تۇيە (تىشقان) سەنىپ (سيىر) بويىنا (بارىس),

قالعان (قويان) ۇمىت (ۇلۋ) جىلداردان (جىلان).

جاتپا (جىلقى) قاراپ (قوي), مويىما (مەشىن),

تايما (تاۋىق), يمەنىپ (يت) ءدىلماردان (دوڭىز).

كەلە جاتقان مەشىن جىلى ساتۋرن مەن يۋپيتەردىڭ ىقپالىندا بولادى دەيدى جۇلدىزناماشىلار. بۇل جىل ادام ومىرىنە ۇلكەن وزگەرىس اكەلەتىن جاڭالىقتارعا تولى بولماق. بىراق ەجەلگى قازاقتاردىڭ پايىمداۋىنشا، مەشىن جىلى – جايسىز جىل. بۇل جىلى بۇلىنشىلىك، ساتسىزدىكتەر مەن جاعىمسىز وقيعالاردىڭ كوپ بولۋى مۇمكىن. سول سەبەپتى بۇرىنعى قازاقتار مەشىن جىلىن قاۋىپ-قاتەرلەر جىلى دەپ، ودان ساقتانىپ وتىرعان.

ماسەلەن، قازاق دالاسىندا 1920 جىلى جۇت بولىپ، مال قىرىلىپ، بۇل جىل تاريحتا – «تاس مەشىن جىلى» دەپ اتالدى. 1931-32 جىلعى الاپات اشتىق تا مەشىن جىلى بولدى. ودان بۇرىن، اق وردا حاندىعى 1428 مەشىن جىلى قۇلادى. دەگەنمەن، مەشىن جىلى (1680) ءاز-تاۋكە حان تاققا وتىرىپ، ەل بيلەگەن.

ەسكە سالا كەتەيىك، بيىلعى مەشىن جىلىندا قازاق ءۇشىن دوڭگەلەك داتا دا، مەرەيلى مەرەكە دە كوپ: قازاقستان تاۋەلسىزدىگىنىڭ 25 جىلدىعى، الاشوردا وكىمەتىنىڭ 100 جىلدىعى، ءاليحان بوكەيحانوۆتىڭ 150 جىلدىعى...

ال ءبىز مەشىن جىلىندا ەلىمىز ءتۇرلى مەحنات پەن قايعى-قاتەردەن امان بولسىن دەگەن تىلەكپەن بارشا قازاقتىڭ كوڭىلىن «DAT-دولبارمەن» دەمەپ جىبەرگەندى ءجون كوردىك. جۇلدىزشىلار «ادام قاي جىلى تۋسا، مىنەز-قۇلقى سول جىلدىڭ ەگەسى سانالاتىن جانۋارعا ۇقساس كەلەدى» دەپ ايتادى. ونىڭ قانشالىقتى شىندىققا جاناساتىنىن ءوزىڭىز پايىمداپ كورىڭىز.

ەسكەرتە كەتەيىك، قازاق حالقىنىڭ ەجەلگى جىل قايىرۋ ەسەبى – شىعىس كۇنتىزبەسىنە سايكەس جاسالعان جۇلدىزناما بويىنشا، جاڭا جىل اقپاننىڭ 7-سىندە كىرەدى.

تىشقان

تىشقاندار ءادىل، كەڭ پەيىلدى، جومارت جۇرەكتى جانە ءوز-ءوزىن باسقارا بىلەدى. اركىممەن ءتىل تابىسا بىلەتىن قاسيەتىنىڭ ارقاسىندا، ولاردىڭ تانىس-بىلىستەرى دە كوپ. بىراق ولار ناعىز دوسقا مۇقتاج. العا قويعان ماقساتتارىنا جەتپەي تىنبايتىن تاباندىلار. ولاردان جاقسى ساۋداگەر، جازۋشى، سوت قىزمەتكەرى نەمەسە پۋبليتسيست شىعۋى مۇمكىن. ولار ءۇشىن 2016 جىل – «جەتى رەت ولشەپ، ءبىر رەت كەسەتىن»، ءار ىسكە ەرەكشە سابىرلىقپەن قارايتىن جىل. ادەتتەگى تياناقتىلىقتان تايماسا، تىشقاندار ءۇشىن مەشىن جىلى ۇلكەن جەتىستىكتەر مەرزىمى بولادى. جەكە ومىرىندە جىلدىڭ ءساۋىر، شىلدە جانە قىركۇيەك ايلارى تابىستى بولماق.

