نيۋ-يوركتەگى ەڭ ۇزدىك پوليتسەي - قازاق جىگىتى دەگەن بىلتىرعى جاڭالىق كۇللى الەۋمەتتىك جەلىدە جايىلىپ كەتكەنىن جۇرت ەستەن شىعارا قويماعان بولار. سونىمەن، نيازوۆتار جانۇياسى جايىندا نە بىلەمىز؟

نيۋ-يوركتەگى ەڭ ۇزدىك پوليتسەي – قازاق!

26 جاسار ديماش نيازوۆ سول كەزدە ەسىرتكى ساۋداسىن جولعا قويعان باۋكەسپەنىڭ ناق ءوزىن قۇرىققا تۇسىرەدى. وعان دەيىن سونىڭ ەكى جاندايشابىن تۇتقىنداعان بولاتىن. سول كەزدە كىسەندەلگەن بىرەۋدىڭ ۇيالى تەلەفونى( ادۆوكاتى كەلگەنگە دەيىن اقش پوليتسەيلەرىنىڭ ۇستالعان ادامنىڭ جەكە مۇلكىن الىپ قويۋعا قاقىسى جوق) دامىلسىز شىرىلداپ قويا بەرگەن. كوزىنىڭ ءبىر قيىعىن تەلەفونعا سالعان ديماش نيازوۆ بەلگىلى قىلمەسكەردىڭ بۇركەنشىك اتىن كورە قويادى. سول اتتى ەندى ءوزى بۇركەنىپ، ول الەۋمەتتىك جەلىگە كىرەدى دە، ەسىرتكى ساۋداگەرلەرىمەن حات الىسا باستايدى. ءسويتىپ، تاسادا تىعىلعان باۋكەسپە باسشىسىنا شىعادى... بىلەكتى دە جۇرەكتى جاس جىگىت ماراپاتقا دا كەنەلەدى، قىزمەتى دە وسەدى.

كۇن سايىن شىعاتىن The Wall Street Journal گازەتى ول جايىندا ماقالا جاريالاپ، ديماشتى ەمميگرانتتاردىڭ بارىنە ۇلگى رەتىندە قويدى. امەريكاندىق تەلەكانالدار قىلمىسكەرلەردى ۇستاۋ فاكتىسىن نەگىزگە الا وتىرىپ، ونى كاسىبي بوكسپەن اينالىساتىن جالعىز امەريكاندىق پوليتسەي رەتىندە كورسەتتى.  

نيۋ-يوركقا نيازوۆتار وتباسى، تۋراسىن ايتقاندا اۋەلى وتاعاسى   يسمات نيازوۆ سپورتىڭ ارقاسىندا كەلەدى. ول الماتىداعى رەسپۋبليكالىق بالالار سپورت مەكتەپ-ينتەرناتىندا وقيدى، بوكستا ەداۋىر جەتىستىكتەرگە  جەتكەنمەن، مانساپقا بوي ۇرمايدى، ەسى-دەرتى تەڭىزدە بولاتىن.    1985 جىلى اسكەردەگى ازاماتتىق بورىشىن وتەپ شىققاننان كەيىن، ارحانگەلسك قالاسىنداعى تەڭىزشىلەر ۋچيليششەسىنە وقۋعا ءتۇسىپ، سونىمەن قاتار  لەنينگرادتاعى  تەڭىز اكادەمياسىندا سىرتتاي وقي باستايدى. سويتە ءجۇرىپ، سپورتتان ءبىر ءسات تە قول ۇزبەيدى.  

1997 جىلى اۋەلى   نيدەرلاندىعا، ودان ءارى نيۋ-يورقا جول تارتادى. سوندا ءجۇرىپ،  كيكبوكسينگ پەن تاي بوكسىنان ءتالىم بەرە باستايدى. ال، شاكىرتتەرى كوشىلگەرى ناتيجە كورسەتە باستاعان كەزدە، يسمات نيازوۆ اقش ازاماتتىعىن الىپ، جانۇياسىن مۇحيتتىڭ ارعى بەتىنە كوشىرىپ الادى. امەريكاكدا سپورتپەن شىن ىقىلاسپەن اينالىساتىندارعا قۇرمەتپەن قارايدى. تابىسقا جەتۋدىڭ اينىماس جولى ەكەنىن اڭعارعان مەن  ەكى ۇلىمدى دا سپورتقا باۋلي باستادىم، - دەيدى يسمات.

