جۋرناليست توقتار جاقاش Facebook-تەگى جەكە پاراقشاسىندا قىرعىزستاننان قونىس اۋدارعان ۇلتى دۇڭگەن جىگىتتىڭ 2 مىڭ اقش دوللارىمەن-اق دومالانىپ قازاقستان ازاماتى اتانىپ شىعا كەلگەندىگىن جازىپ وتىر.

- «ازاماتتىقتى وپ-وڭاي قالاي الىپ ءجۇرسىڭ؟»، - دەگەن ءجۋرناليستىڭ سۇراعىنا دۇڭگەن جىگىت:

- قوردايدان ەكى مىڭ دوللار بەرىپ الدىم. اقشاڭىز بولسا، قوردايدا تانىس ادامدار كوپ. كۇتتىرمەيدى. بىردەن كوك پاسپورتتى قولىڭىزعا بەرەدى، - دەپ جازادى.

«اڭگىمە بارىسىندا الگى جىگىت قىزدى-قىزدىمەن قىرعىزداعى دۇڭگەندەردىڭ وسىلاي الماتى ماڭى، قورداي اينالاسىنا كىرىپ، ءسىڭىپ جاتقانىن ايتىپ قالدى» دەيدى الەۋمەتتىك جەلىدەگى جازباسىندا ارىپتەسىمىز (http://abai.kz/post/view?id=2863).

ارينە، جاقاش مىرزانىڭ الەۋمەتتىك جەلىدەگى جازباسىن ەل ىشىندەگى ءارتۇرلى اڭگىمەگە قۇلاعى تۇرىك جۋرناليست اتتى جازارمان اعايىننىڭ «ويدان شىعارىپ، ويداي ماسەلە تۋدىرۋعا تىرىسقان كەزەكتى ءبىر دۇنيەسى عوي» دەيتىن ناۋمەز تۇسىنىكتىڭ شەڭبەرىندە قابىلداي سالۋعا بولادى. بىراق، وكىنىشكە قاراي، مۇنداي «قاڭقۋ سوزدەردىڭ» ۇشى-قيىرىنا جەتۋ مۇمكىن ەمەس. مۇمكىن ەمەستىگىنە سەبەپ: قازاقستاننىڭ ازاماتتىعى ازىن-اۋلاق اقشاعا ساتىلاتىنى تۋرالى شىندىقتى بۇكتەپ باسىپ، ءبۇرىپ ۇستاۋ وسى كۇندەرى ىشكى ىستەر مينيسترلىگىنىڭ قۇزىرىنان دا كەتىپ بارادى. ەستەرىڭىزدە شىعار، وتكەن جىلى قر ازاماتتىعىن سارت-ساۋاننىڭ ساۋداسىنا سالعان كوشى-قون پوليتسياسى كوميتەتىنىڭ بىرنەشە قىزمەتكەرى سوتتالىپ كەتتى. بىزدە ءوزى مەملەكەتتىك قاۋىپسىزدىككە قاتەر توندىرەتىن ءىس-شارالار ءىسىنىپ-قابىنىپ، ىندەت ەكەندىگى ەسكەرىلگەنشە، بىلىققا باتا بەرەدى عوي. دەمەك، ازاماتتىقتىڭ قارا بازار نارقىنداعى كۇيگە جەتكەن كۇيىنىشتى ءحالى جوعارى جاقتاعى الدەكىمدەردىڭ قاۋاشاعىن قاڭعىرلاتىپ وتسە كەرەك. ايتسە دە، قىزىق: قازاق كوشىنە، اقىن اۋىت مۇقيبەك ايتپاقشى، ء«تىس-تىرناعىمەن قارسى كۇشتەر»، ءبىزدىڭ تاقىرىبىمىزعا ورايلاستىرىپ ايتساق، كوشى-قون پوليتسياسى كوميتەتى مەملەكەتىمىزگە قاۋىپتى ادامدار – ورالماندار دەگەن ويدان اينىر ەمەس. Abai.kz اقپاراتتىق پورتالىنىڭ تۇراقتى اۆتورى بەيسەن احمەتۇلى ۇيىمداستىرعان اشىق حاتقا اتالعان قۇزىرەتتى ورگان وكىلى: «...قازاقستان رەسپۋبليكاسى ازاماتتىعىنا قابىلداۋ كەزىندە مەملەكەتتىك جانە قوعامدىق قاۋىپسىزدىكتى قاماتاماسىز ەتۋ ماقساتىندا ازاماتتىعى تيەسىلىلىگى جانە (نەمەسە) تۇراقتى تۇراتىن مەملەكەتتە سوتتىلىعى (سوتتىلىعىنىڭ بولماۋى) تۋرالى قۇجاتتىڭ بولۋى كوزدەلەدى» دەيدى. (قاراڭىز: http://abai.kz/post/view?id=2744). ال، الگىندەي قۇجاتتار قاسارىسىپ قانشا  جەردەن تالاپ ەتىلسە دە، 1 ملن. 700 مىڭ قازاق تۇرىپ، ءومىر ءسۇرىپ جاتقان قىتاي حالىق رەسپۋبليكاسىندا بەرىلمەيتىندىگى جونىندە سان قايتالانا جازىلدى ءھام ايتىلدى. ايتسە دە، «جازعان قۇلدا شارشاۋ جوق»، قايىرا قاپەرىمىزگە ورالتايىق. قىتايدا مىنا تومەندەگى جايتتار بويىنشا تولقۇجات راسىمدەلمەيدى، شەتەلگە شىعۋعا تىيىم سالىنادى. ەگەر ول:

