قازاق جۇرتىنىڭ استاناسىنا كوپتەن بەرى ات باسىن تىرەگەنىم - بيىلعى جىلدىڭ قاڭتارىنىڭ باسى...
مۇگەدەك ۇلىم مۇحتارىمدى استاناداعى رەسپۋبليكالىق بالالاردى وڭالتۋ ورتالىعىنا ەمدەۋگە الىپ كەلدىم.

قىس قاقاپ تۇر. قار مول. جول كۇرەسىن...

قالانىڭ ءارى ەسكى، ءارى جاڭا اكىمىنىڭ تياناقتىلىعىنىڭ تابى ما، الدە، ءوز ءىسىن تەرەڭ مەڭگەرگەن شەبەردىڭ قولىنىڭ كيەسى مە، ايتەۋىر، جەلى ىزعارلى قالا جىپ-جيناقى قىزدىڭ ۇيىندەي ءۇلبىرىپ تۇر...

الىستان مەنمۇندالاعان مۇنارلى اقوردانىڭ دا ايبارى اسقاق...

باس قالامىزدىڭ باستى قۇرىلىسشىسى ءھام ساليقالى ساۋلەتشىسى ەلباسىمىز: «مەن كەڭ دالا توسىمەن ەسىلە اعىپ جاتقان ەسىلدىڭ بۇلكىلسىز سۋى بەتىنە قازاقستاندىق كۇننىڭ قالاي ساۋلە شاشىپ شاعىلىسقانىن كورەمىن. ول قالا شەگىندەگى ادام قولىمەن جاسالعان جاڭا وزەن ارناسى سۋىندا شومىلىپ جۇرەدى... كەي كەزدەرى مەن تۇنگى استانا كوشەلەرىندە كولىكپەن نەمەسە جاياۋ جۇرەمىن. اركەز مەنىڭ جۇرەگىمدى ەلوردا ءۇشىن ماقتانىش سەزىمى كەرنەيدى. وزىمە – ءيا، ءبىز وسىنى جاسادىق دەيمىن!» - دەپ جازىپتى...

راسىندا، قازاق استاناسىنىڭ سىمباتتى ساۋلەتى مەن اسەم الەۋەتىنە ەرىكسىز كوز توقتاتىپ، كوڭىل توعايادى: الەمدەگى ەڭ ۇلكەن ساۋلەتتى حان شاتىرى، بولمىسى بيىك بايتەرەك، قىران قۇسى زەڭگىرگە زاۋلاعان «قازاق ەلى» مونۋمەنتى، بىرلىك پەن كەلىسىمنىڭ قۇتتى ورداسى بەيبىتشىلىك جانە كەلىسىم سارايى، اقوردانىڭ قوس وكپەسىنىڭ تىنىسىن اشقان ەسىلدىڭ ەرەن كوپىرلەرى، «استانا وپەرا»، «پيراميدا»، «ماڭگىلىك ەل» كەشەندەرى... ايتىپ تاۋىسا المايسىڭ...

جۇرتتىڭ ءبارى بىلەدى: قازاقتىڭ ەلورداسىنىڭ ساۋلەتىندە اتى ادامزاتقا ءماشھۇر ساۋلەت ونەرىنىڭ جامپوزدارى اعىلشىن نورمان فوستەرءدىڭ، جاپون كيسە كۋروكاۆانىڭ، يتاليان مانفرەدي نيكولەتتيءدىڭ الاقاندارىنىڭ ءىزى قالدى. «تۇركى الەمىنىڭ مادەني استاناسى» قۇرمەتتى اتاعىنىڭ ءوزى جەڭىل جاۋاپكەرشىلىك جۇكتەمەيدى...

ادىلبەك رىسكەلدىۇلى جاقسىبەكوۆ - استانانىڭ العاشقى كىرپىشىن قالاسقانداردىڭ بىرەگەيى. سەگىز جەلدىڭ ىزعارى وڭمەنىنەن وتسە دە، ورلىكپەن كۇندىز-ءتۇنى قالا سالعانداردىڭ كوشباسىندا دا ادەكەڭ تۇر...

حالقى 4 ەسەگە جۋىق، بالا تۋ كورسەتكىشى 2 ەسەگە وسكەن استانا قالاسىنىڭ الەۋمەتتىك الەۋەتى ادىلبەك جاقسىبەكوۆ قايتا سوعىپ، باسشى بولعالى ەداۋىر ەسەلەنىپ، دەنساۋلىق ساقتاۋ سالاسىنىڭ قۋاتتى كەشەنىنە اينالىپتى.

سىرقات ۇلىم مۇحتارىما شيپا ىزدەپ كەلگەن مەن، ەڭ الدىمەن، وسىنداي وراسان وزگە­رىس­تى انىق سەزىندىم. بىرىكتىرىلگەن جاڭا مەديتسينالىق كلاستەردى 6 زاماناۋي ەمحانالار: انا مەن بالانى قورعاۋدىڭ ۇلتتىق عىلىمي ورتالىعى، نەيروحيرۋرگيا عىلىمي ورتالىعى، دياگنوستيكالىق ورتالىق، بالالاردى وڭالتۋ ورتالىعى، ۇلتتىق عىلى­مي كارديوحيرۋرگيالىق ورتالىق، جەدەل مەديتسينالىق كومەك عىلىمي ورتالىعى قۇرىپتى. بالاعا قامقورلىق دەگەنىمىز - بولاشاققا قامقورلىق. بولاشاعىنىڭ قامىن بۇگىننەن كۇيىتتەگەن ەلدىڭ كەلەشەگى كۇنگەيلى بولادى...

