قازاقستاندا قۇرىلتايدىڭ العاشقى سايلاۋىنا كانديداتتاردى ۇسىنۋ كەزەڭى اياقتالدى. ورتالىق سايلاۋ كوميسسياسىنا جەتى ساياسي پارتيا ءوز كانديداتتارىنىڭ ءتىزىمىن تاپسىردى. جالپى العاندا، جاڭا پارلامەنتتەگى ورىندار ءۇشىن 546 ادام باق سىنايدى، دەپ حابارلايدى Ulysmedia.kz.

«ادىلەت» ەڭ كوپ كانديدات ۇسىندى

ەڭ كوپ كانديدات ءتىزىمىن «ادىلەت» پارتياسى ۇسىندى – 186 ادام. Respublica پارتياسىنان 76 كانديدات، قازاقستان حالىق پارتياسىنان 72 كانديدات ۇسىنىلدى. «اۋىل» پارتياسى تىزىمىنە 69 ادامدى، «اق جول» – 63 ادامدى، «بايتاق» 47 ادامدى ەنگىزدى. ەڭ از ءتىزىم جالپىۇلتتىق سوتسيال-دەموكراتيالىق پارتياعا تيەسىلى بولدى – 33 كانديدات.

وسىلايشا، سايلاۋعا قازاقستاندا رەسمي تىركەلگەن بارلىق جەتى ساياسي پارتيا قاتىسادى.

سونىمەن قاتار وسك حالىقارالىق بايقاۋشىلاردى اككرەديتتەۋدى باستادى. قازىرگى ۋاقىتتا ءۇش حالىقارالىق ۇيىم مەن ءتورت شەتەلدىك مەملەكەتتەن 60 بايقاۋشىعا قاتىستى قۇجاتتار كەلىپ تۇسكەن. ولاردىڭ باسىم بولىگى – ەقىۇ-نىڭ دەموكراتيالىق ينستيتۋتتار جانە ادام قۇقىقتارى جونىندەگى بيۋروسىنىڭ ميسسياسىنىڭ وكىلدەرى.

– ۇسىنىستار كەلىپ تۇسكەن سايىن حالىقارالىق بايقاۋشىلار تۋرالى مالىمەتتەر جاڭارتىلىپ وتىرادى، – دەدى وسك توراعاسىنىڭ ورىنباسارى مۇحتار ەرمان.

قۇرىلتاي سايلاۋى

قۇرىلتاي سايلاۋى 23 تامىزدا وتەدى.  قۇرىلتاي قازاقستاننىڭ العاشقى ءبىر پالاتالى پارلامەنتى بولادى. بۇعان دەيىنگى ەكى پالاتالى پارلامەنت ءوز جۇمىسىن توقتاتتى.

ايتا كەتەيىك، ۇكىمەت قۇرىلتاي سايلاۋىن وتكىزۋگە رەزەرۆتەن 34,3 ميلليارد تەڭگە ءبولدى.

Abai.kz