قحر ازاماتى بولماسا;

ءوزىنىڭ كىم ەكەندىگىن دالەلدەي الماسا;

قۇجات الۋ بارىسىندا جالعان دوكۋمەنت جاساپ، الاياقتىق ىستەسە;

سوتتالىپ، جازاسىن وتەۋدە جۇرسە;

سوتتىڭ تولىق شەشىمى شىقپاعان ءىستى ادامدار بولسا;

قىلمىستى ىسكە قاتىسى بار دەپ جاۋاپقا تارتىلسا;

مەملەكەتتىك قۇزىرلى مەكەمەلەردە قىزمەت اتقارعان، شەتەلگە شىققان سوڭ مەملەكەت قاۋىپسىزدىگىنە قاتەر ءتوندىرىپ، زيانىن تيگىزەدى دەپ ەسەپتەلسە.

جوعارىداعى ءتارتىپ پەن تالاپتى ءتۇزىپ جانە ونىڭ قاتاڭ ساقتالۋىن باقىلاۋىندا ۇستاپ تۇرعان ەلدەن كەلىپ جاتقان قازاقتاردىڭ بارلىعى - قحر-دىڭ زاڭىن بۇزباعان، سوتتالماعان ادامدار. وسىنى ءبىزدىڭ «مەملەكەت پەن قوعامنىڭ قاۋىپسىزدىگىن» قامتاماسىز ەتكىش ۇكىمەتىمىز ەسكەرگەن ەمەس. «وسى قالاي؟» دەپ ويلانعان ەمەس. ەسەسىنە، «مەملەكەت پەن قوعامنىڭ قاۋىپسىزدىگى» "جانىنا باتاتىندىقتان" سىرتتاعى 5 ميلليونعا تاياۋ قازاقتى قازاقستانعا جۋىتپاۋدا. سوندا قايسىسىن قۇپتايمىز: «پاتريوت» قۇجاتتىڭ تالاپتارىن با، الدە قازاقتىڭ جان سانىنىڭ ارتىپ، ءوز قاۋىپسىزدىگىن ءوزى تولىق قورعاي الاتىنداي الەۋەتتى قامتيتىن ۇلتتىق تۇتاستىعىن با؟ ءسوز جوق، ءبىز ءبىر سويلەمدەگى ەكى سۇراقتىڭ ەكىنشىسىنە جاۋاپ بولاتىن ناقتى ماسەلەنىڭ جاعىندامىز. الايدا، «مەملەكەتتىڭ زاڭدى ۇستەمدىگى» (نەمىس ساياساتتانۋشىسى م.ۆەبەردىڭ انىقتاماسى) «قازاقسىز قازاقستان» جاساۋعا ۇمتىلعانداردىڭ بەلدەن باسقان بيلىگىنە عانا قىزمەت ەتۋدە (م.ماعاۋيندى وقىڭىز: http://abai.kz/post/view?id=2813).

