دا «رەالعا» اينالدىرماق بولدى ما؟ (مادريدتىكتەر دە «لەۆانتە» مەن «وساسۋناعا» قارسى ەكىنشى نومەرمەن ويناۋعا ارلانباۋشى ەدى-اۋ).

ماروككو مەن نورۆەگيادان دا قورقاسوقتاپ وينايتىن مۇنداي ءالسىز دە اسىرەساق برازيليانى پەلە مەن سوكراتەستىڭ كورمەي كەتكەنى دە ءجون بولعان شىعار.

10-ورىن. كولۋمبيا (11 ۇپاي، 5:1)

ءوز دەڭگەيىندە ونەر كورسەتتى. مىعىم قورعانىسىن ەشكىم بۇزىپ وتە المادى (كولۋمبيانىڭ قاقپاسىنا سوعىلعان جالعىز گولدىڭ اۆتورى – وزبەك اببوسبەك فايزۋللاەۆ). راس، وزدەرى دە دوپتى كوپ سوعا قويعان جوق. دەگەنمەن بارلىق ماتچتا دا قارسىلاسىنان ءبىر باس جوعارى ويىن كورسەتۋمەن بولدى. شيرەك فينالعا شىعا الار ەدى، بىراق جولى بولمادى.

9-ورىن. مەكسيكا (11 ۇپاي، 10:3)

ءتورت ويىن بويىنا ءوز قاقپاسىنا گول جىبەرگەن جوق. قاي قارسىلاسىنان دا ايقىن باسىم ءتۇستى. تەك انگليانىڭ تەگەۋرىنىنە عانا توتەپ بەرە المادى. ولارعا دا وتە قاتتى قارسىلىق كورسەتىپ، سوڭعى مينۋتقا دەيىن ەسەپتى تەڭەستىرۋگە بارىن سالدى. تەحنيكالىق شەبەرلىگىمەن، ۇيىمشىل دا جىگەرلى ويىنىمەن جانكۇيەرلەرىنىڭ كوڭىلىن حوش ەتتى.

ساكەن سىبانباي

Abai.kz