جەتىسۋ وبلىسى قۇرىلعاننان بەرى وڭىردە 66 جاڭا ۆەتەريناريالىق پۋنكت پەن 1 ۆەتەريناريالىق ستانتسيا پايدالانۋعا بەرىلدى. ال بيىل تاعى 16 ۆەتەريناريالىق پۋنكت پەن 4 ۆەتەريناريالىق ستانتسيانى ىسكە قوسۋ جوسپارلانىپ وتىر. بۇل ءوڭىردىڭ ۆەتەريناريالىق پۋنكتتەرگە دەگەنقاجەتتىلىگىن تولىق قامتاماسىز ەتۋگە مۇمكىندىك بەرەدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

– بيىل اقسۋ، الاكول، ەسكەلدى، كوكسۋ، قاراتال، كەربۇلاق، سارقان جانە پانفيلوۆ اۋداندارىندا مال ۇستايتىن قورشاۋلارىمەن بىرگە 16 ۆەتەريناريالىق پۋنكت جانە 4 ۆەتەريناريالىق ستانتسيا ورناتىلادى. وسىلايشا ءوڭىردىڭ ۆەتەريناريالىق پۋنكتتەرگە دەگەن قاجەتتىلىگى  تولىق قامتاماسىز ەتىلەدى. سونداي-اق وبلىس قۇرىلعاننان بەرى ۆەتەريناريالىق مەكەمەلەرگە 83 جاڭا اۆتوكولىك بەرىلدى، بۇل ۆەتەريناريالىق قىزمەتتەردىڭ موبيلدىلىگى مەن جۇمىس تيىمدىلىگىن ەداۋىر ارتتىردى، – دەدى وبلىستىق ۆەتەريناريا باسقارماسى باسشىسىنىڭ ورىنباسارى دارحان ابىلباەۆ.

سونىمەن قاتار ءوڭىردىڭ ۆەتەريناريالىق قىزمەتتەرىنىڭ ماتەريالدىق-تەحنيكالىق بازاسىن جاقسارتۋ ماقساتىندا اتالعان كەزەڭدە 100 فارماتسەۆتيكالىق توڭازىتقىش، 102 تەرموچەمودان، سونداي-اق ەلەكتر گەنەراتورلارى مەن باسقا دا قاجەتتى جابدىقتار ساتىپ الىندى. سونداي-اق سالا ماماندارى 217 كومپيۋتەر جيىنتىعىمەن جانە 238 پلانشەتپەن قامتاماسىز ەتىلدى، بۇل ولاردىڭ ەلەكتروندىق دەرەكتەر بازاسىنا جەدەل اقپارات ەنگىزۋ جۇمىسىن جەدەلدەتىپ، جەڭىلدەتتى. ايتا كەتسەك، بۇگىنگى تاڭدا وبلىستا 2,8 ميلليوننان استام اۋىل شارۋاشىلىعى جانۋارى سايكەستەندىرىلىپ، بىرىڭعاي اقپاراتتىق بازاعا ەنگىزىلگەن. بۇل قازىرگى ۋاقىتتاعى مال باسىنىڭ جالپى سانى.

ماتەريالدىق-تەحنيكالىق بازانى جانە قىزمەتكەرلەردىڭ ەڭبەك جاعدايلارىن جاقسارتۋمەن قاتار وڭىردە كادرلىق الەۋەتتى نىعايتۋ باعىتىندا دا شارالار قابىلدانۋدا. اتاپ ايتقاندا، قازىرگى تاڭدا ءوڭىردىڭ ۆەتەريناريا سالاسىندا شامامەن شامامەن 1050 ادام جۇمىس ىستەيدى، ونىڭ ىشىندە 820-ى – ۆەتەريناريالىق ماماندار. سونىمەن قاتار سالا ماماندارىنىڭ جالاقىسى ەكى ەسەگە جۋىق ءوستى.

ناتيجەسىندە بالپىق بي اۋىلىنداعى ۆەتەريناريالىق پۋنكت ءوز قىزمەتىن تابىستى جۇزەگە اسىرۋدا. ايتا كەتسەك، كوكسۋ اۋدانىنىڭ بارلىق 10 اۋىلدىق وكرۋگى زاماناۋي ۆەتەريناريالىق پۋنكتتەرمەن قامتاماسىز ەتىلگەن.

– جىل باسىنان بەرى ءبىرىنشى جارتىجىلدىققا جوسپارلانعان دياگنوستيكا جانە ۆاكتسيناتسيا جۇمىستارى تولىق ورىندالدى. قازىرگى ۋاقىتتا جوسپارعا سايكەس اۋىل شارۋاشىلىعى جانۋارلارىن پاستەرەللەزگە قارسى ۆاكتسيناتسيالاۋ جۇرگىزىلۋدە. اتاپ ايتقاندا، ماۋسىم ايىنىڭ باسىنان بەرى ءبىزدىڭ اۋىلدا 520 باس ءىرى قارا مالعا ۆاكتسينا سالىندى، – دەدى بالپىق بي اۋىلىنداعى ۆەتەريناريالىق پۋنكتتىڭ مەڭگەرۋشىسى ەرىك مايماقوۆ.