تىشقاندار مەشىن جىلىندا ارتىق ۋايىمسىز، توقشىلىق پەن تۇراقتىلىقتا ءومىر سۇرەدى. دەسە دە، ارتىق شىعىنعا ۇشىراماۋدىڭ جولىن ءبىلىپ، ءار قادامىنا مەيلىنشە مۇقيات بولعانى ءجون. بۇل جىلى قىزمەتىنىڭ ءوسۋ مۇمكىندىگى مول. ال ءومىر اعىسى بارلىق سالادا تەك جاعىمدى جاڭالىققا تولى بولسىن دەسە، ولار جاقىندارىنا، دوس-جاراندارىنا مەيلىنشە كوپ ۋاقىت بولۋگە تىرىسۋى ءتيىس.

سيىر

سيىرلار – العان بەتىنەن قايتپايتىن قىڭىر، بىراق ءوز-وزىنە وتە سەنىمدى ادامدار. بەينەتقور، ۇنەمى كوش باسىنان كورىنۋدى قالايدى. سىرتتاي قاراعان ادامعا سابىرلى بوپ كورىنۋى مۇمكىن. بىراق اشۋلانعاندا جان-جاعىن جايپاپ جىبەرۋدەن تايىنبايدى. مۇمكىندىگى بولسا، سيىردى سەبەپ-سالدارسىز مازالاماعان دۇرىس.

كەلە جاتقان جاڭا جىل زەڭگى بابا تۇقىمى ءۇشىن وتە ماڭىزدى. كوپتەن بەرى قوردالانىپ قالعان سۇراقتار شەشىلىپ، جۇمىسىندا جەتىستىككە جول اشىلادى. جۇلدىزشىلاردىڭ بولجامى بويىنشا، كەلەر جىلدا كۇتپەگەن جەردەن ۇلكەن ولجاعا كەنەلەدى. كوپتەن كۇتكەن ماراپاتتاۋ ءساتى دە تۋادى. بىراق وزىمەن باقتالاس ادامداردان ساق بولعانى ءجون: جەڭ ىشىندە جۇدىرىق جاسىرعاندار وڭتايلى ءساتتى پايدالانىپ، سيىردىڭ ءمۇيىزىن قاعىپ الۋعا ارەكەت جاساپ باعادى.

دەنساۋلىققا كوپ ءمان بەرۋ كەرەك بولادى. رەتى كەلسە، جىلدىڭ ءساۋىر نەمەسە قازان ايلارىندا دەمالىسقا شىعىپ، ءتىپتى الدىن الا اۋرۋحانالىق ەم-دوم شارالارىن جاساپ العانى دۇرىس.

بارىس

بارىستىڭ مەيىرىمدىلىگىندە شەك جوق. بىراق قۇدايدان باسقا ەشكىمنەن قورىقپايتىنداردىڭ قاتارىنان. تەرەڭنەن ويلاي بىلەدى، سەزىمتال جانە كوڭىل-كۇيدىڭ ادامى. بىراق بارىستاردا ەشكىمگە سەنبەيتىن سەكەمشىل مىنەز باسىم.

بارىستار ءۇشىن بۇل جىل بيىك بەلەستەرگە دە، كىشىگىرىم جەڭىلىستەرگە دە تولى بولادى. كەلەر جىلى ولار جاڭا كولىككە نەمەسە جايلى پاتەرگە يە بولۋى ابدەن مۇمكىن. تامىز جانە قىركۇيەك ايلارىنىڭ بىرىندە پايدا بولعان جاڭا تانىسى جاقسى جوبا ۇسىنۋى مۇمكىن. بۇل مۇمكىندىكتى باتىل پايدالانا بىلگەنى ۇلكەن تابىسقا باستايتىن جول اشۋى ىقتيمال.

