الماتىداعى «التىن وردا» بازارىنىڭ باسشىلارى وسىلاي دەيدى.

قازاق ءتىلىن مەملەكەتتىك ءتىل دەپ سانامايتىنداردىڭ قاتارىندا قازاق ازاماتتارىنىڭ بار ەكەندىگى كەۋدەگە وقشا قادالىپ وتىر. كەيبىرەۋلەر «قازاقشا جازىپ نەمەسە سويلەپ وتىرمىز»-دىڭ كەبىن كيىپ، نە جازىپ، نە قويعاندارىن وزدەرى دە بىلمەيدى. قازاق ءتىلىنىڭ جاناشىرى بولعان سوڭ كوزىمىزگە كورىنگەن جازۋدىڭ قازاقشا نۇسقاسىنا كوپ ءمان بەرەتىنىمىز شىندىق.

ءبىز سەكىلدىلەر حالىق اراسىندا دا بار. وعان قۋانامىز. وسى قازاق ءتىلىن مازاققا اينالدىرعاننىڭ كوكەسىن ءبىز الماتىدا ورتەنۋدەن امان تۇرعان اتىشۋلى ۇلكەن بازارلارlىڭ ءبىرى – «التىن وردادان» بايقادىق. مۇنداي كەلەڭسىزدىكتى كوزى شالىپ، فوتوعا ءتۇسىرىپ العان ايدوس ەسىمدى ازامات بىزگە حابارلاسىپ، ماسەلەنىڭ ءمان-جايىمەن ءبولىستى. ارنايى بازار ماڭىنان ءتۇسىرىلىپ الىنعان فوتولار ىشىنەن تومەندە تاقتايشالاردا جازىلعان جازۋدى كورىپ جاعامىزدى ۇستادىق. 

دەرەۋ تەلەفون تۇتقاسىنا جارماسىپ، الماتىداعى «التىن وردا» بازارىنىڭ اكىمشىلىگىنە حابارلاستىق. ارعى جاقتان ءوزىن بازار باستىعىنىڭ ورىنباسارىمىن دەپ تانىستىرعان ازامات، ءبىزدىڭ ەسكەرتۋىمىزدى قۇلاعىنا دا ىلمەدى. ءتىپتى تۇسىنگىسى دە كەلمەيتىن سىڭايلى. اراسىندا وزدەرىنىڭ مىندەتى جازۋ ەمەس، ساتۋ جۇمىستارى ەكەندىگىن دە ايتىپ قالدى. ءبىز مەملەكەتتىك ءتىلدى ماسقارالاپ تۇرعان تاقتايشانى الىپ تاستاۋىن، نە وزگەرتىپ قايتا جازۋىن سۇراعانىمىز سول ەدى، ارعى جاقتاعى باسەكەڭ ءوزىمىزدى «افەريسسىڭدەر!» دەپ جازعىرۋعا كوشتى. اڭگىمەمىز جاراسپاي قالعاننان كەيىن بازار باسشىلىعى تۇتقانى تاستاپ جىبەردى.  اقىرى ءمان-ءجايدى الماتى قالاسى اكىمدىگىنىڭ تىلدەردى دامىتۋ باسقارماسىنا حابارلاۋمەن شەكتەلدىك. بىراق اتالمىش قۇزىرلى ورىننان دا ەش جاۋاپ الا الماي قالدىق.

قازاقشاسى قايىسىپ تۇرعان تاقتايشانى كۇندە سول بازاردىڭ  بازارشىلارى مەن ساۋداگەرلەرى نەگە كورمەيدى؟ تىم قۇرىعاندا سولاردىڭ ءبىرى بايقاپ، بازار اكىمشىسىنە  بارىپ ەسكەرتۋ جاساسا، ماسقارا جازۋ وسى كۇنگە دەيىن بازار قاقپاسىنا كىرە بەرىستە ءىلىنىپ تۇرماس ەدى عوي...