ءوزى فۋتبول دەسە ىشكەن اسىن جەرگە قوياتىن قالانىڭ قازىرگى اكىمىنىڭ استانالىقتاردىڭ دەنساۋلىعىنا ايرىقشا كوڭىل بولەتىندىگى ايقىن كورىنىپ تۇر. سۋجاڭا سپورت عيماراتتارىنىڭ كەڭ جەلىسى مىناداي: «الاۋ» مۇز سپورتى سارايى، رەسپۋبليكالىق ۆەلوترەك، «قازاقستان» مەن «الاتاۋ» سپورت كەشەندەرى، «استانا-ارەنا» جابىق ستاديونى، ونداعان سپورت الاڭدارى، كلۋبتار مەن فيتنەس ورتالىقتارى ت.س.س. بۇعان قوسا، ەكولوگيالىق تازالىقتى ساقتاۋشى تەپلوۆوزدار، تىكۇشاقتار، ۆاگوندار، كۇن باتارەيالارىنىڭ مودۋلدەرىن شىعارا باستاعان استانا - جاڭا ونەركاسىپ سالالارىنىڭ نەگىزىن سالدى.

اۋا تۇنىق، تىنىس كەڭ بولۋى ءۇشىن ادەكەڭنىڭ باستاماسىمەن ساياباقتار مەن گۇلزارلاردىڭ، كوگالدى الاڭدار مەن سۋبۇركەكتەردىڭ كۇرت كوبەيگەنى دە زاڭدىلىق. ينۆەستيتسياسىنىڭ جالپى كولەمى 4 تريلليون تەڭگەدەن اسقان ەلوردانىڭ ەرتەڭى ەرەن.

«باتىستىڭ سىربازدىعى مەن شىعىستىڭ تەرەڭ رۋحاني داستۇرلەرىن بويىنا بەرىك سىڭىرگەن» (نۇرسۇلتان نازارباەۆ) استانا - ءسوز جوق، كۇللى جاڭاشىلدىق پەن يننوۆاتسيانىڭ جۇرەگى عانا ەمەس، ەلىمىزدىڭ ءىرى عىلىمي-ءبىلىم بەرۋ ورتالىعى بولىپ تابىلادى.

جاسامپاز ەلوردادا 70 مەملەكەتتىك، 12 مەملەكەتتىك ەمەس مەكتەپتەر; 78 مەملەكەتتىك، 60 مەملەكەتتىك ەمەس مەكتەپكە دەيىنگى مەكەمەلەر جۇمىس ىستەيدى. مۇلدەم جاڭا عىلىمي-ءبىلىم بەرۋ جۇيەسىنىڭ كوشباسشىسى نازارباەۆ ۋنيۆەرسيتەتى بوي كوتەردى.

قازاق استاناسىنىڭ ىرگەتاسىنا قالانعان العاشقى كىرپىشتەردى بىلەتىن ادىلبەك رىسكەلدىۇلى قالانىڭ جىلۋ كوممۋنيكاتسيالارى مەن ەلەكتر جەلىلەرىنىڭ قۋاتتارى ۇلعايتتى. ارنايى ەكونوميكالىق ايماقتار مەن تەحنوپاركتەر قالا ەكونوميكاسىنىڭ ءتۇرلى سەكتورلارىنا جوعارى تەحنولوگيالاردى ەنگىزۋگە ىقپال ەتىپ، ينفراقۇرىلىمداردى جاڭعىرتۋ مەن كەڭەيتۋگە جول اشتى.

قازاق جۇرتىنىڭ بايىرعى استانالارى مەن كونە قالالارىنىڭ سان عاسىرلىق شەجىرەسىن ەسكە سالاتىن اقمەشىت، ورىنبور، تۇركىستان، سارايشىق، ساۋران، سىعاناق، الماتى كوشەلەرى – ەلوردانى ەلىمىزدىڭ مادەني جانە رۋحاني ورتالىعى ەكەندىگىنە مەڭزەيدى.

اينالاسىن قاراعاي مەن شىرشا، قايىڭ مەن شەتەن قورعاپ-قورشالاپ، از ۋاقىتتىڭ ىشىندە ساۋلەتى مەن سالتاناتى جاراسقان استانا - قازاق ەلىن الەمدىك وركەندەۋدىڭ زاڭعار شىڭدارىنا جەتەلەيدى. ويتكەنى، باس قالانىڭ تىزگىنى قياعا سالسا - تارتىنباعان، جارعا ۇشىرسا - جارقىلداعان مىقتى مەملەكەتشىل تۇلعا ادىلبەك رىسكەلدىۇلى جاقسىبەكوۆءتىڭ قولىندا.

كانىگى قولدىڭ قۋاتى دەگەن وسى.

قاجىمۇقان عابدوللا

اbai.kz