بارىستار قولىنان بىرنارسە كەلمەسە، كوڭىل كۇيى ءتۇسىپ، كۇيزەلىسكە تەز ۇشىرايدى. مەشىن جىلىندا ونداي قايتالاناتىن ساتتەر تاپ بولعان جاعدايدا، بارىستىڭ قايسارلىعىن ەسكە الۋ كەرەك. ولار مايمىلدىڭ كەز كەلگەن سايقىمازاعىنا توتەپ بەرەتىن مىنەزى ارقىلى كۇلكىلى جاعدايدان ابىرويمەن شىعادى. لوتورەيادان ۇتىس شىعادى دەپ دامەلەنۋدىڭ قاجەتى جوق: بارلىق تابىس بارىستارعا تەك تاباندى ەڭبەك ارقىلى عانا كەلەدى. تابىستىڭ ءساتى كۇزدىڭ سوڭىنا تامان تۋادى.

قويان

قويان جاقسى ءسوزدىڭ قادىرىن بىلەدى، تالانتتى، ۇستامدى، تىنىش، تالعامى بيىك. شەشىم قابىلداۋعا كەلگەندە اسىعىپ-اپتىقپايدى. قويان جىلى تۋعان بيزنەسمەن، زاڭگەر، ديپلومات ءۇشىن تابىستىڭ كەنى كەزىگەدى.

قوياندار ءۇشىن 2016 جىلى بويىنداعى بۇرىن-سوڭدى بىلىنە بەرمەگەن دارىنى اشىلاتىن كەز تۋادى. سونداي-اق ومىرىندە كۇتپەگەن كۇرت وزگەرىستەر بولۋى دا مۇمكىن. مىسالى، تۇرعىلىقتى جەرى وزگەرىپ نەمەسە جۇمىس ورىنى الماسۋى ىقتيمال. جەكە ومىرىندە قاڭتار، اقپان جانە قازان نەمەسە قاراشا ايلارىندا وڭ وزگەرىستەر بايقالادى.

مەشىن جىلى بۇل جۇلدىزدىڭ تابىس كىلتى تەك وزىنە عانا بايلانىستى. بىراق تىم اسىرەشىلدىككە بارماي، كەز كەلگەن جاعدايدا سابىرلى، ۇستامدى بولعانى ءجون. مەشىن «قورقاق» قويانداردىڭ جانىنان تابىلىپ، كومەك قولىن سوزاتىن ەرەكشە جانمەن تابىستىرادى. بۇل كەزدە سەزىمگە تىم بەرىلمەي، اق پەن قارانى اجىراتا ءبىلۋى كەرەك. قوياننىڭ سەكەمشىلدىگى ناتيجەسىندە بۇل جىلى دوس-جاراندار مەن ارىپتەستەر قاتارى سيرەۋى مۇمكىن. بىراق مۇندايدى ۋاقىتتىڭ ەلەگىنەن وتكەن جاعداي دەپ باعالاۋ قاجەت.

ۇلۋ

ۇلۋ وزگەلەردەن ومىرلىك كۇش-قۋاتىمەن، دەنساۋلىعى مەن قابىلەت-قارىمىنىڭ جاڭا جاعدايعا تەز بەيىمدەلۋىمەن ەرەكشەلەنەدى. بىراق بۇرىنعى بىربەتكەي، كەز كەلگەن كەلەڭسىزدىكتى بىردەن كوڭىلىنە الىپ قالاتىن قىزبا مىنەزدى مەشىن-مايمىل كوتەرە بەرمەيدى. سەبەبى بۇل مەشىننىڭ قوعامدىق ورتاداعى ىقپالى كۇشتى بولادى. ادەتتە ۇلۋ تابيعاتىنان قانشالىقتى شابان بولسا دا، اسىرەسە كارەرا مەن قىزمەت جولىندا ۇشقىر كەلەدى.

