ۇلت ءباسپاسوزى مەن جۋرناليستيكاسى تاريحىندا وزىندىك سوقپاعى، وزىندىك داۋىسى، وزىندىك قولتاڭباسى بار ايتۋلى ازاماتتىڭ ءبىرى  كۇنى كەشە دۇنيەدەن وزعان سەرىك اعا ءابدىرايىمۇلى ەدى. كوركەم مىنەزدى، قارا نارداي كونتەرلى كوشەلى اعانىڭ شىعارماشىلىق ەڭبەگىنە، قوعامدىق قىزمەتىنە بارلاۋ جاسار بولساق، ول سان قىرلى تالانت يەسى. ول جۋرناليست، كوسەمسوزشى، باسپاگەر، ۇستاز، اۋدارماشى. رەسپۋبليكانىڭ ادەبي مادەني ومىرىنە بەلسەندى تۇردە ارالاسىپ، ارتىنا جارقىن ءىز، ساۋلەلى ءسوز قالدىردى. ءبىلىمدى-بىلىكتى، تاجىريبەلى باسپاگەر، قازاق جۋرناليستيكاسىنىڭ كورنەكتى قايراتكەرى سەرىك ءابدىرايىمۇلىنىڭ ءومىر جولى ونەگەلى، عيبراتتى، تاعلىمدى. سوناۋ ستۋدەنت شاعىندا-اق، ياعني 1966-1979 جىلداردا «لەنينشىل جاس» («جاس الاش») گازەتىندە ءتىلشى، ءبولىم مەڭگەرۋشىسى، جاۋاپتى حاتشى مىندەتتەرىن ءمىنسىز اتقارعان ىسكەر، ادەپتى، مادەنيەتتى، تىندىرىمپاز جىگىت «ونەر»، «سانات» سىندى باسپالاردىڭ قاز تۇرىپ، قايىرلى-قۇتتى ارشىندى قادام جاساۋىنا سالماقتى ۇلەس قوستى. ال «جالىن» باسپاسىنىڭ، مۋزىكا جانە ونەر باس رەداكتسياسىندا باس رەداكتور قىزمەتىن اتقارعان ۋاقىتتا قورقىت اتا، قۇرمانعازى، تاتتىمبەت، قازانعاپ، ماحامبەت، ءبىرجان سال، اقان سەرى، سۇگىر، دينا، كەنەن ءتارىزدى كۇيشى-ءانشى، كومپوزيتورلاردىڭ مۇراسىن جاريالاۋعا مۇرىندىق بولدى. اتاقتى وقىمىستى الكەي حاقانۇلى مارعۇلاننىڭ قازاقتىڭ قولونەرى تۋرالى ءتورت تومدىعىن تاقىرىپتىق جوسپارعا ەنگىزىپ، ءۇش كىتابىن ەل يگىلىگىنە اينالدىردى.

