كەرەكۋدەن 20 مىڭ ادام رەسەيگە كوشىپ كەتكەن. ولار قازاقستان رەسپۋبليكاسى ازاماتتىعىنان ءوز ەرىكتەرىمەن باس تارتىپ جاتىر. بۇل تۋرالى «ratel.kz» سايتى حابارلايدى.

سايت دەرەكتەرىنە سۇيەنسەك، كەرەكۋ (پاۆلودار) وبلىسىندا رەسەيگە جەر اۋىپ جاتقانداردىڭ سانى ەداۋىر ارتقان. ولار رەسەيدىڭ ارنايى «وتانداستاردى كوشىرىپ اكەلۋ» باعدارلاماسى اياسىندا قازاقستان ازاماتتىعىنان باس تارتۋدا.  رف كونسۋلدىعىنا وسىنداي وتىنىشپەن كەلۋشىلەر الدىن-الا 1-2 اي بۇرىن كەزەككە تۇراتىن كورىنەدى.

«كرىشا» پورتالىندا ساراپتاما جۇرگىزگەن سايت قىزمەتكەرلەرىنىڭ دەرەكتەرىنە قاراساق،  كەرەكۋلىكتەردىڭ كوبىسى ءوز ۇيلەرىن ومسك، بارناۋىل، كراسنودار، تۇمەن سەكىلدى قالالارداعى ۇيلەرگە ايىرباستاۋعا نيەت بىلدىرگەن.

ميگراتسيالىق پوليتسيا ماماندارىنىڭ ايتۋىنشا، سولتۇستىك جۇرتشىلىعى تۇرمىس دەڭگەيىنىڭ تومەندىگىنەن رەسەيگە قونىس اۋدارۋعا قۇلىقتى بولىپ وتىر.

مىسالى، 2010 جىلى كەرەكۋدەن كەتكەندەردىڭ سانى 2 503 ادامدى قۇراسا، بۇل كورسەتكىش 2016 جىلى 4 204 ادامعا جەتكەن. ايتا كەتەيىك، قونىس اۋدارعاندار قازاقستان ازاماتتىعىنان ءبىرجولاتا باس تارتقان.

ال سوڭعى 5 جىلدا ءبىر عانا كەرەكۋدەن كوشكەندەردىڭ سانى 20 مىڭعا جەتكەن. بۇل دەگەنىڭىز ءبىر وبلىستاعى ءبۇتىن ءبىر اۋدان حالقى كوشىپ كەتتى دەگەن ءسوز.

جوعارىداعى دەرەكتەرگە نازار اۋدارساق، كەرەكۋدەگى جۇرت «وتانداستاردى كوشىرىپ اكەلۋ» باعدارلاماسى بويىنشا قونىس اۋدارۋعا وتىنىشتەر بەرىپ جاتىر ەكەن. دەمەك، اتالعان باعدارلاما بويىنشا ورىس دياسپوراسىنىڭ وكىلدەرى رەسەي ازاماتتىعىن الا الادى دەگەن قيسىن تۋادى. جانە جوعارى ءبىلىمدى (ديپلومى بار) ماماندار كەتىپ جاتقان كورىنەدى. بۇل ءۇشىن رەسەي ۇكىمەتى ارنايى باعدارلاما قابىلداپتى. ءتىپتى، كوشىپ كەلگەندەرگە 240 مىڭ رۋبل كولەمىندە قارجىلاي كومەك بەرەتىن كورىنەدى. سونداي-اق، سوڭعى بىرەر جىلدىڭ شيرەگىندە وتاندارىنا ءتۇپ قوپارىلا كوشىپ كەتكەندەردى رەسەيدىڭ 47 وڭىرىنە قونىستاندىرۋ جوسپارلانعان.

ءسويتىپ، الگى «ۇلى كوشكە» قوسىلعانداردىڭ سانى 20 مىڭنان اسىپتى. قايسىبىرىن الەۋمەتتىك ماسەلەلەر دە تولعاندىرعان ەكەن.

ال قيت ەتسە قازاقستاننىڭ باقشاسىنا تاس اتپاسا، باسى اۋىرىپ، بالتىرى سىزدايتىن ورىس سايتتارى جالعان اقپارات تاراتىپ، ورىستاردىڭ قازاقستاننان كەتۋىنە بىرنەشە سەبەپ تاۋىپتى.

«visasam.ru» تورابىنىڭ جازۋىنشا كوبىنەسە قازاقستاننان جاس ماماندار كەتىپ جاتقان كورىنەدى. رەسەيلىك «visasam.ru» تورابى ء«بىرىنشى كەزەكتە جۇمىسقا ورنالاسا الماعان جاس ماماندار كەتىپ جاتىر. ونىڭ سەبەبى – قازاقستاندا جۇمىسقا تەك قازاقتاردى الۋ كەرەك دەگەن قاعيدا بار» دەپتى. شىنىندا سولاي ما ەدى؟ اششى بولسا دا شىندىعى – قازاقستانداعى مەملەكەتتىك قىزمەتتەردە جۇرگەندەردىڭ دەنى ورىس ءتىلىن جەتىك مەڭگەرگەن ازاماتتار ەمەس پە ەدى؟ ءتىپتى، قازاقستاننىڭ مەملەكەتتىك ءتىلىن بىلمەيتىن، بىلگىسى دە كەلمەيتىن ازاماتتار استاناداعى اق سارايلاردا جۇرگەنى دە شىندىق. حوش، اۋزىنان اق يت كىرىپ، كوك يت شىعاتىن ورىس باسىلىمدارى مەن جات پيعىلدى، شوۆنيستىك كوزقاراستاعى رەسەي ساياساتكەرلەرى نە ايتىپ، نە قويمادى دەيسىز. وعان دا ء«لام-ميم» دەپ جاتقان قازاقستان ۇكىمەتى جوق. ورىس كوشىنىڭ جاندانۋىنا ءپۋتيننىڭ ويداعى-قىرداعى ءوز جاتىرلاستارىن جيىپ، ورمانداي ەل بولۋدى كوزدەگەن ساياساتى اسەر ەتىپ جاتىر. باسقا دەرەكتەر - بوس ءسوز.

تەك، سالىستىرمالى تۇردە ايتا كەتەيىك، ورىس كوشى سوناۋ توقسانىنشى جىلداردىڭ باسىندا قارقىندى جۇرگەنى بەلگىلى. ول كەزدە قازاقستانداعى ورىس ۇلتىنىڭ سانى 6 ميلليونعا جۋىقتاعان. بۇگىندە بۇل كورسەتكىش 3 ميلليونعا دەيىن تومەندەدى.

سونىمەن ورىستار كوشىپ جاتىر. ول كوشتى ورىس ۇلتشىلدارى دا، ورىسقا جاعىنىپ وتىراتىن قازاقستاندىق بيلىكتە توقتاتۋعا شاراسىز. مەيلى، كوشكەن ەلدىڭ ورنى قالادى. ال قازاقستاندا باسىنا باسپانا تاپپاي جۇرگەن قانشا ازامات بار؟! كەتكەنىنىڭ ورنىن ءوز ازاماتتارىمىز تولتىرادى دەپ سەنەمىز. سوندىقتان تەك «ۇلى كوش» ىركىلمەسىن دەپ قانا تىلەيىك.

نۇرگەلدى ابدىعانيۇلى

Abai.kz