«ۇلتتىق مۋزەيدە ەكسكۋرسيا جۇرگىزەتىن ماماندار بىرنەشە ءتىل بىلەدى. ەندى، قىتاي ءتىلىن ەنگىزبەكشىمىز. ويتكەنى، قىتايدان كەلىپ، قازاقتىڭ مادەنيەتىمەن، تاريحىمەن تانىسقىسى كەلەتىن تۋريستەر وتە كوپ. بۇل پروتسەسس كەلەسى جىلدان باستالادى. سول ءۇشىن قازىردەن باستاپ دايىندىق جۇرگىزىپ جاتىرمىز. بىزگە كەلەتىن تۋريستەر جەدەل، ىڭعايلى فورماتتا اقپارات الۋى كەرەك. تۇرىك تىلەتىن بىلەتىن ماماندارىمىز دا بار. سونداي-اق، باسقا تىلدەردى دە قامتۋىمىز مۇمكىن»، – دەيدى دارحان مىڭباي.

ونىڭ ايتۋىنشا، مۋزەي اشىلعالى 27 مىڭ شەتەلدىك تۋريست كەلگەن. ال اقىلى تۇردە كىرگەندەردىڭ سانى 40 مىڭنان اسادى ەكەن.

ارينە، بىزگە تۋريستەردىڭ كوپ كەلگەنى جاقسى. بىراق، الەمدىك مۋزەيگە اينالامىز دەگەن جەلەۋمەن مەملەكەتتىك مەكەمەلەرگە الەمدىك تىلدەردىڭ ءبارىن ەنگىزە بەرگەننىڭ ءجونى قالاي بولار ەكەن؟..

بىرىنشىدەن، ءبىزدىڭ ۇلتتىق مۋزەيىمىزدىڭ قىتايشا سويلەي باستاۋى قازاقستاندا قىتاي مەملەكەتىنىڭ ىقپالىنىڭ ارتقانىنىڭ بەلگىسى بولىپ سانالادى. 

ەكىنشىدەن، بۇگىن مۋزەيگە كىرگەن ءتىل، ەرتەڭ كاسىپورىندارعا، سوسىن مەكتەپتەرگە، وقۋ ورىندارىنا ەنە باستايدى. 

ۇشىنشىدەن، مۇنداي وقيعالار حالىقتىڭ قۇلاعىنا قىتاي ءتىلىن ءسىڭىرىپ، ۇلتتىق بولمىستان ايرىلۋعا جول اشادى.

تورتىنشىدەن، ەشبىر ەل شەتەلدەن كەلەتىن قوناقتارعا بولا ءوز ءتىلىن قۇرباندىققا شالىپ، سول ەلدىڭ تىلىندە سويلەۋگە بەيىلدى ەمەس. ماسەلەن، قازاقتار ءۇشىن قاي ەلدىڭ مۋزەيى قازاق ءتىلىن بىلەتىن ماماندى قىزمەتكە الىپ جاتىر؟ قىتاي مەن رەسەي جاپپاي قازاق مەكتەپتەرىن جاۋىپ جاتقان تۇستا، ءبىز ولارعا بارلىق جاعدايدى جاساپ بەرۋگە تىرىسامىز

قازىر اعىلشىن ءتىلى - حالىقارالىق ءتىل. ەلىمىزگە كەلگەن كەز-كەلگەن تۋريستكە قىزمەت مەملەكەتتىك تىلدە جاسالۋى قاجەت. ونىڭ تۋريستەر ءۇشىن اعىلشىنشا اۋديو-اۋدارماسى جاسالسا جەتكىلىكتى.

بۇل - ءبىزدىڭ ءتول ءتىلىمىز بار ەكەنىن، وتارلىق  حالدەن ارىلا باستاعانىمىزدى كورسەتەدى. 

ۇلتتىق مۋزەي قىتايشا سويلەدى ەكەن دەپ، مۋزەيگە حانزۋ كورشىلەرىمىز اعىلماسى جانە انىق. جالپى، اقىلى بار ەل بىرتە-بىرتە ورىس ءتىلىنىڭ دە ىقپالىنان ارىلىپ، الەمگە ءوزىن تانىتۋدىڭ دۇرىس جولىن تاڭداسا كەرەك-ءتى.

...قۋانىش سۇلتانوۆ سياقتى ەكس-ەلشى، بەلگىلى ساياساتكەر، بۇگىنگى ەل اقساقالى: ء"بىز مەملەكەت بولماعانبىز. قىتايمەن شەكارا بولىسىنە قاتىسا الماعانبىز", - دەپ سايراپ جۇرگەندە جالپى حانزۋ تىلىندەگى بايلانىسقا ابايلاپ قاراعانىمىز ابزال شىعار. وسىدان كەلىپ تۋاتىن سۇراق: ەلوردامىزداعى ۇلتتىق مۋزەي حانزۋ تىلىنە قانشالىقتى مۇقتاج؟

ءشارىپحان قايسار

Abai.kz