ۇلت ءباسپاسوزى مەن جۋرناليستيكاسى تاريحىندا وزىندىك سوقپاعى، وزىندىك داۋىسى، وزىندىك قولتاڭباسى بار ايتۋلى ازاماتتىڭ ءبىرى  كۇنى كەشە دۇنيەدەن وزعان سەرىك اعا ءابدىرايىمۇلى ەدى. كوركەم مىنەزدى، قارا نارداي كونتەرلى كوشەلى اعانىڭ شىعارماشىلىق ەڭبەگىنە، قوعامدىق قىزمەتىنە بارلاۋ جاسار بولساق، ول سان قىرلى تالانت يەسى. ول جۋرناليست، كوسەمسوزشى، باسپاگەر، ۇستاز، اۋدارماشى. رەسپۋبليكانىڭ ادەبي مادەني ومىرىنە بەلسەندى تۇردە ارالاسىپ، ارتىنا جارقىن ءىز، ساۋلەلى ءسوز قالدىردى. ءبىلىمدى-بىلىكتى، تاجىريبەلى باسپاگەر، قازاق جۋرناليستيكاسىنىڭ كورنەكتى قايراتكەرى سەرىك ءابدىرايىمۇلىنىڭ ءومىر جولى ونەگەلى، عيبراتتى، تاعلىمدى. سوناۋ ستۋدەنت شاعىندا-اق، ياعني 1966-1979 جىلداردا «لەنينشىل جاس» («جاس الاش») گازەتىندە ءتىلشى، ءبولىم مەڭگەرۋشىسى، جاۋاپتى حاتشى مىندەتتەرىن ءمىنسىز اتقارعان ىسكەر، ادەپتى، مادەنيەتتى، تىندىرىمپاز جىگىت «ونەر»، «سانات» سىندى باسپالاردىڭ قاز تۇرىپ، قايىرلى-قۇتتى ارشىندى قادام جاساۋىنا سالماقتى ۇلەس قوستى. ال «جالىن» باسپاسىنىڭ، مۋزىكا جانە ونەر باس رەداكتسياسىندا باس رەداكتور قىزمەتىن اتقارعان ۋاقىتتا قورقىت اتا، قۇرمانعازى، تاتتىمبەت، قازانعاپ، ماحامبەت، ءبىرجان سال، اقان سەرى، سۇگىر، دينا، كەنەن ءتارىزدى كۇيشى-ءانشى، كومپوزيتورلاردىڭ مۇراسىن جاريالاۋعا مۇرىندىق بولدى. اتاقتى وقىمىستى الكەي حاقانۇلى مارعۇلاننىڭ قازاقتىڭ قولونەرى تۋرالى ءتورت تومدىعىن تاقىرىپتىق جوسپارعا ەنگىزىپ، ءۇش كىتابىن ەل يگىلىگىنە اينالدىردى.
1991-2009 جىلداردا «سانات» باسپاسىنىڭ ديرەكتورى سەرىك ءابدىرايىمۇلىنىڭ ۇيىمداستىرۋشىلىق ساليقالىق ەڭبەگىنىڭ ارقاسىندا عىلىمنىڭ 32 تاراۋى بويىنشا 450-دەي ادەبيەت رەسپۋبليكا وقىرماندارىنا ۇسىنىلىپتى. اسىرەسە، ۇلت تاريحى، مادەنيەتى، ادەبيەتى بويىنشا ەڭ قاجەتتى ونىمدەردى شىعارۋدى قولعا الدى. بۇل ورايدا، التى الاشتىڭ ارىستارى تەلجان شونانۇلىنىڭ، مۇحامەدجان  تىنىشباەۆتىڭ، سانجار اسفەندياروۆتىڭ، حالەل دوسمۇحامەدوۆتىڭ، ەسماعامبەت ىسمايىلوۆتىڭ، سارسەن امانجولوۆتىڭ مۇرالارى جارىققا شىقتى. سونداي-اق، مۇحاممەد حايدار ءدۋلاتيدىڭ «تاريحي راشيدي»، ا.ن.لەۆشيننىڭ «قىرعىز-قازاق نەمەسە قىرعىز-قايساق وردالارى مەن دالاسىنىڭ سيپاتتاماسى»، فرانتسۋز رەنە گرۋسەنىڭ «يمپەريا ستەپەي» جانە ت.ب. تانىمدىق، تاريحي ءمانى وزگەشە دۇنيەلەر وقىرمان قاۋىم مەن قاۋىشتى.
