قازاقستاندىقتاردىڭ الداعى قۇرىلتاي سايلاۋىنا قاتىسۋى جاڭا وكىلدى ورگاندى قالىپتاستىرۋ ءۇشىن عانا ەمەس، شەشىمدەر قابىلداۋ بارىسىندا قوعامنىڭ ءارتۇرلى توپتارىنىڭ مۇددەلەرى ەسكەرىلۋى ءۇشىن دە ماڭىزدى. مۇنداي پىكىردى «استانا قالاسىنىڭ ءاۋتيزمى بار بالالار اتا-انالارىنىڭ «وردا» بىرلەستىگى» قب ءتورايىمى سالتانات ەسماعانبەتوۆا ءبىلدىردى.

وكىلدى جۇيەنىڭ جاڭا كەزەڭى

23 تامىزدا قازاقستاندا قۇرىلتاي سايلاۋى وتەدى. سالتانات ەسماعانبەتوۆانىڭ پىكىرىنشە، بۇل ەلدىڭ وكىلدى جۇيەسىن دامىتۋداعى ماڭىزدى كەزەڭ بولماق.

«قۇرىلتاي سايلاۋى – وكىلدى جۇيەنى دامىتۋداعى ماڭىزدى قادام. ول ازاماتتاردىڭ شەشىم قابىلداۋ ۇدەرىسىنە كەڭىرەك قاتىسۋىن قامتاماسىز ەتىپ، قوعام مەن مەملەكەت اراسىنداعى بايلانىستى نىعايتۋى ءتيىس»، – دەپ اتاپ ءوتتى ول.

جاڭا فورماتقا توقتالعان ساراپشى وكىلدى ورگاندى قالىپتاستىرۋعا ازاماتتاردىڭ تىكەلەي قاتىسۋىنىڭ ماڭىزىن اتاپ ءوتتى.

«جاڭا فورمات وكىلدى ورگاندى قالىپتاستىرۋعا باسقاشا كوزقاراستى كوزدەيدى. مۇندا ازاماتتاردىڭ تىكەلەي قاتىسۋىنا ماڭىزدى ءرول بەرىلەدى. بۇل – ادامداردىڭ ءوز مۇددەلەرىن كىم قورعايتىنىنا ىقپال ەتۋىنە مۇمكىندىك»، – دەدى سالتانات ەسماعانبەتوۆا.

ازاماتتىق قوعام قانداي ءرول اتقارۋى ءتيىس؟

قوعامدىق بىرلەستىك ءتورايىنى سايلاۋ ناۋقانى كەزەڭىندە ازاماتتىق قوعام ينستيتۋتتارىنىڭ جۇمىسىنا دا ەرەكشە نازار اۋداردى.

ونىڭ ايتۋىنشا، نەگىزگى مىندەتتەردىڭ ءبىرى – ازاماتتاردىڭ ءوز قۇقىقتارىن ءتۇسىنۋىن، سايلاۋ ۇدەرىسىنىڭ ەرەكشەلىكتەرىن ءبىلۋىن جانە وعان سانالى تۇردە قاتىسا الۋىن قامتاماسىز ەتۋ.

«ءبىزدىڭ مىندەتىمىز – ازاماتتاردى اقپاراتتاندىرۋ، ولاردىڭ قۇقىقتىق جانە ساياسي ساۋاتتىلىعىن ارتتىرۋ، ۇدەرىستىڭ اشىق بولۋىنا ىقپال ەتۋ، سونداي-اق زاڭدىلىق پەن اشىقتىق قاعيداتتارىنىڭ ساقتالۋىن مۇقيات باقىلاۋ»، – دەپ اتاپ ءوتتى ساراپشى.

وسىلايشا، ونىڭ پىكىرىنشە، ازاماتتىق قوعامنىڭ ءرولى حالىقتى اقپاراتتاندىرۋمەن عانا شەكتەلمەيدى، سونىمەن قاتار سايلاۋ ۇدەرىسىنىڭ اشىقتىعىن قامتاماسىز ەتۋگە ىقپال ەتۋدى دە قامتيدى.
نەلىكتەن سايلاۋعا بارۋ ماڭىزدى؟

سالتانات ەسماعانبەتوۆا سايلاۋشىلاردىڭ بەلسەندىلىگى جاڭا ورگاننىڭ وكىلدىك سيپاتىنا تىكەلەي بايلانىستى ەكەنىن اتاپ ءوتتى. داۋىس بەرۋگە ازاماتتار نەعۇرلىم كوپ قاتىسسا، قوعامنىڭ ءارتۇرلى توپتارىنىڭ ءوز وكىلدەرىن تاڭداۋ ارقىلى ءوز مۇددەلەرىن ءبىلدىرۋ مۇمكىندىگى دە سوعۇرلىم كەڭەيەدى.
«ازاماتتاردىڭ قاتىسۋى – كەز كەلگەن وكىلدى ورگاننىڭ زاڭدىلىعىنىڭ نەگىزى. ەگەر ادامدار قاتىسپاسا، ولاردىڭ مۇددەلەرى وكىلدىكسىز قالۋى مۇمكىن. سوندىقتان داۋىس بەرۋ – تەك قۇقىق قانا ەمەس، ازاماتتىق جاۋاپكەرشىلىك»، – دەدى ول.

جاڭا قۇرىلتايدان نە كۇتىلەدى؟
ازاماتتىق قوعام وكىلىنىڭ ايتۋىنشا، بولاشاق قۇرىلتاي جۇمىسىنا قاتىستى باستى كۇتىلىم – حالىقپەن اشىق ءارى تۇراقتى ديالوگ ورناتۋ.
ونىڭ سوزىنشە، قوعاممەن ءوزارا ءىس-قيمىل سايلاۋ ناۋقانى اياقتالعاننان كەيىن دە جالعاسىپ، ازاماتتار كوتەرگەن ماسەلەلەر ناقتى شەشىمدەردەن كورىنىس تابۋى ماڭىزدى.

«باستى كۇتىلىم – قۇرىلتاي قوعاممەن ديالوگ جۇرگىزەتىن شىنايى الاڭعا اينالسا ەكەن. ادامداردى الاڭداتاتىن ماسەلەلەر، اسىرەسە حالىقتىڭ الەۋمەتتىك وسال توپتارىنا قاتىستى پروبلەمالار بويىنشا اشىقتىقتى، كەرى بايلانىستى جانە ناقتى شەشىمدەردى كورگىمىز كەلەدى»، – دەپ اتاپ ءوتتى سالتانات ەسماعانبەتوۆا.

Abai.kz