حووش، سونىمەن زامانانىڭ تەكپىسى مەن تاريحي جاعدايلاردىڭ ارقيلى سيپاتتا قالىپتاسۋىنا بايلانىستى قيىر-جايلاپ، شەت قونعان قازاق بالاسىنا «جەر بەتىندەگى جالعىز وتانى – تاۋەلسىز قازاقستاندا» (پرەزيدەنت نازارباەۆتىڭ ءسوزى) ازاماتتىق الۋ وڭايعا سوقپايدى ەكەن. بارىنە سولاي ما؟ ءبارى دەپ وتىرعانىمىز – ەتنيكالىق قازاقتاردان وزگە جۇرتتى مەڭزەگەنىمىز. جوعارىدا توقتار جاقاشتىڭ دۇڭگەن جىگىتىمەن اڭگىمەسىنەن ءۇزىندى كەلتىردىك، ولارعا (بىلايعى جۇرتقا) قر ازاماتى اتانۋ – دۇنيەدەن ءتۇڭىلىپ كەتسەڭىز دە شىندىعى سول: تۇككە تۇرمايدى.

قازىر ازاماتتىقتى شۇلەن ۇلەستىرگەندەي وڭدى-سولدى تاراتىپ جاتقان سالانىڭ ءبىرى – سپورت سالاسى. ءوز ۇلاندارىن بولاتتاي شىڭداپ، تەر توگۋگە ەرىنەتىن، بىراق قازاقستانننىڭ كوك تۋىن ءدۇبىرلى دودالاردا جەلبىرەتە كوتەرىپ، ەسىپ-ءبوسىپ قايتۋدى بىلەتىن، اسىرە ماقتان مەن ماداقتى جانى سۇيەتىن سپورت بيلىگىندەگى الپاۋىتتار وزگەنىڭ دايىن ء«ونىمىن» (سپورتتا جەتىستىكتەرگە جەتۋگە مۇمكىندىگى زور ۇمىتكەردى) ۇپىلەپ-سۇپىلەپ ساتىپ اكەلە سالادى. بۇلار دا - وزدەرىنشە پاتريوت. قازاقستاندا ەتنيكالىق قازاقتى اتاجۇرتىنا جولاتپاي دىڭكەلەتۋدىڭ ءتۇرلى امال-ايلاسىن قاراستىرعان ۇكىمەت قاۋلىلارى مەن مەملەكەت زاڭدارىنىڭ جانە قازاق بالاسىن ۇلكەن سپورت ويىندارىنان قاعىپ تاستايتىن ەشبىر ەلدە جوق وسىنداي ەرەكشە پاتروتيزم بار. سونداعىسى – «كوپۇلتتى قازاقستاننىڭ» قۇرمەتىنە قۇلدىق ۇرعان پاتروتيزم. بيلىككە ۇنايتىن پاتروتيزم.

