سيرەك مەتالدار: اۆستراليا اقشاسى سارىارقاعا اعىلۋدا...
افريكادان كەلگەن كەن، ستەپنوگورسك دالاسى جانە اۆستراليالىق ميلليوندار...
سيرەك كەزدەسەتىن مەتالدار توڭىرەگىندەگى عالامدىق دەڭگەيدەگى تارىستا قازاقستان تاعى ءبىر سەنساتسيا جاساۋدا...
الەم گەوساياسات پەن «جاسىل ەنەرگيا» ءۇشىن سيرەك كەزدەسەتىن مەتالدارعا (رەدكوزەمەلنىە مەتاللى) تالاسىپ جاتقاندا، قازاقستان وڭىرىندە وتە قىزىقتى ءارى كۇتپەگەن ءىرى مامىلە جاسالدى!
ستەپنوگورسكتەگى توقىراۋعا ۇشىراعان زاۋىتتى اۆستراليا ينۆەستورلارى نەگە شۇعىل ساتىپ الىپ جاتىر؟
بۇل ماسەلەنى تەرەڭىرەك تالداساق، وقيعا جەلىسى دەتەكتيۆتىك فيلمنەن كەم تۇسپەيدى:
مامىلە اۋقىمى: اۆستراليالىق «Lindian Resources» كومپانياسى استانادا تىركەلگەن «Silkway Metals» ەنشىلەس كاسىپورنى ارقىلى اقمولا وبلىسى، ستەپنوگورسك قالاسىنداعى «SARECO» (Summit Atom Rare Earth Company) وندىرىستىك كەشەنىن ساتىپ الۋدا. مامىلە قۇنى — 20 ميلليون اقش دوللارىنا جۋىق!
افريكادان — سارىارقاعا: ەڭ قىزىعى — بۇل زاۋىتتا افريكانىڭ مالاۆي مەملەكەتىندەگى كانگانكۋندە كەن ورنىنان جەتكىزىلەتىن موناتسيت كونتسەنتراتى وڭدەلەدى! جىلىنا 12,5 مىڭ توننا افريكالىق شيكىزات ستەپنوگورسككە تاسىمالدانىپ، مۇندا قوسىلعان قۇنى جوعارى سيرەك كەزدەسەتىن مەتالداردىڭ ارالاس كاربوناتى شىعارىلماق. وعان قوسا، ينۆەستورلار جەرگىلىكتى شيكىزات پەن قورلاردى دا پايدالانۋدى كوزدەپ وتىر.
زاۋىتتىڭ شىتىرمان تاريحى: 2010 جىلى «قازاتومونەركاسىپ» پەن جاپوندىق «Sumitomo» قۇرعان بۇل زاۋىت كەيىن «تاۋ-كەن سامۇرىققا»، 2019 جىلى رەسەيلىك «اتەك» كومپانياسىنا ءوتىپ كەتكەن ەدى. ال 2024 جىلى تابىسى 15 ەسەگە قۇلدىراپ، 57,6 ملن تەڭگە شىعىنمەن توقىراۋدىڭ از-اق الدىندا تۇرعان بولاتىن. ەندى، مىنە، اۆستراليالىق كاپيتال زاۋىتقا جاڭا دەم بەرگەلى وتىر! ءوندىرىستى 2026 جىلدىڭ 4-توقسانىندا ىسكە قوسۋ جوسپارلانعان.
بۇل بىزگە نە بەرەدى؟
سيرەك كەزدەسەتىن مەتالدار — قازىرگى ەلەكتروموبيلدەر، ميكروسحەمالار، جوعارى تەحنولوگيالار مەن اسكەري ونەركاسىپتىڭ «التىنى». قازاقستاننىڭ ازىرلەنگەن ونەركاسىپتىك ينفراقۇرىلىمى، تەمىرجولى مەن قولجەتىمدى رەسۋرستارى الەمدىك الىپتار ءۇشىن وتە ءتيىمدى وڭدەۋ حابىنا اينالىپ وتىر. بۇل — جاي عانا زاۋىت ساتۋ ەمەس، قازاقستاننىڭ جاھاندىق جەتكىزىلىم تىزبەگىندەگى ستراتەگيالىق ورنىن كۇشەيتەتىن ماڭىزدى قادام.
قازاقستاننىڭ سيرەك كەزدەسەتىن مەتالداردى وڭدەۋ بويىنشا ايماقتىق حابقا اينالۋ مۇمكىندىگى قانشالىقتى جوعارى؟
Abai.kz