ۇلۋلار ءۇشىن مەشىن جىلى ساتتىلىككە تولى بولماق. اسىرەسە قىزمەتى شىعارماشىلىققا جاقىن ادامدار ءۇشىن جەتىستىككە قول جەتكىزۋ مۇمكىندىگى وسەدى. جەكە ومىرىندە قاراشا مەن جەلتوقسان ايلارىندا وزگەرىستەر بولىپ قالۋى ىقتيمال. جىل بويعى كۇتكەن قارجىلىق ماسەلەلەرى دە وڭتايلى شەشىلەدى.

ولاردى جاڭا ادامدارمەن كەزدەسۋ، قىزىقتى ساياحات كۇتىپ تۇر. دەسە دە، بارلىعىنا بىردەي كۇش تە، ۋاقىت تا جەتپەيتىنىن ەسكەرىپ، العا قويىلعان ناقتى ماقساتقا عانا ۇمتىلۋ قاجەت بولادى. ۇساق-تۇيەككە كوڭىل ءبولۋ – ۇلۋدىڭ قۋاتىن جەپ قويادى.

جىلان

جىلان – ءوزىنىڭ تاجىريبەسىنە، اقىلىنا عانا سۇيەنىپ، كوزىمەن كورگەنىنە عانا سەنەتىن ادامدار. ول وزگەنىڭ قاتەسىنەن ساباق الۋعا اسا قۇشتار ەمەس. دەگەنمەن، ادام تاني الادى. جولى بولعىشتىعى سونداي، قانشا كەرەك – سونشا اقشا تابۋعا قاۋقارى جەتەدى.

بۇل جىلى جىلان ۇلكەن جاۋاپكەرشىلىكتەن وتەدى. ونى سىرتتان سىنايتىندار كوپ بولادى. وتباسى مەن ءۇي-تۇرمىسىنىڭ بەرەكەسى – تەك قانا ءوزىنىڭ قاجىر-قايراتىنا عانا بايلانىستى.

جىلانداردىڭ جانىندا ەكىنشى جارتىسى بولماسا، ولار مەشىن جىلىندا مىندەتتى تۇردە ءوزىنىڭ سۇيىكتىسىن كەزدەستىرەدى. ال وتباسىلى جىلاندارعا كوپتەن بەرى تىنىشتىق بەرمەي جۇرگەن – نەسيە، تۇرعىن ءۇي، الەۋمەتتىك پروبلەمالار، تۇرمىستىق كيكىلجىڭدەر ءوز رەتىمەن شەشىمىن تابادى. تەك مايمىلدىڭ الدامشى قۋلىعىنا ەرىپ كەتپەۋ كەرەك.

جاڭا جىلدا بۇل جۇلدىز وكىلدەرى ماتەريالدىق قاجەتتىلىكتەرگە مۇقتاج بولمايدى. دەمەك، داعدارىستان، قارجىلىق قىسپاقتان قورقۋدىڭ قاجەتى جوق. بىراق بۇيىرتقان نەسىبەنى ۇنەمدى جۇمساي ءبىلۋ كەرەك.

