سوققى ۇستىنە سوققى... ەندى جوعارى وقۋ ورىندارىندا قازاق تاريحى وقىتىلمايتىن بولىپ جاتىر. ءيا، قازاق قوعامى: «مەكتەپ جاسىنان بالالار ءۇش ءتىلدى قالاي مەڭگەرەدى؟»، «قازاق جەرى نەگە اۋكتسيوندا ساتىلادى؟ بايىرعى باباقونىسىمىزدى، تۋعان جەرىمىزدى ساۋداعا سالۋعا قارسىمىز. اسىرەسە، جەردى شەتەلدىكتەرگە ساتۋ دەگەن نە سۇمدىق؟!» دەپ الاشاپقىن بولىپ جاتقاندا  ۇكىمەت ءۇن-ءتۇنسىز تاعى ءبىر ءىستى قولعا الىپتى. بۇنىسى قازاقتى كەزەكتى رەت قان قاقساتاتىن ءىس ەكەندىگىن قاداپ ايتۋعا ءتيىسپىز. بەلگىلى جۋرناليست، الاش قوزعالىسىنىڭ تاريحىن زەرتتەۋشى عالىم بولات ءمۇرسالىم الەۋمەتتىك جەلىدەگى جەكە پاراقشاسىندا بىلاي دەپ جازىپتى:

«قازاقستاننىڭ تاۋەلسىزدىك تاريحىن نەگە عالىمدار زەرتتەمەيدى؟" دەگەن ءسوز كوپ ايتىلۋشى ەدى. زەرتتەمەك تۇگىلى، جاڭا وقۋ جىلىنان باستاپ جوو-دا "قازاقستان تاريحىنىڭ" ورنىنا "قازاقستاننىڭ قازىرگى زامان تاريحى" عانا وقىتىلىپ، سودان مەملەكەتتىك ەمتيحان تاپسىراتىن بولىپتى. ساقتىڭ تاريحى، عۇننىڭ تاريحى، تۇرىك قاعاناتى، التىن وردا، قازاق حاندىعى، الاش قوزعالىسى ەندى مەكتەپتە عانا وقىتىلادى. ونشاقتى ۇيىمنىڭ ("اتامەكەن" كاسىپكەرلەر پالاتاسى، جوو قاۋىمتاستىعى جانە بىرنەشە مەمورگان) كەلىسۋ راسىمىنەن وتكەن جاڭا ستاندارت ۇكىمەتتىڭ قاراۋىنا جىبەرىلىپتى».

ال، ەندى بۇعان نە دەۋگە بولادى؟ ساق داۋىرىنەن باستالاتىن تاريحىمىز كەشەگى ۇلت ازاتتىق كوتەرىلىس پەن  الاش كۇرەسىنە دەيىن مەكتەپ باعدارلاماسىندا تولىق قامتىلعان سوڭ، وسىنوۋ كونە تاريحتى وقىتۋ ماسەلەسى  جوو-دا تەرەڭدەي ءتۇسۋى كەرەك ەمەس پە؟ داۋىمىز جوق، بۇگىنگى قازاقستان تاريحى، تاۋەلسىزدىكتىڭ ۇلتتىق قۇندىلىقتارى دا جەكە ءپان رەتىندە جوعارى وقۋ ورىندارىندا وقىتىلسىن. بىراق، ەل تاريحىن 1991 جىلدان بەرگى كەزەڭ ارقىلى عانا تانىتىپ، بابا تاريحتى سىزىپ تاستاۋ اقىلعا قونا ما؟ «بوياۋشى بوياۋشى دەگەنگە ساقالىن بويايدى» دەمەكشى، رەفورماشىل ءمينيسترىمىزدىڭ  (بعم ءمينيسترى ساعاديەۆتى ايتامىز) بۇ قايتكەنى؟..

Abai.kz