بۇل تۋرالى وبلىس اكىمى تۇرعىندارعا بەرگەن جىلدىق ەسەبىندە مالىمدەدى. «بۇدان بىلاي وڭىرىمىزدەگى ءاربىر اۋدان وزىندىك باسىم باعىتتارى بويىنشا داميتىن بولادى. وبلىستا اۋىل شارۋاشىلىعى سالاسىنىڭ پوتەنتسيالى وتە ۇلكەن.  

سوندىقتان، بۇل سالاعا جاڭا تەحنولوگيالاردى ەنگىزىپ، كەلەسى بەسجىلدىقتا بۇل سالانى دامىتۋعا ەرەكشە كوڭىل بولىنەتىن بولادى»،-دەدى ايماق باسشىسى. ياعني، اۋىلشارۋاشىلىق سالاسىن رەفورمالاۋدىڭ نەگىزگى بەس باعىتى جۇزەگە اسىرىلاتىن بولادى. ءبىرىنشى باعىت – سۋارمالى جەرلەردىڭ جاعدايىن جاقسارتىپ، جاڭادان سۋارمالى جەرلەردى اينالىمعا قوسۋ. ەكىنشى باعىت – فەرمەرلەرگە تومەن پايىزبەن بەرىلەتىن نەسيەلەردىڭ كولەمىن ارتتىرۋ. ماسەلەن، وسى جىلى “ماكسيمۋم” ايو ارقىلى بۇل سالاعا 10 ملرد. تەڭگەگە جۋىق قارجى بولىنۋدە. بۇل وتكەن جىلعىمەن سالىستىرعاندا 45% وسكەن. ءۇشىنشى باعىت ء–اربىر اۋىلدىق وكرۋگتە كووپەراتيۆ قۇرىپ، وندا ماشينو-تراكتورلىق ستانتسيالار (متس) اشۋ. ءتورتىنشى باعىت – اۋىل شارۋاشىلىق سالاسىنا عىلىمنىڭ جەتىستىكتەرىن كوپتەپ ەنگىزۋ. ياعني، ءاربىر اۋداندا سول اۋداننىڭ ەرەكشەلىكتەرىن ەسكەرە وتىرىپ كاسىپكەرلىك مەكتەپتەرىنىڭ بازاسىندا فەرمەرلەرگە عىلىمي كونسۋلتاتسيالىق قىزمەت كورسەتەتىن ورتالىقتار اشۋ. بەسىنشى باعىت بويىنشا – ءاربىر اۋداننىڭ پوتەنتسيالى مەن كليماتتىق ەرەكشەلىكتەرى زەرتتەلىپ، 2020 جىلعا دەيىنگى ناقتى ينديكاتورلارى بەكىتىلدى. ماسەلەن، تاۋلى اۋدانداردا ينتەنسيۆتى باۋ شارۋاشىلىعى قولعا الىنسا، وسى جىلى قازىعۇرت اۋدانىندا 1800 گەكتارعا جاڭعاق، 300 گەكتار جەرگە الما باۋلارى جوباسى ىسكە اسپاق. سونداي-اق، تولەبي مەن تۇلكىباس اۋداندارىندا 1200 گەكتارعا الما وتىرعىزۋ قولعا الىنىپ، باۋ جانە ونى قايتا وڭدەۋ كلاستەرى قۇرىلاتىن بولادى. تاۋلى اۋدانداردىڭ تاعى ءبىر باسىم باعىتى – ءسۇت كلاستەرىن دامىتۋ. ال، ماقتارال اۋدانىندا ماقتا شارۋاشىلىعىن قايتادان قولعا الۋ جوسپارلانىپ وتىر. ول ءۇشىن ماقتانىڭ ەگىس الاڭى ۇلعايتىلىپ، ونىمدىلىگىن ارتتىرۋ بويىنشا ارنايى باعدارلاما قابىلداناتىن بولادى. «بۇگىندە رەسپۋبليكا بويىنشا جىلىجايلاردىڭ 46 پايىزى – سارىاعاشتا. سوندىقتان، سارىعاش – كوكونiس وندiرەتىن ناعىز «فابريكاعا» اينالۋى ءتيىس. ول ءۇشىن ەڭ الدىمەن، ديحاندارعا ءونىمىن سىرتقا شىعارۋ ءۇشىن جاعداي جاسالۋ كەرەك. بۇل جۇمىستاردى جۇيەلەۋ اياسىندا سارىاعاش اۋدانىندا ترانسپورتتىق-لوگيستيكالىق ورتالىقتار قۇرۋ جوسپارلانىپ وتىر»،- دەدى ءوڭىر باسشىسى. سونداي-اق، بايانداماشى شىمكەنت پەن تۇركىستاندا ترانسپورتتىق-لوگيستيكالىق ورتالىقتارى ىسكە قوسىلاتىنىن. سىردىڭ بويىندا 80 مىڭ گەكتار جاڭا سۋارمالى جەرلەر اينالىمعا قوسىلىپ، شاردارا، وتىرار اۋداندارى جانە ارىس پەن تۇركىستاندا جۇگەرى مەن كوكونىستىڭ جاڭا القاپتارى يگەرىلەتىنىن جەتكىزدى. ال سوزاق، بايدىبەك اۋداندارىندا مال شارۋاشىلىعى دامىسا، تۇركىستان يندۋستريالدىق ايماعىندا شۇبات زاۋىتى سالىنباق. مۇنان بولەك، تۇركىستان، ارىس، وتىرار، سوزاقتا تۇيە ءسۇتىن جيناۋ پۋنكتتەرى اشىلاتىن بولادى. قوي ەتىن ەكسپورتتاۋ بويىنشا جۇمىستار قايتا قولعا الىنىپ، قوي ەتىنىڭ العاشقى پارتياسى يران رەسپۋبليكاسىنا جولداناتىن بولادى. 

اباي اقپارات