جىلقى

 جىلقىعا ءتان كۇش-قۋاتى بويىندا تاسىپ تۇرعان بۇل جۇلدىزدىڭ وكىلدەرى ءۇشىن مەشىننىڭ بەرەرى كوپ. ادامداردى تەز باۋراپ الاتىن قاسيەتى ارقاسىندا ولار كوپتەن كۇتكەن جاڭا جوبالارىنا ارىپتەستەر تابا الادى. ەشكىمگە تاۋەلدى بولعىسى جوق، بىرەۋدىڭ اقىلىنا دا مۇقتاج ەمەس جاڭا جىلدىڭ بەرەر سىيى مول. كەلەر جىلى ومىرىنە كەرى اسەرىن تيگىزەتىن ىستەر مەن ادامداردان الشاق بولسا، جىلقىعا كەزىگەر كەدەرگى بولمايدى. ءوز مۇددەسى ءۇشىن ايانباي ەڭبەك ەتسە، بيىك اعاشتىڭ باسىنداعى جەمىستى مايمىلدىڭ ءوزى اكەلىپ بەرەدى. بىراق سول جەمىستى باسقالارمەن دە بولىسە ءبىلۋ كەرەك. نەسىبەنىڭ ءبارىن باۋىرىنا باسىپ الۋ – كەلەر كۇننىڭ بەرەرىن ازايتادى.

مەشىن جىلىندا جىلقىعا ءبىرىنشى ورىنعا جەكە باستىڭ ماسەلەسىن قويۋدىڭ قاجەتى جوق. بارلىق تابىس ولارعا كوپپەن بىرگە كەلەدى. ال ەگەر قانداي دا ءبىر كەزدەيسوق بايلانىستار، قارىم-قاتىناستار بولسا، ونىڭ ءبارىن ۇزەتىن كەز كەلدى، ايتپەسە مەشىننىڭ الداۋىنا ءتۇسىپ قالادى.

قوي

قوي جىلى تۋعاندار اق كوڭىل، جايدارى مىنەزدى، وتە تالانتتى. ونىڭ ۇستىنە كەرىتارتپالىعى تاعى بار. جوعارى تالعام يەسى، ونەردىڭ ءار تۇرىنە يكەمدى. ءوزىنىڭ ماتەريالدىق بايلىعى اسىپ-تاسىپ جاتپاسا دا، جوق-جىتىكتى جارىلقاپ، جاقسى سوزبەن بولسا دا، جانىنا دەمەۋ بولۋعا تىرىسادى.

قوڭىر مىنەزدى قوي ءۇشىن بۇل جىل وڭىنان باستالعالى تۇر. كۇزدىڭ العاشقى ايلارىنا دەيىن ول يۋپيتەردىڭ ىقپالىندا بولادى. ال يۋپيتەر قويدى تەك قانا جەتىستىككە جەتەلەيدى. جاز ايىندا كوڭىلىنەن شىقپايتىن جابىرقاۋ جاعدايلار بولۋى مۇمكىن.

دەگەنمەن، سابىرلىق پەن اقىلدىڭ ارقاسىندا قوي بارلىق قيىندىقتاردان وڭاي شىعادى. جەكە ءومىرىن ناقسۇيەر سۇلۋدىڭ جىلۋى مەن شاپاعاتى نۇرعا بولەۋى ابدەن مۇمكىن.

بىراق قوي ءۇشىن مەشىن جىلى وزگەرىستەر ۋاقىتى بولارىن قاپەردەن شىعارماۋ كەرەك. اسىرەسە دەنساۋلىق جاعدايىنداعى وزگەرىستەرگە اسا ءمان بەرۋى كەرەك. جاز ايلارىندا شيپاجايدان العان كۇش-قۋاتى جاڭا تالپىنىستارعا جەتەلەيدى. ءتۇرلى وقيعالار تولقىنىنا تاپ بولسا دا، كەز كەلگەن جاعدايدان جەڭىمپاز بولىپ شىعۋعا مەشىننىڭ ءوزى جاردەم جاسايدى.

مەشىن

بۇل جۇلدىزدىڭ يەسى بۇگىن ايتقانىن ەرتەڭ-اق ويىنان شىعاراتىن نەمەسە ۋادەنىڭ سوڭىن ازىلگە اۋدارىپ جىبەرەتىن ءوز مەشىنىنەن اباي بولۋى كەرەك. جولى بولعىش قاسيەتى مەن جوقتان باردى قۇراستىرۋ بەيىمىن مايمىل تارتىپ الۋى مۇمكىن. جەكە ءومىرى مەن تۇرمىسىندا كوكتەم ايلارى جاقسى جاڭالىقتار اكەلەدى. بيىل باستاعان جوبالارى مەشىن جىلىندا تولىعىمەن جۇزەگە اسادى.