باسپا ءىسىنىڭ مايىن ىشكەن، توسەلگەن، جەتىلگەن مارقۇم سەرىك اعا ورىس ءتىلىن جەتىك تۇسىنەتىن، وزگە دە ۇلتتاردىڭ تۇرمىسىن، ەتنوگرافياسىن، تاريحىن، الەۋمەتتىك ورتاسىن جان-جاقتى بىلەتىن جۇيرىك اۋدارماشى دا. ول تۇرىك جازۋشىسى ورحان كەمالدىڭ «تۇڭعيىقتا» رومانىن، بوريس ۆاسيلەۆتىڭ «مانساپ پەن ماحاببات» پوۆەسىن، ەڭبەك ەرى پاۋل كۋسبەرگتىڭ «مونولوگ» اتتى پسيحولوگيالىق ەسسەسىن قازاق تىلىنە  مولدىرەتىپ ءتارجىمالادى. اۆتوردىڭ ءسوز ساپتاۋ مانەرىن، تۇپنۇسقانىڭ رۋحىن، كوركەمدىك ويلاۋ جۇيەسىن، ىشكى سىر-سەزىم دۇنيەسىن ساقتاعاندىعى ايقىن بايقالادى.
سەرىك ءابدىرايىمۇلى  1993 جىلدان بەرى ۇلت ساناتكەرى، قازاقتىڭ ءبىرتۋار جاقسى جايساڭى دىنمۇحامەد احمەتۇلى قوناەۆ اتىنداعى حالىقارالىق قوردىڭ ۆيتسە-پرەزيدەنتى مىندەتىن مۇلتىكسىز اتقاردى. ۇلى تۇلعانىڭ ۇلىلىعىن ناسيحاتتاۋداعى ەڭبەگى دە ولشەۋسىز. ديمەكەڭدەي كەمەل جاننىڭ كوسەمدىگى مەن كورەگەندىگىن جان-تانىمەن، بولمىسىمەن تانىعان، سەزىنگەن ەل سەركەسى. مەملەكەت قايراتكەرى د.ا.قوناەۆتىڭ «ءوتتىڭ داۋرەن وسىلاي»، «اقيقاتتان اتتاۋعا بولمايدى» اتتى مەمۋارلىق شىعارمالارىنىڭ ادەبي نۇسقالارىن جاسادى. ياسساۋي بابامىز ايتىپتى: «جاقسىدان عيبرات الا بەرگەننىڭ ءىسى وڭعا باسادى»، «كوپكە توپىراقتاي توسەلىپ قىزمەت قىل».
جازۋشى، پۋبليتسيست-جۋرناليست سەرىك ءابدىرايىمۇلىنىڭ مەملەكەت، عىلىم، مادەنيەت قايراتكەرلەرىمەن جۇرگىزگەن سىر-سۇحباتتارى ءوز الدىنا ءبىر رۋحاني الەم. اتاپ ايتساق، د.ا.قوناەۆ، ا.اسقاروۆ، ن.تىلەنديەۆ، ز.قابدولوۆ، قادىر مىرزا ءالى، د.يسابەكوۆ جانە ت.س.س. ارقايسىسى ءبىر-ءبىر دانالىق دارىستەرىندەي. سەرىك اعانىڭ اڭگىمە-سۇحباتقا ازىرلەنۋى دە بەينەبىر قاھارماندىقتىڭ ۇلگىسىندەي. مىسالى، قازاقتىڭ «التىن ساقاسى» د.ا.قوناەۆقا 108 سۇراق، قادىر مىرزا الىگە 33 سۇراق، د.يسابەكوۆكە 55 سۇراق قويىپتى-اۋ! ونەر الىبى، «وتتان جەيدە كيگەن اساۋ مىنەزدى» نۇرعيسا تىلەنديەۆ جونىندە «اققۋىن الديلەگەن ءان مەن كۇيدىڭ»، نۇرعيسانىڭ «ماحامبەتى» نەمەسە ۇلىلاردىڭ ىشكى ۇندەستىگى» «تىلەنديەۆ تۋرالى ەڭ قىسقا ءسوز» دەيتىن كوركەم ەسسەلەر مەن «نۇرعيسا» دەرەكتى ءفيلمىن تۋىنداتقان.
