2026 جىلعى قاڭتار–ساۋىر ايلارىنىڭ قورىتىندىسى بويىنشا قازاقستاندا سارى ماي مەن كۇنباعىس مايى ءوندىرىسىنىڭ تۇراقتى ءوسىمى بايقالدى. سىرتقى ساۋدا كورسەتكىشتەرى دە وڭ ديناميكا كورسەتتى: ءونىمنىڭ ەكى ساناتى بويىنشا ەكسپورت كولەمى ۇلعايىپ، بۇل وتاندىق قايتا وڭدەۋ ونەركاسىبىنىڭ الەۋەتىنىڭ ارتىپ كەلە جاتقانىن ايعاقتايدى.

ەسەپتى كەزەڭدە رەسپۋبليكادا مايلىلىعى 85% اسپايتىن 13,8 مىڭ توننا سارى ماي ءوندىرىلدى. بۇل 2025 جىلدىڭ سايكەس كەزەڭىمەن سالىستىرعاندا 47,4% ارتىق.

سارى ماي ەكسپورتى 40,4% ءوستى. 2026 جىلعى قاڭتار–ساۋىر ارالىعىندا شەتەلگە 394,1 توننا ءونىم ەكسپورتتالدى. بۇل وتكەن جىلدىڭ وسى كەزەڭىندەگى 280,7 توننامەن سالىستىرعاندا ايتارلىقتاي جوعارى. نەگىزگى ەكسپورتتىق نارىقتار – رەسەي، موڭعوليا، قىرعىزستان جانە بەلارۋس.
سارى ماي يمپورتى 2 242,2 توننانى قۇرادى. ىشكى نارىقتاعى يمپورتتىق ءونىمنىڭ ۇلەسى 13,9% بولدى. نەگىزگى جەتكىزۋشىلەر – بەلارۋس پەن يران.
ءتورت ايدىڭ قورىتىندىسى بويىنشا ىشكى نارىقتا 15,7 مىڭ توننا سارى ماي وتكىزىلدى.

كۇنباعىس مايى وندىرىسىندە دە وڭ ءوسىم ساقتالۋدا. 2026 جىلعى قاڭتار–ساۋىر ايلارىندا وتاندىق كاسىپورىندار 335,5 مىڭ توننا تازارتىلعان جانە تازارتىلماعان كۇنباعىس مايىن ءوندىردى. بۇل وتكەن جىلدىڭ سايكەس كەزەڭىمەن سالىستىرعاندا 13,2% كوپ.

كۇنباعىس مايىنىڭ ەكسپورتى 49,6% ارتتى. 2026 جىلعى قاڭتار–ساۋىر ايلارىندا ەكسپورتتىق جەتكىزىلىمدەردىڭ كولەمى 353,8 مىڭ توننانى قۇرادى، ال وتكەن جىلدىڭ وسى كەزەڭىندە 236,4 مىڭ توننا ءونىم ەكسپورتتالعان. نەگىزگى ەكسپورت باعىتتارى: وزبەكستانعا – 153,2 مىڭ توننا، قىتايعا – 127,2 مىڭ توننا، اۋعانستانعا – 38,6 مىڭ توننا، تاجىكستانعا – 27 مىڭ توننا، يرانعا – 4,9 مىڭ توننا جانە باسقا دا ەلدەر.

كۇنباعىس مايىنىڭ يمپورتى 47,9 مىڭ توننانى قۇرادى. بۇل رەتتە ىشكى نارىقتاعى يمپورتتىق ءونىمنىڭ ۇلەسى تومەن دەڭگەيدە قالىپ، 12,5% قۇرادى. 2026 جىلعى قاڭتار–ساۋىر ايلارىندا قازاقستاننىڭ ىشكى نارىعىندا 29,7 مىڭ توننا كۇنباعىس مايى وتكىزىلدى.

Abai.kz