مەملەكەتتىك نەمەسە جالدامالى قىزمەتى ەلەۋسىز قالمايدى. سىيلىقتار مەن ماراپاتقا كەنەلەر جىلى – ناق وسى مەشىن. تابار تابىسى جۇمسالار شىعىنىنان الدەقايدا مول بولادى. بىراق نەسىبەسىنە كوز الارتقان مەشىننىڭ ساۋىق-سايرانىنان، بوس ىر-دۋىنان اباي بولۋ كەرەك.

دەسە دە، تىم جۇمىسباستىلىققا سالىنىپ، جەكە ءومىرىن، وتباسىن ەستەن شىعارىپ الماعانى ءجون. ويتكەنى ءدال مەشىن جىلى جالعىزباستى مايمىلدىڭ ءازازىلى كۇشتى بولادى. سىلانىپ، تارانىپ جۇرەتىن بويداق مايمىلدان ساق بولۋ كەرەك. جاڭا جىلدا ساياحاتقا، قىزىقتى ساپارعا اتتانۋى عاجاپ ەمەس. ونداي مۇمكىندىك تۋا قالسا، ويلانىپ جاتۋدىڭ قاجەتى جوق: سەنىمدى سەرىكتەرمەن بىرگە جول ءجۇرىپ كەتكەن ابزال بولادى.

تاۋىق

تاۋىقتار – اۋزىن اشسا، ارعى جاعىنان جۇرەگى كورىنىپ تۇراتىن اقكوڭىل ادامدار. ەڭبەكسۇيگىش، باتىل. ارنەگە اۋەسقويلىعى دا باسىم كەلەدى. جۇرتتىڭ نازارىندا بولعاندى، ءوزىن ماقتاعاندى جاقسى كورەدى. ەشكىمگە سەنبەيدى، تەك ءوز دەگەنىمەن جۇرەدى.

مەشىن جىلعى تاۋىقتار تاپقان-تايانعانىن بەيبەرەكەت جۇمساپ، اقىر سوڭىندا اقشاسىنىڭ قايدا كەتكەنىن بىلمەي قالماس ءۇشىن، ءبىر شوقىپ، ەكى قاراۋعا تۋرا كەلەدى. تۋعان-تۋىسقا جاردەم جاساۋدان باسقا ەشكىمگە قارىز بەرۋگە بولمايدى.

نەپتۋننىڭ ىقپالىندا بولاتىن تاۋىقتار ءۇشىن بۇل جىل وتە تابىستى بولادى. سەبەبى مەشىن جىلىندا نەپتۋن كۇننىڭ كوزىنە جاقىنداي تۇسەدى. جۇمىسى كۇز ايلارىندا ورلەپ، جىل سوڭىندا ۇلكەن ولجاعا كەنەلەدى. بىراق، قولدا باردى باعالاي بىلگەنى ءجون. ايتپەسە، بارىنان ايرىلىپ قالۋى عاجاپ ەمەس.

جاڭادان ءۇي سالۋ قاجەت بولسا نەمەسە جاڭا جوبانى باستاۋ ويىندا جۇرسە، تاۋىققا مەشىننەن اسقان قولداۋشى تابىلمايدى. بۇگىنگى جۇمىرتقا – ەرتەڭگى بالاپان ەكەنىن ۇمىتپاعانى ابزال.

يت

يت – ادىلدىكتى سۇيەدى، ءوزىنىڭ قۇقىعى ءۇشىن كۇرەسۋگە بار كۇشىن سارپ ەتەدى. ونى ماتەريالدىق بايلىق قىزىقتىرا بەرمەيدى. قاتتى قاجەت بولىپ بارا جاتسا، جەردەن قازسا دا، قاراجات تابادى. باسقالارعا ءمىن تاعىپ، سىن ايتۋعا بەيىمدىگى جانە بار. بۇل جىلى دۇنيەگە كەلگەندەردىڭ اراسىندا مۇعالىمدەر مەن بيزنەسمەندەر كوپتەپ كەزدەسەدى.

