قر پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا حالىقارالىق مۋزىكالىق بايقاۋلاردا جۇلدەلى ورىندارعا يە بولعان قازاقستاندىق جاس ونەرپازدارمەن كەزدەستى. كەزدەسۋگە اقەركە اماليات، جاسمينا تۇزەلوۆا، الەن باسەن، سونداي-اق ولاردىڭ ۇستازدارى مەن اتا-انالارى قاتىستى.

جۇلدەگەرلەردى جەڭىستەرىمەن قۇتتىقتاعان ايدا بالاەۆا مەملەكەت باسشىسى ەلدىڭ ورنىقتى دامۋىنىڭ باستى العىشارتى سانالاتىن ادامي كاپيتالدى دامىتۋعا ايرىقشا ءمان بەرەتىنىن اتاپ ءوتتى. پرەزيدەنت وسكەلەڭ ۇرپاقتى تاربيەلەۋدە، ۇلتتىق بىرەگەيلىكتى نىعايتۋدا مادەنيەت پەن ونەردىڭ ورنى ەرەكشە ەكەنىن ۇنەمى ايتىپ كەلەدى. جاڭا كونستيتۋتسيادا مادەنيەت پەن ۇلتتىق قۇندىلىقتار مەملەكەتتى دامىتۋدىڭ ماڭىزدى نەگىزدەرىنىڭ ءبىرى رەتىندە بەكىتىلگەن. سوندىقتان دارىندى بالالار مەن جاستاردى قولداۋ – ەل بولاشاعىنا سالىنعان ستراتەگيالىق ينۆەستيتسيا.

«بۇگىن سىزدەرمەن بىرگە بۇكىل قازاقستان قۋانىپ وتىر. وسىنداي ءاربىر جەڭىس – ەلىمىزدىڭ ورتاق جەتىستىگى. بۇل بيىك ناتيجەلەردىڭ ارتىندا جاس ونەرپازداردىڭ تالانتى مەن تاباندىلىعى، ۇستازداردىڭ كاسىبي شەبەرلىگى جانە اتا-انالاردىڭ قولداۋى تۇر. قازاقستاندىق بالالاردىڭ حالىقارالىق ساحنادا ءوز ونەرىن سەنىمدى تانىتىپ، جوعارى ناتيجەلەرگە قول جەتكىزۋى وتاندىق ونەر مەكتەبىنىڭ دەڭگەيى بيىك ەكەنىن كورسەتەدى. سىزدەرگە جاڭا جەڭىستەر مەن شىعارماشىلىق تابىس تىلەيمىن»، – دەدى پرەمەر-ءمينيستردىڭ ورىنباسارى.

اقەركە اماليات 2026 جىلى وتكەن «ۆيتەبسكىدەگى سلاۆيان بازارى» XXXV حالىقارالىق ونەر فەستيۆالىنىڭ ەسترادالىق ءان ورىنداۋشىلار بايقاۋىندا ءى ورىندى يەلەنىپ، «ليرا» ارنايى سىيلىعىنا يە بولدى.

جاسمينا تۇزەلوۆا اتالعان فەستيۆال اياسىنداعى بالالار بايقاۋىندا ءىى ورىندى جەڭىپ الدى. سونىمەن قاتار وعان اۆتورلىق ءان جازۋعا مۇمكىندىك بەرەتىن ارنايى سەرتيفيكات تابىستالدى.

جاس ۆيولونچەلشى الەن باسەن يتاليادا وتكەن Rovere d’Oro XXXVII حالىقارالىق مۋزىكا بايقاۋىنىڭ جەڭىمپازى اتاندى. ول «جاس تالانتتار» سەكتسياسىنىڭ ەكىنشى جاس ساناتىندا مۇمكىن بولعان 100 ۇپايدىڭ 100-ءىن جيناپ، Primo Premio Assoluto ماراپاتىنا يە بولدى.

كەزدەسۋ بارىسىندا جاس ورىنداۋشىلاردىڭ كاسىبي قالىپتاسۋىنا ەلەۋلى ۇلەس قوسقان ۇستازدار مەن اتا-انالاردىڭ ەڭبەگى دە ەرەكشە اتالىپ ءوتتى.

بايقاۋ جەڭىمپازدارى، ولاردىڭ اتا-انالارى مەن ۇستازدارى حالىقارالىق ونەر دودالارىنان العان اسەرلەرىن جەتكىزدى. سونداي-اق دارىندى بالالارعا كورسەتىلىپ جاتقان قولداۋ ءۇشىن شىنايى ريزاشىلىقتارىن ءبىلدىردى. قاتىسۋشىلار مادەنيەت پەن ونەردى دامىتۋعا كورسەتىلەتىن قولداۋ جانە جاڭا مۇمكىندىكتەر جەتىستىكتەرگە جەتەلەيتىنىن ايتتى.

Abai.kz