ونىڭ «ۇلتجاندى ۇستاز»، «قازاق عىلىمىنىڭ گەركۋلەسى ەدى»، «...ەركىندىگىن اڭساعان كەربۇعى ءتىپتى دە ولگەن جوق»، «بىلىكتىلىك توپىراعىندا ونەدى نەمەسە سىنشى ساعاتتىڭ بەيمالىم سىرلارى» دەيتىن وي-تولعامدارى شامىرقانعان شابىتتان، بىلىكتىلىك پەن ىزگىلىكتەن تۋعان شىعارمالار دەۋگە بولادى.
ونىڭ «ارىڭا جۇگىن، اعايىن!» دەيتىن كوسەم سوزىندە (2003) قوعام ومىرىندەگى، ادام بويىنداعى كورىكسىز جات قۇبىلىستار، جۇگەنسىزدىكتەر، جونسىزدىكتەر باتىل ايىپتالادى. جۇزىقارالاردىڭ ماڭدايىنا قارا تاڭبا باسىلادى. دۇنيەقوڭىزدىقتىڭ، تويىمسىزدىقتىڭ، اۋا جايىلۋشىلىقتىڭ بەلەڭ العانىن، اسىرەسە، بايۋ ءۇشىن 1) قايىرشىلىقپەن; 2) ۇرلىق جاساۋدى شەبەرلىكپەن مەڭگەرگەنىن; 3)  ادال كاسىپپەن، تازا ەڭبەكپەن شۇعىلدانۋشىلاردىڭ شۇعىل كەمىگەنىن ستاتيستيكالىق مالىمەتتەرگە جۇگىنە وتىرىپ دايەكتەپ جازادى. ەڭبەك «قاناعاتشىل ادامنىڭ قاسيەتتى جولى» ەكەنىن ۇقتىرادى.
سونىمەن بىرگە وسىناۋ جازباسىندا تاۋەلسىزدىك، الاش، رۋحانيات ماسەلەلەرى تۋرالى وي-تولعانىستارىمەن بولىسەدى. «قازاق تىلىندەي، قازاق ونەرىندەي، قازاق جىرىنداي دۇنيەدە ءتىل، ونەر، جىر جوق» دەپ ءتۇيىن جاسايدى.
1966 جىلى «لەنينشىل جاس» گازەتىندە جاريالانعان «ارمانداستار» وچەركىنەن باستاپ، سپورت تارلاندارى ءابدىسالام نۇرماقانوۆ، ابىلسەيىت ايحانوۆ، امانجول بۇعىباەۆ، تيمۋر سەگىزباەۆ جايلى جازعان وچەرك-ەسسەلەرى قانشاما.
جازۋشى س.ءابدىرايىمۇلىنىڭ 1934-1954 جىلداردا كسرو جوعارعى كەڭەسىنىڭ ءۇش دۇركىن شاقىرىلۋىندا حالىق دەپۋتاتى بولىپ سايلانعان بايبەك ەرمەكوۆتىڭ ءومىرى مەن ونەگەلى جولىنا ارنالعان «ەرمەكوۆ» اتتى دەرەكتى شىعارماسى تاعىلىمدىق، تاريحيلىق، تانىمدىق تۇرعىدان قىزىقتى. ادامگەرشىلىك، تازالىق، دانالىق تولعاۋى دەسە دە بولادى. شىعارما وقيعاسى ەسەنتەمىر بوكەن ءبيدىڭ جەتەلى جەتكىنشەك سىرىمعا ايتقان كەمەڭگەرلىك كەڭەسىنەن باستالىپ بايبەك ەرمەكوۆتىڭ اتالى ءسوزى اتان تۇيەگە تاتيتىن اتاسى دانا قارتتىڭ (شىن اتى ءسات) كىسىلىك بولمىسى، بەرەكەلى ءىس-ارەكەتتەرى، ەل سۋرەتتەرى شىمىر اڭگىمەلەنىپ، «تۇلپارداي وشپەس ءىز تاستاپ، سۇڭقارداي سۇلۋ جەر قالعان، شەبەردەن بەتەر ءىس ىستەپ، شەشەن دەرلىك ءسوز ورگەن» جاقسىنىڭ كوزى بايبەك ەرمەكوۆتىڭ «جاستىعى - جەر، كورپەسى - بۇلت» بولعان قاسىرەتتى جىلدارى، مۇرابتىق ەڭبەگى، ۇجىمشاردى ۇرشىقتاي ءۇيىرىپ باسقارعانى، كەلەس پەن تالاس اۋداندىق كەڭەسىنىڭ توراعاسى، ەل باسقارۋ ونەرىندەگى تاجىريبەسى، قازاقستان كپ ورتالىق كوميتەتىنىڭ ءبىرىنشى حاتشىسى جۇماباي شاياحمەتوۆپەن دوستىق، سىيلاستىق قارىم-قاتىناسى، التىن اۋلەتتىڭ ۇرپاقتارى جايلى سىر شەرتىلەدى.