«قازاق بالاسىن ۇلكەن سپورت ويىندارىنان قاعىپ تاستايتىن» دەگەن سوزدەن شىعادى، ەلىمىزدەگى فۋتبول كلۋبتارىنداعى ويىنشىلار قاتارىندا قازاق بالاسىنىڭ قاراسى شامالى. ەسەسىنە، سلاۆيان ءناسىلدى ۇلتتار جەتىپ-ارتىلادى. ونى ايتاسىز، يگور زەنكوۆيچ («اقتوبە»), زاۋربەك پليەۆ پەن ميحايل باكاەۆ («قايرات»), الدان دجيدجيچ («شاحتەر»), ت.ب. اينالدىرعان ءبىر جىلدىڭ شەگىندە ءبىرى حورۆاتيادان، ەندى ءبىرى قاپقازدان كەلگەن بەتتە قازاقستاننىڭ ازاماتتىعىن تولقۇجاتىمەن بىرگە قالتالارىنا باسىپ ۇلگەردى. قر ازاماتتىعىن الۋ ءتارتىبى وسى رەتتە بۇزىلدى ما؟ ابدەن بۇزىلدى. بىراق، ازاماتتىعى ارزىمايتىن باعاعا ساتىلاتىن بۇل ەلدە ءتارتىپ پەن زاڭنىڭ بۇزىلعاندىعى انشەيىنگى اڭگىمەگە دە تاتىمايدى. (ەلىمىزدەگى فۋتبول كلۋبتارىنداعى تەڭسىزدىك تۋرالى تاقىرىپتى Abai.kz الداعى كۇندەرى ىندەتىپ جازاتىن بولادى. ازىرگە وسىمەن توقتاي تۇرايىق).

ءجا، يگور زەنكوۆيچ، الدان دجيدجيچتەر دوپ تەبەتىن كورىنەدى. قازاقستاندا فۋتبول ويىنىنىڭ دامۋىنا، بالكي، ازدى-كوپتى ۇلەس قوساتىن بولار. ال، گاستاربايتەرلەر شە... ولار نە ىستەمەك؟ «دۇنيەجۇزىلىك بانكتىڭ ەسەبى بويىنشا قازاقستان – الەمدەگى ميگرانتتار كوپ ۇمتىلاتىن توعىزىنشى ەل ەكەن. بۇل دەگەنىڭىز ەلىمىزدىڭ ميلليونداعان قارجىسى شەت ەل اسىپ جاتىر دەگەن ءسوز. جارايدى، «بىزدەن باسقا ەلدەر دە وسىنداي جاعدايدا عوي» دەپ جىلى جاۋىپ قويا سالۋعا بولار ەدى. الايدا، وزگەسىن ايتپاعاندا، 150 ملن استام حالقى بار رەسەيمەن ءوزىمىزدى سالىستىرا الماسىمىز بەلگىلى. ءبىز نەبارى 17 ملنعا جاڭا عانا تولىپ وتىرمىز. سولاي بولا تۇرا ءبىزدىڭ ەلىمىزگە جىل سايىن 700 مىڭنان استام «جۇمىسشى-قوناقتار» كەلىپ-كەتەدى، دەيدى اقپارات كوزدەرى». (سەرىكجان قاجي، «گاستاربايتەر كەلە جاتىر...»، http://abai.kz/post/view?id=2844). سول «جۇمىسشى-قوناقتاردىڭ» دەنى قازاقستانعا مۇلدە «قوناقتاپ» قالۋدا. قوتارىلا قونىس اۋدارۋدا. ازاماتتىقتى، ارينە، قوردايدان، ت.ب. ساتىپ الا سالادى.

وتكەن جىلى (2014 ج، قازان ايى) بىرەر كۇنگە قحر-عا ساپارلاپ بارعانبىز. سوندا 700 مىڭ قازاقتىڭ قىتاي تولقۇجاتىن يەلەنىپ، سىرتقا شىعۋعا، انىعى اتاجۇرتىنا اقتارىلا كوشۋگە دايىن وتىرعانى جايىندا جازعانبىز. 700 مىڭ قازاق! قانداي جۇمىسىڭا بولسا دا ماقۇل. تاپقان تابىسى وزىندە، ياعني قازاقستاندا قالادى. 700 مىڭ گاستاربايتەر. تاپقان تابىسىن ەلىنە اكەتەدى. ءسوزدىڭ تۋراسىنا كوشسەك، بيلىك قازاقستاندى قاراداي توناتىپ قويىپ قاراپ وتىر. سويتە تۇرا ەتنيكالىق قازاقتى كەۋدەسىنەن يتەرىپ، «مەملەكەت پەن قوعامنىڭ قاۋىپسىزدىگى ءۇشىن» ولاردان سوتتالماعانى جونىندە انىقتاما تالاپ ەتەتىن باپتى پارلامەنتتە انە-مىنە قارالۋعا ءتيىس زاڭنىڭ جوباسىنا ەنگىزىپ قاسارىسۋدا. (زاڭ جوباسى: «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كوشى-قون ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» دەپ اتالادى).