ديماشتىڭ تالابى جاقسى ەدى، جەڭىسكە دەگەن جىگەرى جانىپ تۇراتىن، نيۋ-يوركتە چەمپيون اتانىپ، بۋفالودا كۇمىستەن القا تاققاندا، مەن ونى كاسىبي  سپورتقا اۋىستىردىم.

امەريكادا – بيزنەس، جۇرەگىم قازاقستان دەپ سوعادى

20 جىل بويى امەريكادا ءومىر ءسۇرىپ كەلە جاتقان يسمات نيازوۆ جۇرەگىم قازاقستان دەپ سوعادى دەپ اعىنان جارىلادى. نيۋ-يوركتاعى ءوز ادامىمىز: «قازاقتار مەنىڭ ۇيىمە قوناققا ءجيى كەلەدى» دەيدى. وسىدان ەكى جىل بۇرىن لاس ۆەگاستا بوكستان چەمپيونات ءوتتى، سوندا ءبىر-ەكى كۇنگە قازاق بوكسشىلارىنىڭ باپكەرلەرى قوناق بولىپ قايتقان.

- پروموۋتەرلىكپەن دە اينالىسامىن، وسىدان بەس جىل بۇرىن امەريكاندىق ەكى دوسىممەن ۇلكەن سپورت  زالىن اشىپ الدىم، وندا وليمپيادا سپورتىنىڭ: بوكس، كۇرەس، تاەكۆاندو، كاراتە سەكىلدى تۇرلەرىنەن جاتتىعۋ جۇرگىزەمىز. سونىمەن قاتار ەلىمىزدەگى سپورتتىڭ دامۋىندا قاداعالىپ وتىرامىن، - دەيدى يسمات نيازوۆ. – سوڭعى جىلدارى ءبىزدىڭ ەلدە سپورت جاقسى دامىپ كەلەدى. كۇللى الەم ءبىزدىڭ زىلتەمىرشىلەردى، حوككەيشىلەردى، ءتىپتى پارا سپورتشىلارىمىزدى جاقسى بىلەدى. سپورت وزدىگىنەن دامىمايدى. وعان ەرەكشە ىقىلاس كەرەك. ونىڭ دامۋىن قاداعالايتىن ۆەدومستۆو تاراپىنان ماقساتتى جۇمىستاردىڭ جۇرگىزىلگەنى ءجون.

ۇلكەن ۇلى ديماش كىشكەنتايىنان الدىعا قويعان ماقساتتارىنا جەتۋ ءۇشىن، ەشنارسەدەن ايانبايتىن. كاسىبي بوكستان الەم چەمپيونى بولام دەدى – بولدى!  ديماش قازىرگە دەيىن ون كەزدەسۋىن وتكىزدى. بارىندە دە جەڭىسكە جەتتى.

مانسابىن دا ەستەن شىعارعان ەمەس، پوليتسيا اكادەمياسىنا ەمتيحاندار تاپسىرىپ، قىزمەتكە شاقىرۋ الدى. اقپان ايىنىڭ باسىندا ديماش وتباسىن قۇردى. 23 جاسارۇلىم قۋانىش تا ۇلكەن اعاسىنىڭ اقىلىمەن پوليتسيا اكادەمياسىنا ەمتيحان تاپسىرعان. ازىرگە قىزمەتكە شاقىرۋ كەلە قويعان جوق، بىراق ول قول قۋسىرىپ وتىرمادى، پروگرامميستتىك كاسىبىن جەتىلدىرۋ ءۇشىن، كوللەدجگە قۇجاتتارىن وتكىزدى.

