الماتىنىڭ اۋەزوۆ اۋدانىندا 1200 ورىندىق №13 جاڭا مەكتەپ-گيمنازيا سالىنىپ جاتىر. وڭىرلىك كوممۋنيكاتسيالار قىزمەتى ۇيىمداستىرعان باق وكىلدەرىنە ارنالعان ءباسپاسوز تۋرىنىڭ نەگىزگى نىسانىنىڭ ءبىرى دە وسى بولدى. 

جۋرناليستەرگە قۇرىلىس جۇمىسىنىڭ بارىسىن اۋەزوۆ اۋدانىنىڭ اكىمى ابزال ەگەمبەرديەۆ تانىستىردى. ونىڭ ايتۋىنشا، جاڭا مەكتەپ تەحنيكالىق تەكسەرۋ مەن ساراپتاما قورىتىندىسى بويىنشا اپاتتى دەپ تانىلعان ەسكى عيماراتتىڭ ورنىنا سالىنىپ جاتىر ەكەن. 

«بۇرىنعى مەكتەپ نەبارى 340 وقۋشىعا ەسەپتەلگەن بولاتىن، جاڭا عيماراتتىڭ جوبالىق قۋاتتىلىعى 1200 ورىنعا ارنالعان. بۇل اۋدانداعى وقۋشى ورنىنىڭ تاپشىلىعىن ەداۋىر ازايتۋعا مۇمكىندىك بەرەدى. جاڭا مەكتەپتىڭ قۇرىلىسى اۋداننىڭ الەۋمەتتىك ينفراقۇرىلىمىن دامىتىپ، بالالاردىڭ ساپالى ءارى جايلى ءبىلىم الۋىنا قولايلى جاعداي جاساۋعا سەپ بولادى»، – دەدى اۋدان اكىمى. 

جوباعا الماتىنىڭ قۇرىلىس باسقارماسى تاپسىرىس بەرگەن. جوبالىق-سمەتالىق قۇجاتتاما ازىرلەنىپ، مەملەكەتتىك ساراپتامانىڭ وڭ قورىتىندىسىن العاننان كەيىن قۇرىلىس جۇمىسى بيىلعى جىلدىڭ ءساۋىر ايىندا باستالدى. 

BI Group كومپانياسى جوباسى باسشىسىنىڭ ورىنباسارى ەرنات رىمحانوۆتىڭ ايتۋىنشا، بۇگىندە قۇرىلىس الاڭىندا 200-دەن استام مامان مەن 20-دان اسا ارناۋلى تەحنيكا قىزۋ جۇمىس ىستەپ جاتىر. 

«قازىرگى تاڭدا نىساننىڭ دايىندىعى شامامەن 40 پايىزدى قۇرايدى. جەرگە قاتىستى جۇمىس تولىق ءبىتتى. قازىرگ ءمونوليتتى قۇرىلىمدى سالۋ، ارلەۋ مەن ينجەنەرلىك جۇيەنى ورناتىپ جاتىر. قۇرىلىس-مونتاج جۇمىسىنىڭ اياقتالۋى 2026 جىلدىڭ جەلتوقسان ايىنا جوسپارلانعان»، – دەيدى ول. 

جوباعا سايكەس، جالپى اۋدانى 12,7 مىڭ شارشى مەتردەن اساتىن ءۇش قاباتتى عيمارات ءبىلىم بەرۋ ۇيىمدارىنا قويىلاتىن قازىرگى تالاپقا تولىق سايكەس بولادى. مەكتەپتە 44 وقۋ كابينەتى، سپورت زالى، حورەوگرافيا مەن بالەت زالى، كىتاپحانا، سونداي-اق 354 ورىندىق اسحانا قاراستىرىلعان. 

جوبالاۋ كەزىندە قاۋىپسىزدىك، سەيسميكالىق توزىمدىلىك،ەنەرگيا تيىمدىلىگى مەن ەرەكشە ءبىلىم بەرۋگە مۇقتاج بالالار ءۇشىن كەدەرگىسىز ورتا قالىپتاستىرۋعا كوپ كوڭىل ءبولىنىپتى.   

قازىرگى ۋاقىتتا نىساندا بۇزۋ مەن جەر جۇمىسى تولىق اياقتالدى، عيمارات قاڭقاسىنىڭ 68 پايىزى ورناتىلدى، سىرتقى ينجەنەرلىك جەلىنىڭ 90 پايىزى تارتىلدى. سونىمەن قاتار ىشكى ينجەنەرلىك كوممۋنيكاتسيالاردى جۇرگىزۋ، قابىرعا مەن قالقا تۇرعىزۋ، ىشكى ارلەۋ مەن اۋماقتى اباتتاندىرۋ جۇمىسى ىستەلىپ جاتىر. 

اۋەزوۆ اۋدانىنىڭ اكىمى ابزال ەگەمبەرديەۆتىڭ ايتۋىنشا، قۇرىلىس جۇمىسىن بەكىتىلگەن كەستەگە ساي تۇراقتى باقىلاۋدى ۇستاپ وتىر. 

نىسان پايدالانۋعا بەرىلگەننەن كەيىن ۋاقىتشا جاقىن ماڭداعى مەكتەپتەگى وقۋشىلار كەلەسى وقۋ جىلىندا جاڭا ءبىلىم ورداسىنا قايتا ورالادى. №13 جاڭا مەكتەپ - گيمنازيا اۋداننىڭ ەڭ ۇلكەن ءبىلىم بەرەتىن نىساننىڭ بىرىنە اينالىپ، وسكەلەڭ ۇرپاقتىڭ قاۋىپسىز ءارى جايلى جاعدايدا ءبىلىم الۋىنا مۇمكىندىك بەرمەك. 

Abai.kz