گاستاربايتەرلەردىڭ ءىشىنارا قازاقستان ازاماتتىعىن يەلەنىپ باستاعانىنا قايتىپ ورالايىق. تەگىندە، قانداي ەلدە بولسىن ازاماتتىقتى اقشاعا ساتىپ العان سوڭ، ونى ەمىن-ەركىن پايدالانۋدىڭ وزىندىك ءتارتىبى تۇزىلەدى. ازاماتتىقتى اقشاعا العان ادام ەندى جەرگىلىكتى بيلىكپەن جەڭ ۇشىنان جالعاسىپ، باسقا قۇندىلىقتارعا دا قول سوزادى. مىسالى، بيلىكتەگى ساتىمساق ادامنىڭ ءتىلىن تاۋىپ جەرگە قوجايىندىق ەتەدى، زاڭسىز ارەكەتتەرگە بارادى. اينالاسىنا ۇستەمدىك جاساۋعا قۇلشىنادى. الدا-جالدا بىرەۋ بىردەڭە دەي قالسا، «مەنى بوتەن ۇلت دەپ شەتقاقپايلاۋدا» دەگەندى بار داۋىسىمەن باقىرىپ، بايبالام سالادى. بيلىكپەن قورقىتادى. سوتقا جۇگىنەدى. قۇقىققورعاۋ ورگاندارىن پارالاپ، قۋلىعىن اسىرادى. ايتەۋىر بىلگەنىن جاسايدى. ءتىپتى، ادام ءولتىرىپ، كۇناعا دا باتادى. مەنىڭشە، ءبىزدىڭ ەلىمىزدە ۇلتارالىق قاقتىعىستارعا ۇلاسا جازداعان وقيعالاردىڭ استىرىندا وسىنداي وسقىرىنعان ماسەلەلەر بار. سونىڭ ءبىرى كەشەگى – سارىاعاش جانجالى. كۇدىكتى رەتىندە قولعا تۇسكەن نارمەتوۆ، شاماسى، اۋدانداعى الپاۋىتتارمەن اۋىز جالاسىپ، اينالاسىنداعى اعايىنعا تىزە باتىرعان بىرەۋ. ابدەن اسقان. تاسىنعان. ونىڭ ازىرگە كۇدىكتى سانالاتىن قىلمىسى جەرگىلىكتى جۇرتتىڭ ءدۇر سىلكىنۋىنە اكەپ سوقتىرۋى الگىندەي سەبەپكە ەسەپ. ايتپەسە، قازاق-وزبەگى ارالاس سارىاعاشتا ءبىر-بىرىنە قوقيلانىپ قوياتىندار از با؟ جازاتايىم كىسى ءولىمى دە بولىپ جاتقان شىعار... بىراق، سونىڭ ءبارى ۇلتارالىق جانجالعا ۇلاسىپ كەتە جازداعان وقيعالاردى ويعا سالمايدى عوي. ال، مالوۆودنوە-شەڭگەلدى – شەشەن ديساپوراسىنىڭ، ماياتاس- بەساعاش – كۇرد دياسپوراسىنىڭ (ەسكە ءتۇسىرىڭىز: http://old.abai.kz/node/7524), شەلەك-شونجى – ۇيعىر دياسپوراسىنىڭ كەيبىر وكىلدەرى تىم وكتەمسىپ كەتكەندىگىن، ولاردى قۇتىرتىپ، وبەكتەپ وتىرعان وزگە ەمەس، ءوزىمىزدىڭ بيلىك باسىنداعىلار مەن بيلىكتى بيلەپ توستەگەن جەكە تۇلعالار ەكەندىگىن ەكپىن تۇسىرە ايتۋعا ءتيىسپىز. زاڭ مەن ۇلت الدىندا الدىمەن سولار جاۋاپ بەرۋى كەرەك. ولاردى قوعام ارانداتۋشىلار دەپ ايىپتاۋى قاجەت.