اشارشىلىق، سوعىس تاقىرىبىنا ارنالعان «سول ءبىر سۇراپىل كۇز» دەيتىن پوۆەسىندە قازاق اۋىلىنىڭ تۇرمىس-تىرشىلىگى، كورگەن تاۋقىمەتى، 1937 جىلدىڭ زۇلمات-زوبالاڭى، اسىرەسە اقبوپە كۇيشىنىڭ ءومىردىڭ قاتال تالقىسىنداعى كۇيىنىشتى تاعدىرى باياندالادى.
تەگىندە، جازۋشى س.ءابدىرايىمۇلىنىڭ «ەرمەكوۆ»، «سول ءبىر سۇراپىل كۇز» دەيتىن تۋىندىلارىنا تاريحيلىق پەن دەرەكتىلىك، كوركەمدىك سۇلۋلىق، ۇلتتىق رۋح، ەلدىك سانا، حالىقتىق دانالىق ءتان.
كوسەمسوزشى، جازۋشى سەرىك ءابدىرايىمۇلى وقىرماننىڭ وي-تانىمىن، تۇسىنىك-پايىمىن تەرەڭدەتەتىن، كوزقاراسىن جەتىلدىرەتىن، سەزىمىن سۇلۋلاندىراتىن، رۋحىن اسقاقتاتاتىن شىعارمالاردى تاڭداپ-تالعاپ، تولعاپ ءتارجىمالايتىن ءسوز ۇستاسى. بۇل رەتتە ورىس جازۋشىسى بوريس ۆاسيلەۆتىڭ «مانساپ پەن ماحاببات» پوۆەسىندەگى باس كەيىپكەر سەرگەي ستەپانوۆيچتىڭ «بۇلىم-بۇلىم وي سونارىندا» قالعانى، «الاقۇيىن ءومىردىڭ اساۋ تولقىنى كوزسىز تۇڭعيىققا» باتىرعانى سۋرەتتەلەدى. ونىڭ تاعدىرى ايانىشتى، كۇردەلى، كۇرسىنىس-كۇڭىرەنىسكە تولى. حان كوكىرەك ايەلى مەن ادەپسىز بالاسىنىڭ ارەكەتتەرى ەسىنەن تاندىرادى، شىم-شىتىرىق كۇيگە تۇسىرەدى. ودان كەيىنگى جاس كەلىنشەگى ەلەنا تاعدىرى دا كۇيىنىشتى.
جازۋشىنىڭ تاعدىرلار تۋرالى تۇيدەك-تۇيدەك تەبىرەنىستى سۋرەتتى ويلارىنىڭ ۇستىندەگى مىنا ءبىر ءتۇيىندى بايلامدارىنا وي جۇگىرتەيىك:
1. «ايەلى مەن ەر ادامنىڭ جالپى ىشكى ۇيلەسىمى  ناعىز تارازى، ال تارازى باسى ءبىرى ەكىنشىسىنەن اسىپ كەتپەي، تەڭ ءتۇسىپ جاتۋعا ءتيىس».