ايتا كەتۋ كەرەك، وبلىس بويىنشا جۇرگىزىلىپ جاتقان جۇمىستارمەن قاتار كوكسۋ اۋدانىندا دا وندىرىستىك ۆەتەريناريالىق ينفراقۇرىلىمنىڭ جاعدايى جاقسارۋدا. ماسەلەن، مۇسابەك اۋىلىندا جانۋارلاردى بەكىتۋ جانە قاراۋعا ارنالعان زاماناۋي الاڭنىڭ قۇرىلىسى جالعاسۋدا. بۇل كەشەن ۆاكتسيناتسيالاۋ، سىرعالاۋ، ۆەتەريناريالىق تەكسەرۋلەر جانە باسقا دا پروفيلاكتيكالىق ءىس-شارالار كەزىندە ءىرى قارا، ۇساق مال جانە جىلقىلاردى قاۋىپسىز وقشاۋلاۋعا ارنالعان. قۇرىلىستى كەلەسى ايدا اياقتاۋ جوسپارلانىپ وتىر. وسىنداي الاڭدار وبلىستىڭ سەگىز اۋدانىنىڭ ارقايسىسىندا ەكىدەن سالىنادى.

سونىمەن قاتار بيىل وڭىردە الاكول، ەسكەلدى، كوكسۋ، سارقان جانە پانفيلوۆ اۋداندارىندا 10 مال قورىمى سالىنادى. سونداي-اق سارقان جانە پانفيلوۆ اۋداندارىنداعى 2 سويۋ الاڭى قورشالادى.

ءوڭىردىڭ ۆەتەريناريا سالاسىندا جاسالىپ جاتقان جاعدايلارعا جەرگىلىكتى تۇرعىندار دا ءدان ريزا، ويتكەنى ۆەتەريناريالىق قىزمەتتەردىڭ جۇمىسىنىڭ ساپاسىنا ءسۇت پەن ەتتىڭ ساپاسى، دەمەك تۇرعىنداردىڭ دەنساۋلىعى تىكەلەي بايلانىستى.

تەرەكتى اۋىلىنداعى جەكە قوسالقى شارۋاشىلىقتىڭ يەسى ورىمجان اسسەيننىڭ ايتۋىنشا، ۋاقتىلى جۇرگىزىلەتىن ۆاكتسيناتسيا ەلەۋلى شىعىنداردىڭ الدىن الۋعا مۇمكىندىك بەرەدى.

– مەنىڭ شارۋاشىلىعىمدا 25 باس ءىرى قارا مال بار. ۆەتەريناريالىق ماماندار پاستەرەللەزگە قارسى ۆاكتسيناتسيانى ۋاقىتىلى جۇرگىزدى. ءبىزدىڭ ۆەتەرينارلار ەكپە جۇرگىزىلەتىنى تۋرالى الدىن الا حابارلاپ، كەستەنى قاتاڭ ساقتايدى جانە ءوز جۇمىسىنا جاۋاپكەرشىلىكپەن قارايدى. سونىڭ ارقاسىندا مالدىڭ دەنساۋلىعىنا الاڭدامايمىز، – دەدى ول.

جالپى، 2026 جىلى وڭىردە پروفيلاكتيكالىق ءىس-شارالار اسا قاۋىپتى 14 اۋرۋعا قارسى جۇرگىزىلۋدە. كۇيدىرگىگە، اۋسىلعا، پاستەرەللەزگە جانە باسقا دا ينفەكتسيالارعا قارسى ۆاكتسيناتسيالاۋ جالعاسۋدا، سونداي-اق برۋتسەللەزگە دياگنوستيكالىق زەرتتەۋلەر جۇرگىزىلۋدە. جىل باسىنان بەرى وڭىردە شامامەن 6,1 ميلليون باس اۋىل شارۋاشىلىعى جانۋارىنا ۆاكتسينا سالىندى. ۆەتەريناريالىق قىزمەتتىڭ كەشەندى جۇمىسى وبلىستاعى ەپيزووتيالىق جاعدايدىڭ تۇراقتىلىعىن ساقتاۋعا، ءوڭىردىڭ ۆەتەريناريالىق قاۋىپسىزدىگىن قامتاماسىز ەتۋگە جانە مال شارۋاشىلىعىن ودان ءارى دامىتۋعا قولايلى جاعداي جاساۋعا مۇمكىندىك بەرەدى.

جالپى، 2026–2030 جىلدارعا ارنالعان كەشەندى جوسپارعا سايكەس، جەتىسۋ وبلىسىندا 2030 جىلعا قاراي اۋىل شارۋاشىلىعى جانۋارلارىنىڭ سانىن 3,2 ميلليون باسقا دەيىن جەتكىزۋ جوسپارلانىپ وتىر.

Abai.kz