جاڭا جىلدا يتتەر «قورىعان جەرگە اۋەس بولادى»: مەشىن باۋىرىنا باسىپ العان نەسىبەدەن (ماسەلەن – تەندەردەن) ۇلەس الۋعا ۇمتىلادى. جانە ول تالپىنىسى ناتيجەسىز بولمايدى: جىلىكتىڭ مايلى جاعى بۇيىرادى. قولىنا العان كەز كەلگەن ىستە تابىس پەن جەڭىس يتتەر جاعىندا بولادى. مەشىن ولاردى «يت تىرلىكتەن» قۇتقارادى.

بىراق سول نەسىبەنى يتشە شاشۋعا بولمايدى. سول ءۇشىن بىرەۋلەرمەن ىرىلداسۋدىڭ تاعى دا قاجەتى جوق. ايتاقتاۋعا ەرىپ، جاقىن اعايىندارمەن ءتۇس شايىسۋدان ساق بولعانى دۇرىس. مەشىن جىلىندا يت كوپتەگەن جاڭا دوستار كەزدەستىرىپ، ءاردايىم باسقا جۇلدىزداردىڭ نازارىندا بولادى. سوندىقتان مەشىن يتپەن دوس بولۋعا اسىعادى.

دوڭىز

دوڭىزعا اركەز ارقا سۇيەۋگە بولادى. جاقسى سەرىكتەس. ۇلكەن اقىلدىڭ يەسى. ءبىلىم الۋعا تالپىنىسى جوعارى بولعانىمەن، ۇياڭ مىنەزىنىڭ كەسىرىنەن كوپ نارسەدەن قۇر قالۋى مۇمكىن. از سويلەپ، كەز كەلگەن ماسەلەنى اقىلمەن شەشىپ ۇيرەنگەن. ۇرىس-كەرىس دەگەندى ۇناتپايدى. دوستارى ساۋساقپەن عانا سانارلىقتاي. بىراق سول از عانا دوسىنا ادالدىعى – ونىڭ ەڭ ۇلكەن ولجاسى. بۇرىن سىرت اينالىپ كەتكەن دوستارى دوڭىزعا جاقىن جۇرۋگە زار بولادى.

اشا تۇياقتى جانۋار ءۇشىن مەشىن جىلى وسىعان دەيىن اتقارىلىپ كەلگەن ەڭبەكتىڭ جەمىسىن كورۋگە ارنالعانداي. الدىنا قويعان ماقساتتارى اسىرەسە كوكتەم ايىندا ەرەكشە جەڭىلدىكپەن ورىندالادى.

مەشىن جىلىندا ماقساتىن بيىك قويعان سايىن، وعان جەتۋ جولى دا جاقىنداي تۇسپەك. جاڭا جىلدا ارمان-قيالعا بەرىلگىش دوڭىزداردىڭ ايى وڭىنان تۋىپ، ءبىراز ارمانىنا قول جەتكىزەدى.بىراق ىشكى تۇيسىگىنە قۇلاق تۇرە ءجۇرۋى ءتيىس. كەز كەلگەن ساتتە ماسەلەنىڭ شەشىمىن تابۋعا سول تۇيسىگى كومەكشى بولماق.

جاڭا جىل جاڭا جوبالاردى باستاۋعا قولايلى كەزەڭ بولماق. تيىسىنشە، بۇرىن قولىن بايلاعان قارجىلىق قيىندىقتارى شەشىلەدى.

جۇلدىزنامانى دايىنداعان باقىتگۇل كوپبايقىزى، «D»

«وبششەستۆەننايا پوزيتسيا»

(پروەكت «DAT» №45-46 (316-317) وت 24 دەكابريا 2015 گ.