قازۇۋ-دىڭ «ينەمەن قۇدىق قازعان» ستۋدەنتتەردى ءبىلىم قازىناسىن ىزدەپ كەلىپ، بازىناعا جولىقتى. داۋدىڭ باسى وقۋدىڭ تولەم قاراجاتى. ەلدىڭ بىلدەي ءبىلىم ورداسى قازۇۋ-دىڭ 191 ستۋدەنتىنەن كەلىپ تۇسكەن ارىز ناتيجەسىندە الدىڭعى اپتادا وقۋ ورداسىنىڭ 3 ەسەپشىسى قاماۋعا الىندى. ولارعا ستۋدەنتتەر وقۋعا تولەگەن قاراجاتتان 120 ميلليون تەڭگەنى جىمقىردى دەپ ايىپ تاعىلۋدا. ستۋدەنتتەردىڭ ايتۋىنشا، ۋنيۆەرسيتەت باسشىلىعى 100-دەن استام ستۋدەنتكە وقۋدىڭ قاراجاتىن تولەمەسە ديپلوم بەرمەيتىنى تۋرالى ايتقان. ال ستۋدەنتتەر اقشا تولەگەندەرىن ايتىپ، زار قاعادى. ال، ءىس قوزعاعان پوليتسەيلەر تەرگەۋدىڭ قۇپيالىعىنا بايلانىستى قانداي دا ءبىر ناقتى اقپارات جاريالامادى.

ادىلدىك ىزدەپ، ارىز ايتقان ستۋدەنتتەر ءال-فارابي اتىنداعى قازاق ۇلتتىق ۋنيۆەرسيتەتىنە ميلليونداپ اقشا قارىز. ءبىرىنىڭ 4 جىل بويى تولەگەن وقۋ اقىسى جوعالىپ كەتسە، ەندى ءبىرىنىڭ كارتوچكاسىنا ەسەپشىلەر الداپ اقشا قۇيىپ، ارتىنشا وزدەرى سول قاراجاتتى شەشكەندەرى ءۇشىن جاۋاپقا تارتىلعان.

 «الماتى» ارناسىنىڭ تىلشىلەرى وقۋ ورداسىنىڭ باسشىلىعى قانداي دا ءبىر تۇسىنىكتەمە بەرۋدەن باس تارتىپ، اۋەلدە تىلشىلەر مەن ستۋدەنتتەردەن جاسىرىنعانىن جازادى. ولار كەڭسەلەرىنىڭ ەسىگىن ىشتەن ءىلىپ، بۇقپانتايلاعان. سوڭىندا، بوي بەرمەي، اقىرى باسشىلىقپەن جۇزدەسكەن ستۋدەنتتەرگە ۋنيۆەرسيتەت رەكتورىنىڭ قاباعى قاتۋلى ورىنباسارى ستۋدەنتتەردىڭ ءوزىن «تۇتقىندالعان ەسەپشىلەردىڭ سىبايلاسى» دەپ ايىپتايدى. سونداي-اق  اقشاسى جوعالعان بىلىمگەرلەر 200 ەمەس، بار-جوعى 10 ستۋدەنت دەپ وتىر.

«وكىنىشكە قاراي كەلىسىم-شارتتاعى شارتتار ورىندالمايتىن بولسا، ءبىز ءوز تاراپىمىزدان ەشقانداي ديپلوم بەرە المايمىز. تولىققاندى تولەۋ كەرەك»، – دەپ اقشالارىن قايتادان تولىق وتەمەگەنگە ديپلوم بەرىلمەيتىنىن كەسىپ ايتتى قازۇۋ وقۋ-ءىسى جونىندەگى پرورەكتورى دارحان احمەت-زاكي.

