قازاقستان ورتالىق ازياداعى ەڭ تۇراقتى ينۆەستيتسيالىق نارىق رەتىندەگى ءوز ايقىنداماسىن ۇنەمى نىعايتىپ كەلەدى. مامىر ايىنداعى Safest Countries for Investors 2026 رەيتينگىسىنە سايكەس، رەسپۋبليكامىز 70-ءشى ورىندى يەلەنگەن 2025 جىلدىڭ قازان ايىمەن سالىستىرعاندا ءوز ايقىنداماسىن ايتارلىقتاي جاقسارتىپ، 150 مەملەكەتتىڭ ىشىندە 53-ءشى ورىنعا يە بولدى. بۇل ناتيجە ەلدىڭ ەكونوميكالىق تۇراقتىلىعىنا جانە ماكروەكونوميكالىق تۇراقتىلىقتى قامتاماسىز ەتۋ، ينستيتۋتتاردى دامىتۋ جانە قولايلى ينۆەستيتسيالىق احۋال جاساۋ ساياساتىنىڭ تيىمدىلىگىنە دەگەن حالىقارالىق سەنىمنىڭ ارتۋىن كورسەتەدى. بۇل رەتتە قازاقستان وڭىردەگى كوشباسشىلىعىن ساقتاپ، بارلىق ورتالىق ازيا ەلدەرىنەن، سونداي-اق ءىرى ەكونوميكاسى بار بىرقاتار ەلدەردەن اسىپ ءتۇستى.

بۇل رەيتينگتىڭ ەرەكشەلىگى، تارتىلعان ينۆەستيتسيا كولەمىن ەمەس، ەكونوميكا مەن مەملەكەتتىك ينستيتۋتتاردىڭ ۇزاق مەرزىمدى تۇراقتىلىعى تۇرعىسىنان ينۆەستيتسيالىق قاۋىپسىزدىك دەڭگەيىن باعالايتىندىعىندا. ادىستەمە ماكروەكونوميكالىق تۇراقتىلىق، مەملەكەتتىك باسقارۋ ساپاسى، ساياسي جانە ۆاليۋتالىق تاۋەكەلدەر، رەتتەۋشى ورتانىڭ تيىمدىلىگى جانە ەكونوميكانىڭ سىرتقى داعدارىستارعا توتەپ بەرۋ قابىلەتى سەكىلدى كوپتەگەن فاكتورلاردى ەسكەرەدى. قازاقستاننىڭ جوعارى سەرپىنى حالىقارالىق ينۆەستورلار اراسىندا ەلىمىزدى  الەمدىك ەكونوميكالىق بەلگىسىزدىك جاعدايىندا دا تۇراقتىلىقتى ساقتاۋعا قابىلەتتى بولجامدى جانە سالىستىرمالى تۇردە تۇراقتى يۋريسديكتسيا رەتىندە  قابىلداۋىن كورسەتەدى.

قازاقستاننىڭ ينۆەستيتسيالىق تارتىمدىلىعىن ودان ءارى نىعايتۋ مەملەكەتتىك ينستيتۋتتاردىڭ ساپاسىن دايەكتىلىكپەن جاقسارتۋمەن، ينۆەستورلاردى قورعاۋ تەتىكتەرىن جەتىلدىرۋمەن جانە بيزنەستى جۇرگىزۋدىڭ ايقىن شارتتارىن قامتاماسىز ەتۋمەن بايلانىستى. وڭ سەرپىندى ساقتاۋ ەلدىڭ حالىقارالىق رەيتينگتەردەگى ايقىنداماسىن جاقسارتىپ قانا قويماي، سونىمەن قاتار شەتەلدىك كاپيتال اراسىنداعى سەنىم دەڭگەيىن ارتتىرىپ، بۇل تۇراقتى ەكونوميكالىق ءوسىمنىڭ قوسىمشا فاكتورىنا اينالادى جانە قازاقستاننىڭ الەمدىك ينۆەستيتسيالىق نارىقتاعى باسەكەگە قابىلەتتىلىگىن نىعايتادى.

Abai.kz