...وزگە تىلدەن اۋدارىلعان جارنامالاردىڭ ماسقاراسى بۇل عانا ەمەس. كوشەدە تۇرعان كەيبىر جازۋلارعا قاراساڭ كوزىڭ تۇگىلى ءوزىڭ ءسۇرىنىپ كەتەسىڭ. ءتىپتى كەيدە جايسىز اۋدارىلعان جارنامانى وقىساق تا، تۇسىنە الماي دال بولاتىن كەزدەرىمىز دە ءجيى كەزدەسەدى  سوندا جارناما جاساۋشىلار قازاق ءتىلىن مازاق ءتىلى ەتىپ ءجۇر مە؟ 

بىردە بىزگە الماتىلىق لاۋرا بوقاەۆا ەسىمدى قارىنداسىمىز حابارلاسىپ، وسىنداي ءبىر ورەسكەل قاتەنىڭ كوشە بويىندا ايپاراداي بولىپ تۇرعانىن ايتتى. دەرەۋ سۋرەتكە ءتۇسىرىپ مەكەنجايىن انىقتادىق. سويتسەك بۇل سوراقى جازۋ الماتى مەن استانادا وركەن جايىپ وتىرعان بەلگىلى «وبۋۆيونوك» دەگەن دۇكەننىڭ الدىنداعى تاقتايشادا كورسەتىلگەن جادناما بولىپ شىقتى. بۇل دۇكەن نەگىزىنەن رەسەيدەن بالالار كيىمدەرىن تاسىمالداۋمەن اينالىسادى ەكەن. مەيلى، ورىس ەلىنەن  بالالار كيىمىن تاسىمالدايدى ەكەنبىز دەپ، وزدەرى وركەن جايىپ، بيزنەسىن دوڭگەلەنتىپ وتىرعان قازاقستان رەسپۋبليكاسىنىڭ مەملەكەتتىك ءتىلىن قۇرمەتتەمەي قويۋعا بولمايدىعوي. وزدەرى اۋدارا المايدى ەكەن، كوشەدە كەتىپ بارا جاتقان كەز كەلگەن قازاققا اۋدارتىپ السا ءدال مۇنداي كەلەڭسىزدىككە ۇرىنباسى انىق. جارناما جازۋلاردى بەت-اۋىزىنا جاپسىرعان الگى دۇكەننىڭ سىرت كورىنىسىنەن تاعى ءبىر بايقاعانىمىز جازۋلار اراسىنان ءبىر دە ءبىر قازاقشا ءسوز تاپپادىق. قازاقشا ءبىر ءسوز جازسا قالتاسى ورتايىپ قالاتىنداي كورىنگەن دۇكەن يەلەرى بۇل ەل قازاقستان ەكەندىگىن ۇمىتىپ قالعان سىڭايلى. سوندىقتان الماتى قالاسى اكىمدىگىنىڭ جانىنداعى تىلدەردى دامىتۋ باسقارماسى بۇل دۇكەننىڭ سىرتىنداعى جازۋ ءتىلىن ءبىر تەكسەرىپ ءتيىستى شارا قولدانۋى كەرەك.

ول ول ما؟ كەشە عانا استانا كوشەلەرىنىڭ بىرىندە ماعناسى تايعان سونداي قازاقشا جارنامانى ءبىزدىڭ قىزمەتكەرلەردىڭ ءبىرى ۇيالى بايلانىسى ارقىلى سۋرەتكە ءتۇسىرىپ اكەلدى. انىعىراق ايتار بولساق ماعناسى تايعان جارنامانى جۇمابەك تاشەنوۆ كوشەسىنىڭ بويىنان اڭعارعان ەكەن. بىلسەك، «Gymboree» بالالاردى قورعاۋ جانە دەنساۋلىعى مەن وي ءورىسىن دامىتۋ ورتالىعى بولىپ شىقتى. قىسقاسىن ايتقاندا ءبىزدىڭ نازارعا ىلىككەن قوس جارنامانىڭ دا بالالارعا بايلانىستى ەكەنى قىنجىلتتى. ەل بولاشاعى بۇگىنگى بۇلدىرشىندەردى وسىلايشا مايىسقان اۋدارمامەن نازارلاندىرساق كەلەشەگىمىز  نە بولماق؟

دەرەككوز: http://www.tilortalyq.kz/