ال، بۇل ىسكە بايلانىستى ءبىلىم جانە عىلىم ۆيتسە-ءمينيسترى تاحير بالىقباەۆ:

"قازىرگى ۋاقىتتا ۋنيۆەرسيتەتتىڭ باسشىلىعى وتكەن جىلى مەكەمەنىڭ ەكونوميكالىق قىزمەتىنىڭ، بۋحگالتەريانىڭ كەيبىر جۇمىسشىلارىنىڭ ءوز قىزمەتتىك بابىن پايدالانا وتىرىپ، زاڭسىز اقشا الا باستاعانىن انىقتادى. بۇگىندە تەرگەۋ ءجۇرىپ جاتىر، ستۋدەنتتەرمەن جۇمىس جاسالىپ جاتىر، بۇل جاعدايدى شەشىلەدى. تەرگەۋ اياقتالعاندا بىلەمىز. قازاق ۇلتتىق ۋنيۆەرسيتەتىمىز رەيتينگتەر باعالاناتىن حالىقارالىق بايلانىستارى، عىلىمي مۇمكىنشىلىگى، مۇعالىمدەرىنىڭ مۇمكىنشىلىگى جاعىنان ەلدەگى ەڭ ۇزدىك وقۋ ورىندارىنىڭ ءبىرى بولىپ سانالادى، سوندىقتان بۇل جاعداي وقۋ ورنىنىڭ ابىرويىنا ايتارلىقتاي نۇقسان كەلتىرمەۋى كەرەك. قازىرگى ۋاقىتتا زاڭدى بۇزدى ما، جوق پا، تۇجىرىم ايتپايمىز، تەرگەۋ ءجۇرىپ جاتىر. بىراق بۇل جاعداي وقۋ پروتسەسىنە، قابىلداۋ پروتسەسىنە اسەر ەتپەيدى", - دەپ تۇسىنىكتەمە بەردى، ءارى تەرگەۋ اياقتالعانىنان كەيىن بەلگىلى ءبىر كەڭەس پەن شارالاردىڭ قابىلداناتىنىن ايتتى.

ءىستىڭ شيكىلىگىنىڭ شەتى 2014 جىلدىڭ سوڭىندا بىلىنە باستاعان. ءباسپاسوز قىزمەتىنىڭ مالىمەتىنشە، ەسەپشىلەر 2008 جىلدان باستاپ قاراجاتتاردى جىمقىرۋمەن بايلانىستى زاڭعا قايشى الاياقتىق ارەكەتتەر جاساپ كەلگەن.

ەستەرىڭىزگە سالساق، 2008-2010 جىلدارى ۋنيۆەرسيتەت باسشىلىعىنا باقىتجان جۇماعۇلوۆ كەلگەن ەدى. كەيىن ءبىلىم ءمينيسترى بولعان باقىتجان جۇماعۇلوۆ، ورىنباسارى شاياحمەتوۆ «1 ميلليارد تەڭگە جىمقىردى» ايىبىمەن ءىستى بولعان سوڭ قىزمەتىنەن كەتكەن بولاتىن. قازۇۋ-دەگى باتپان قۇيرىق قىلمىستىڭ تامىرى جۇماعۇلوۆ رەكتور بولعان تۇسقا ساي كەلەدى.

ءىستىڭ انىق-قانىعىن قۇزىرلى ورگاندار انىقتاي جاتار. ءبىز وقىرمانعا: «ەل بولىپ، ەتەگىمىزدى جيعالى ەڭبەكتەگەن بالادان، كەمسەڭدەگەن قارياعا دەيىن ۇرى بوپ كەتتىك پە؟» دەگەن ساۋال تاستايمىز. الپاۋىت كومپانيالاردى بىلاي قويعاندا ەڭ زيالى دەگەن ءبىلىم ورداسى، جازۋشىلار وداعى، مەكتەپ، باسپا ... جەمقورلىقپەن باسى شاتىلماعان بىردە-ءبىر مەكەمە قالماي بارادى. بيلىكتى سىناۋ، باسشىنى كىنالاۋ بارلىق جەردە بار ءۇردىس. ال ميلليونداعان حالىقتىڭ سوعان جول بەرۋى، مەكەمە، باسشى بىتكەندى جەمقور اتاندىرىپ، پارامەن ءىستى شەشۋگە حالىقتىڭ پەيىلدى بوپ تۇراتىنى قالاي؟ حالىقتىڭ اقشاسى كوپ پە، الدە ءبىلىمى جوق پا؟ ۇرى بىتكەنگە تاڭداي قاعا بەرگەنشە، ۇياتىمىزدى ءبىر ءسات تارازىلاپ كورسەك ەكەن.

Abai.kz