2. «سەن جاراتىلىسىڭدا قاندايسىڭ، ءدال سول قالپىڭدى ساقتاي بىلگەنىڭنىڭ ءوزى ۇلى باقىت».
3. «ايەلگە باقىت تەك سەنىم ارقىلى كەلەدى».
سونىمەن قاتار ايەلدەردىڭ ەركەكشوراعا، ەركەكتەردىڭ قاتىنپاتشاعا اينالعانى دا اشكەرەلەنەدى.
س.ءابدىرايىمۇلى ەستون جازۋشىسى پاۋل كۋسبەرگتىڭ «مونولوگ» تولعاۋىنىڭ يدەيالىق، مازمۇندىق، ستيليستيكالىق، سينتاكسيستىك، ينتوناتسيالىق اسەرلىلىگىن، كوركەمدىك قۇرىلىمىن مۇقيات ساقتاپ، وي-تولعانىستارى جۇيەسىن كەلىستى سويلەتكەن. مىناۋ قۇيىنداي ۇيىتقىعان تىرشىلىكتىڭ تالاسىندا جاندى-جانسىز دۇنيەنىڭ تاڭعاجايىپ قۇبىلىس-سىرلارىنا،  نەشەمە ءتۇرلى ماقۇلىقتاردىڭ جاراتىلىس-ارەكەتتەرىنە (مىسالى، قي قوڭىزى، ارا، قارلىعاش، قۇمىرسقا، جارقانات) شىنايى سۋرەتكەرلىك كوزبەن، تۇيسىك، سەزىم قۋاتىمەن بارلاپ ءۇڭىلۋ، ياعني «ءومىر  ادامعا بەرىلگەن باعا جەتپەس بايلىق»، «ءوزىن-ءوزى تانۋ» قانداي قابىلەت ەكەندىگى فيلوسوفيالىق تۇرعىدان زەردەلەنەدى. اسىلى، قۇمىرسقالارعا بەينەتشىلدىك، ۇيالاس ارالار ورداسىنىڭ قايناعان تىرشىلىگىنە «ءوزارا ىنتىماق پەن ۇيىمشىلدىق» جاراستىقتا بولسا، وندا ازامات قوعامىندا رۋح نەگە سالتانات قۇرمايدى دەپ ساۋال تاستايدى. سول سەبەپتى ادام بالاسى ءومىردىڭ ءمانىن تۇرلىشە تۇسىنەدى. جازۋشى پايىمداۋلارى مەن تۇسىندىرمەلەرى وقىرماندى تەرەڭ ويعا شومدىرىپ، سەزىم يىرىمدەرىنە سۇڭگىتەدى...
سەرىك ءابدىرايىمۇلىنىڭ ادەبي مۇرالارىنىڭ ىشىندە ويشىلدىق پەن دانالىققا سۋارىلعان، تاپقىرلىقتان تۋىنداعان اقىقتاي جارقىراعان ويلار مەيلىنشە مول. ول گيپپوكرات، دەموسفەن، يۋلي تسەزار، گيللەل، گەرودوت، گەراكليت ەفەسسكي، گاننيبال، بۋددا، گەگەل، گەتە، گەينە ناقىلدارىن جانە راسۋل عامزاتوۆتىڭ دانالىق تۇجىرىمدارىن وقىرماندارعا ۇسىنعان. ماسەلەن: «ار-ۇيات  جاقسى جولدى نۇرلاندىراتىن يماندىلىق شىراعدانى» (گەگەل), «تاڭەرتەڭ جوسپار قۇرام، ال كۇنى بويى اقىلعا سىيمايتىن تىرلىك جاسايمىن» (ۆولتەر).
نەمەسە راسۋل عامزاتوۆتىڭ «ءابۋتالىپ ايتتى...» دەيتىن ءبىر قاقپايلارىنداعى تاپقىرلىقتارىنا ويىسايىق:
«ءبىر جاس اقىن تۋرالى ءابۋتالىپ بىلاي دەدى:
- شاماسى، ودان ەشنارسە شىقپايتىن بولار. ويتكەنى، تۇڭعىش ولەڭىن رەداكتسياعا ماشينامەن اكەلىپتى».
