الماتىدا قازاقستان رەسپۋبليكاسى قۇرىلتايى دەپۋتاتتارىن سايلاۋ قارساڭىنداعى اقپاراتتىق ناۋقانعا قىزمەت كورسەتۋ جانە قالالىق سەرۆيستەر سالاسىندا ەڭبەك ەتەتىن جاستار دا قوسىلۋدا. كۇن سايىن مەگاپوليس كوشەلەرىندە جۇمىس ىستەيتىن كۋرەرلەر، موپەدشىلەر جانە باسقا دا جاس ماماندار ءوز قۇرداستارىن بەيجاي قالماي، ءوز تاڭداۋىنا جاۋاپكەرشىلىكپەن قاراۋعا شاقىرادى.

باستامانى العاشقىلاردىڭ ءبىرى بولىپ الماتىداعى جاستار موتوقوعامداستىعىنىڭ وكىلدەرى قولدادى. 200-دەن استام جاس موپەدشى تاقىرىپتىق بەينەروليكتەر تۇسىرۋگە قاتىسىپ، قالا تۇرعىندارىنا ۇندەۋ جولدادى. نەگىزگى وي — ءوز ءىس-ارەكەتىنە دە، ەلدىڭ بولاشاعىنا دا جەكە جاۋاپكەرشىلىكپەن قاراۋ.

«ءبىز كۇن سايىن قوزعالىستامىز جانە جولدا دا، ومىردە دە جاۋاپكەرشىلىكتىڭ قانشالىقتى ماڭىزدى ەكەنىن جاقسى تۇسىنەمىز. سوندىقتان شەت قالماي، سانالى تاڭداۋ جاساۋ ماڭىزدى دەپ ەسەپتەيمىز. بولاشاق ارقايسىمىزعا بايلانىستى»، — دەدى الماتىداعى جاس موپەدشىلەر قاۋىمداستىعىنىڭ بەلسەندى قاتىسۋشىلارىنىڭ ءبىرى قۋانىش بيجىگىتوۆ.

اقپاراتتىق باستاماعا جاس كۋرەرلەر دە قوسىلدى. ولاردىڭ كوپشىلىگى ءۇشىن موپەد، ۆەلوسيپەد نەمەسە كولىكتىڭ باسقا ءتۇرى جاي عانا ءجۇرىپ-تۇرۋ قۇرالى ەمەس، كۇندەلىكتى جۇمىسىنىڭ ءبىر بولىگى. ولار ۇلكەن قالانىڭ ىرعاعىن جاقسى بىلەدى، كۇن سايىن جۇزدەگەن تۇرعىنمەن قارىم-قاتىناس جاسايدى جانە قالالىق جاستاردىڭ ەڭ ءموبيلدى توپتارىنىڭ ءبىرىن قۇرايدى.

باستاماعا قاتىسۋشىلار بەلسەندى ازاماتتىق ۇستانىمنىڭ ماماندىققا نەمەسە ەڭبەك سالاسىنا بايلانىستى ەمەس ەكەنىن اتاپ ءوتتى. جاس ادام كۋرەر بولىپ، قوعامدىق تاماقتانۋ، ساۋدا نەمەسە قىزمەت كورسەتۋ سالاسىندا جۇمىس ىستەۋى، ۋنيۆەرسيتەتتە وقۋى نەمەسە جەكە كاسىبىن دامىتۋى مۇمكىن — ەل ومىرىنە قاتىسۋ جانە ونىڭ بولاشاعىنا جاۋاپكەرشىلىكپەن قاراۋ بارلىعىن بىرىكتىرەدى.

«مەنىڭ ويىمشا، جاستاردىڭ سايلاۋعا قاتىسۋى ماڭىزدى، ويتكەنى بۇل — ەلدىڭ بولاشاعىنا ىقپال ەتۋ مۇمكىندىگى. ەگەر تاڭداۋ قۇقىعى بەرىلسە، ونى پايدالانۋ كەرەك، شەت قالماۋ قاجەت. ادامداردىڭ اقپاراتتاندىرىلعانى ماڭىزدى. قاراپايىم ويدى جەتكىزگىمىز كەلەدى: بەيجاي قالماڭىزدار، سايلاۋعا كەلىپ، ءوز تاڭداۋلارىڭىزدى جاساڭىزدار»، — دەدى جاس كۋرەرلەر قاۋىمداستىعىنىڭ وكىلى ءاليحان قاليەۆ.

بۇل باستاما الماتى جاستارىنىڭ ءتۇرلى توپتارىن قوعامدىق ومىرگە تارتۋعا باعىتتالعان اۋقىمدى جۇمىستىڭ ءبىر بولىگى بولدى. وعان جۇمىسشى ماماندىقتارىنىڭ وكىلدەرى، قىزمەت كورسەتۋ سالاسىنىڭ قىزمەتكەرلەرى، ستۋدەنتتەر، ۆولونتەرلەر، جاس عالىمدار، سپورتشىلار، شىعارماشىلىق جانە قالالىق قاۋىمداستىقتاردىڭ وكىلدەرى قوسىلۋدا.

مۇنداي فورمات ازاماتتىق جاۋاپكەرشىلىك تۋرالى تەك رەسمي الاڭداردا عانا ەمەس، قالا تۇرعىندارى كۇن سايىن كەزدەسەتىن ادامدار ارقىلى دا ايتۋعا مۇمكىندىك بەرەدى. كۋرەرلەر مەن موپەدشىلەر زاماناۋي قالالىق ورتانىڭ ءبىر بولىگىنە اينالدى. ولاردىڭ قوعامدىق باستامالارعا قاتىسۋى ازاماتتىق بەلسەندىلىكتىڭ ماماندىققا، الەۋمەتتىك مارتەبەگە نەمەسە ءومىر سالتىنا قاراماستان جاستاردى بىرىكتىرە الاتىنىن كورسەتەدى.

ناۋقانعا قاتىسۋشىلار الماتىلىق جاستاردى الداعى قۇرىلتاي دەپۋتاتتارىن سايلاۋعا قاتىسىپ، ءوز تاڭداۋىن سانالى تۇردە جاساۋعا شاقىردى.

Abai.kz