DATAmetrics كومپانياسى حالىقتىڭ الەۋمەتتىك كوڭىل-كۇيىن سيپاتتايتىن الەۋمەتتانۋلىق زەرتتەۋ ناتيجەلەرىن ۇسىنادى. بۇل دەرەكتەر ازاماتتاردىڭ ءومىر ساپاسىنا بەرگەن باعاسىن، وتباسىنىڭ ماتەريالدىق جاعدايىنداعى وزگەرىستەر مەن بولاشاققا دەگەن دەگەن سەنىم دەڭگەيىن قامتىعان. بۇل مالىمەتتەر قازاقستان رەسپۋبليكاسىنىڭ پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ تاپسىرىسى بويىنشا 2026 جىلعى 13 ماۋسىم مەن 2 شىلدە ارالىعىندا جۇرگىزىلگەن الەۋمەتتانۋلىق زەرتتەۋدىڭ ناتيجەسىندە انىقتالدى.

بەتپە-بەت سۇحبات («face-to-face») ادىسىمەن جۇرگىزىلگەن ساۋالناماعا قازاقستاننىڭ بارلىق وڭىرلەرىنەن، سونداي-اق استانا، الماتى جانە شىمكەنت قالالارىنان 18 جاستان اسقان 8000 تۇرعىن قاتىستى.

حالىقتىڭ الەۋمەتتىك كوڭىل-كۇيى ادامداردىڭ ءوز ومىرىنە، ماتەريالدىق جاعدايىنا جانە بولاشاققا دەگەن سەنىم دەڭگەيىنە قانداي باعا بەرەتىنى ارقىلى انىقتالادى. زەرتتەۋ ناتيجەلەرى وسى كورسەتكىشتەردىڭ بارلىعى بويىنشا رەسپوندەنتتەردىڭ جاۋاپتارىندا وڭ كوزقاراس باسىم ەكەنىن كورسەتتى.

ەڭ جوعارى كورسەتكىش ومىرگە ريزالىق دەڭگەيى بويىنشا تىركەلگەن. ساۋالناماعا قاتىسۋشىلاردىڭ 63,3%-ى ءوز ومىرىنە تولىق ريزا ەكەنىن ايتسا، تاعى 31,9%-ى كوپ جاعدايدا قاناعات بىلدىرەدى. وسىلايشا، رەسپوندەنتتەردىڭ 95,2%-ى ءوز ومىرىنە وڭ باعا بەرەدى. ال 3,4%-ى ءوز ومىرىنە ونشا ريزا ەمەستىگىن، 1,1%-ى مۇلدە ريزا ەمەستىگىن مالىمدەدى.

ءوز ومىرىنە بەرىلگەن وڭ باعا وتباسىنىڭ ماتەريالدىق جاعدايىن قابىلداۋ دەڭگەيىنەن دە كورىنىس تابادى. زەرتتەۋگە قاتىسۋشىلاردىڭ ۇشتەن ەكىسىنەن كوبى (67,6%) وتباسىلارىنىڭ ماتەريالدىق جاعدايى سوڭعى جىلدا جاقسارعانىن ايتقان. ونىڭ ىشىندە 29,8%-ى جاعدايى ايتارلىقتاي جاقسارعانىن، ال 37,8%-ى بەلگىلى ءبىر دەڭگەيدە جاقسارعانىن اتاپ ءوتتى.

رەسپوندەنتتەردىڭ 25,5%-ى وتباسىنىڭ ماتەريالدىق جاعدايى وزگەرمەگەنىن ايتسا، 6,6%-ى ناشارلاي ءتۇستى دەپ سانايدى.

ازاماتتاردىڭ بۇگىنگى كۇنگە بەرگەن باعاسى بولاشاققا دەگەن ءۇمىت دەڭگەيىنە اسەر ەتەدى. زەرتتەۋدىڭ قورىتىندىلارى بويىنشا، ساۋالناماعا قاتىسقانداردىڭ باسىم بولىگى ءوز وتباسىنىڭ كەلەشەگىنە سەنىممەن قارايدى. مىسالى، ون رەسپوندەنتتىڭ شامامەن سەگىزى (78,6%) ءبىر جىلدان كەيىن بۇگىنگى كۇننەن جاقسىراق ءومىر سۇرەتىنىنە سەنەدى. ونىڭ ىشىندە 45,0%-ى ءوز جاعدايى ايتارلىقتاي جاقسارادى دەپ ۇمىتتەنسە، تاعى 33,6%-ى بەلگىلى ءبىر دەڭگەيدە جاقساراتىنىنا ءۇمىتتى.

سونداي-اق 15,9%-ى ءوز وتباسىنىڭ تۇرمىس دەڭگەيى وزگەرىسسىز قالادى دەپ ەسەپتەيدى. ال، رەسپوندەنتتەردىڭ 3,4%-ى ءوز جاعدايى ناشارلاۋى مۇمكىن دەپ سانايتىنىن ايتقان.

جالپى العاندا، زەرتتەۋ ناتيجەلەرى حالىقتىڭ الەۋمەتتىك كوڭىل-كۇيىنىڭ نەگىزگى كورسەتكىشتەرى بويىنشا وڭ باعالاۋدىڭ باسىم ەكەنىن كورسەتەدى. ساۋالناماعا قاتىسقانداردىڭ كوپشىلىگى ءوز ومىرىنە ريزا، وتباسىنىڭ ماتەريالدىق جاعدايىنداعى وزگەرىستەردى وڭ باعالايدى جانە الداعى ۋاقىتتا تۇرمىس جاعدايىنىڭ جاقساراتىنىنا سەنىم بىلدىرەدى.

ىرىكتەۋ قازاقستان رەسپۋبليكاسى حالقىنىڭ نەگىزگى الەۋمەتتىك-دەموگرافيالىق سيپاتتامالارىنا، اتاپ ايتقاندا تۇرعىلىقتى جەرىنىڭ تۇرىنە (قالا/اۋىل), جىنىسى مەن جاسىنا قاراي رەپرەزەنتاتيۆتى. سەنىمدىلىك ىقتيمالدىعى 95% بولعان جاعدايدا ىرىكتەمەنىڭ ستاتيستيكالىق قاتەلىك شەگى ±1,1%-دان قۇرايدى.

DATAmetrics كومپانياسى بۇل زەرتتەۋ ناتيجەلەرىن قازاقستان رەسپۋبليكاسى ورتالىق سايلاۋ كوميسسياسىنىڭ 2026 جىلعى 3 شىلدەدەگى № وسك-11-07/زت-ك-29 حابارلاماسى نەگىزىندە جاريالاپ وتىر.

Abai.kz