جۇرەگى نۇرعا تولى، قايىرىم-مەيىرىمى مەيلىنشە مول، تانىم-تۇسىنىگى تەرەڭ سەرىك اعانىڭ ءبىر زور جاقسىلىعىن ايتسام با دەيمىن.
بىردە:
- «سانات» باسپاسىنا ۇسىناتىن قولجازباڭ بار ما دەپ سۇرادى. وقىستان بەرگەن ساۋالعا شاپشاڭ جاۋاپ بەرە الماي كۇمىلجىدىم دە:
- ءيا، ءسىزدىڭ باسپاڭىزعا كەڭەس وداعىنىڭ باتىرى، كورنەكتى فولكلورتانۋشى مالىك عابدۋلليننىڭ شىعارماشىلىعى مەن ەرلىك- قاھارماندىق ىستەرى جونىندە كىتاپ دايىنداپ بەرەيىن، - دەدىم. الايدا ءوزىمنىڭ جازا الاتىندىعىما دا، «سانات» باسپاسىنىڭ جاريالايتىنىن دا سەنە قويعان جوق ەدىم. ولاي بولماي شىقتى. سەكەڭ 4 ايدىڭ ىشىندە جازدىرتىپ، قاراجاتتىڭ قيىندىقتارىنا قاراماستان 2001 جىلى جارىققا شىعاردى. سوندىقتان دا ءسوزى مەن ءىسى ءبىرتۇتاس سەرىك ءابدىرايىمۇلىنىڭ ىزگىلىگىنە، ۋادەگە بەرىكتىگىنە ءدان ريزامىن.
دۋلات باباتايۇلىنىڭ:
كەي جاقسىنىڭ مىنەزى،
ەدىل مەنەن جايىقتاي،
اعىپ كەتىپ سويلەيدى،
ءتىلى جۇيرىك بولعان سوڭ، -
دەگەنىندەي، مىرزا پەيىلدى، مەيىرلى، زەردەلى سەرىك ءابدىرايىمۇلىنىڭ ءال-فارابي اتىنداعى قازۇۋ-ءدىڭ ايتۋلى اسقاق اۋديتوريالارىنداعى دارىستەرى، قازاق راديوسىنان جۇيەلى تۇردە بەرىلگەن سىر-سۇحباتتارى تالايلاردىڭ وي-قيالىن ءدۇر سىلكىندىرىپ، جۇرەكتىڭ وتىن مازداتقانى، قياعا قاناتتانعانى ايان.
سۇڭقارلىق، سۇلتاندىق، سىرتتاندىق قاسيەتتەرىڭىز قانداي ەدى! ىزگىلىك نۇرىنا كەنەلگەن «اينالايىن» دەيتىن مايدان قىل سۋىرعانداي لەبىزىڭىزگە ورىكتەي ۇلدارىڭىز بەن الماداي قىزدارىڭىز، ومار حايامشا ايتقاندا، «باقىت شىڭىنا جەتىپ گۇلدەنەتىندەي» اسەردىڭ قۇشاعىندا ەدىل-جايىقتاي تەربەلۋشى ەدى.
سايىپ كەلگەندە، جازۋشى، جۋرناليست، كوسەمسوزشى، باسپاگەر سەرىك ءابدىرايىمۇلىنىڭ مۇراسى  رۋحىڭدى بايىتادى، ار-يمانىڭدى كوركەيتەدى، پيعىل-پەيىلىڭدى، وي-ساناڭدى جارىقتاندىرادى.

سەرىك نەگيموۆ،
ل.ن.گۋميلەۆ اتىنداعى ەۋرازيا
ۇلتتىق ۋنيۆەرسيتەتىنىڭ پروفەسسورى،
فيلولوگيا عىلىمدارىنىڭ دوكتورى