امەريكاندىق ءتارتىپ ساقشىلارىنىڭ ارتىقشىلىقتارى دا بار ەكەن. ماسەلەن، جولدا كەتىپ بارا جاتقان مەنى الدەقانداي پوليتسەيلەر توقتاتا قالعان جاعدايدا مەن پوليتسەيدىڭ اكەسىمىن دەگەن ارنايى انىقتاما كارتوچكاسىن كورسەتسەم، مەنى سوزگە كەلمەي جىبەرە سالادى.

ۇرتوقپاق!

باستى كەيىپكەرىمىزگە ورالايىق. جۋىردا جەرلەسىمىز ديماش نيازوۆ ءبىز ماقتان تۇتاتىنداي تاعى ءبىر وڭدى ءىس اتقاردى. امەريكاندىق ALDAMISA Entertainment فيرماسى تۋرالى مالىمەتتەردى تاۋىپ، قازاقستان تارابىنا جەتكىزۋگە قول ءۇشىن بەردى. يا، سول باياعى اتى  شۋلى «فەنيكس» كينوجوباسىنا قاتىسى بار دەگەن  رەجيسسەر تالعات جانىبەكوۆ پەن پروديۋسسەر تۇڭعىشباي جامانقۇلوۆتىڭ تىلگە تيەك ەتىپ جۇرگەن كومپانياسى. بۇلىڭعىر دۇنيەگە ءۇش ميلليون دوللار قارجى تالاپ ەتكەن الاياقتاردىڭ جولىن كەسكەن قازاقستان مادەنيەت جانە سپورت ءمينيسترىنىڭ بۇل ارەكەتى راسىندا-اق، اتاپ وتۋگە تۇرارلىق ءجايت. اپەرباقان ەكەۋ حالىقتىڭ اقشاسىن الا الماي سان سوقتى ەمەس پە.

ALDAMISA Entertainment امەريكاندىق فيرماسى تۋراسىندا دەربەس تەرگەۋ جۇرگىزۋدى امەريكاندىق پوليتسەيدىڭ اكەسى ينيتسياتيۆا تانىتتى.

- رەسەيدىڭ Aldamisa RUS فيرماسى امەريكاندىق ALDAMISA Entertainment فيرماسىنىڭ «سەرىكتەسى» دەپ مالىمدەگەن رەجيسسەر تالعات جانىبەكوۆتىڭ اڭگىمەسىنەن كەيىن امەريكاندىق فيرمانىڭ قىزمەتىن تەكسەرىپ كورەيىن دەگەن ىنتىزارلىق وياندى. شىنىندا دا، ءمينيستردىڭ كۇدىگى بەكەر بولماي شىقتى. قوسىمشا قاراجاتتىڭ بولىنۋىنە   توقتاۋ سالعانى دۇرىس ەكەن، - دەپ انگىمەلەيدى يسمات نيازوۆ.

امەريكادا ونىڭ بىرنەشە، سونىڭ ىشىندە جەكە ۇيلەردە دە مەكەنجايى بار ەكەنى انىقتالدى. ال ەڭ سوراقىسى سول  بۇل  كومپانيا بانككە دە، اكتەرلارعا دا، جۇمىسشىلارعا دا قارىزعا بەلشەسىنەن باتىپ، سوتتاسۋدان كوز اشپاۋدا. ال اتاقتى اكتەر مايك كافف ALDAMISA وعان مەكسيكاداعى فيلم تۇسىرىلىمدەرى  ءۇشىن اقى تولەمەدى دەگەن ايىپتاۋىنان سوڭ، كومپانيانىڭ قىزمەتى توقتاتىلعان بولاتىن.

ءسويتىپ، «فەنيكس» كينوجوباسىنىڭ  ۇيىمداستىرۋشىلارى جىمىسقى ارەكەتتەرىن جۇزەگە اسىرا الماي، امەريكاندىق ALDAMISA Entertainment سەكىلدى ۇرتوقپاققا ۇرىندى.

ارايلىم مەلدەشوۆا

Abai.kz