گاستاربايتەرلەر نەگىزىنەن ديساپورالاردى جان تارتىپ جاقىندايدى. مىسالى، تاجىك قازاقستانداعى تاجىكتەردى جاعالايدى. ورىس ورىستىڭ ىعىنان پانا ىزدەيدى. سودان كەيىن تاپقان پاناسى مەن ساياسىن پايدالانىپ كەلىمسەكتىگىن ۇمىتىپ، كەلگەن ورتاسىنا تاسادان تاس اتادى. قىلمىس جاسايدى. ماسەلەنكي، 14 جاستاعى قازاق قىزىن زورلاپ، بەينەتاسپاعا تارتىپ، سوڭىنان اياۋاندىقپەن ازاپتاپ ولتىرگەن سەرگەي ناۋمتسەۆ ماسكەۋدەن اقتوبەگە تانىسىن ىزدەپ كەلگەن قانىشەر قاڭعىباستىڭ ءبىرى ەكەن. 2013 جىلى جاز ايىندا ورالمان وتباسىن وزبەك گاستاربايتەرلەردىڭ قىرىپ سالعانى قوعامنىڭ زارە-قۇتىن قاشىردى. مىنە، گاستاربايتەرلەر مەن كەلىمسەكتەردى بەتىمەن جىبەرگەننىڭ سىباعاسى. مىنە، دياسپورلاردىڭ  ەركىنسىپ  كەتكەن ەركە ۇلدارىن تىيماي ۇستاۋدىڭ سالدارى.

قىتاي ويشىلى لاو تسزى كەزىندە: «كوپ بىلەتىن حالىقتى باسقارۋ قيىن» دەگەن ەكەن. ءبىزدىڭ بيلىك ءۇشىن ەڭ الدىمەن – قازاعى قالىڭ مەملەكەتتى باسقارۋ قيىنعا سوعاتىن سياقتى. ايتەۋىر، قازاق دەسە، ونىڭ ىشىندە سىرتتان قونىس اۋدارىپ، اتاجۇرتىنا ورالعان ەتنيكالىق قازاق دەسە، قاراداي جىنى ۇستاپ، جىنىگىپ شىعا كەلەدى. جاڭاوزەن وقيعاسىن ەسكە الايىقشى. وقيعا بارىسىندا كارىم ءماسىموۆ پەن تيمۋر قۇلىباەۆى بار – ءبارى، پالەنى ءتۇز-تۇگەلىمەن اتاجۇرتىنا ورالعان باۋىرلارىمىزعا جاۋىپ ەدى عوي. اقىرىندا تاپسىرىستى تاپ-تۇيناقتاي ورىنداعان سوتتىڭ شەشىمى بويىنشا ايىپتالعان وتىزعا جۋىق ادامنىڭ ءبىر-ەكەۋى عانا ورالمان ەكەندىگىن جارىسا جازدىق. قايدا كەتتى سوندا، كوزىنە قان تولعان، ايرانداي ۇيىعان قازاقستاندى الاتايداي بۇلدىرۋدەن باسقانى ويلامايتىن "وڭباعان" ورالمان؟!. ال، شىن مانىندە ورالمان دەگەنىمىز – زاكونوپوسلۋشنىي گراجدانين، تولەرانتنىي چەلوۆەك (زاڭعا بوي ۇرعان ازامات، ءتوزىمدى ادام). ورالمان زاكونوپوسلۋشنىيلىعىنىڭ ناتيجەسىندە قازاقستاننىڭ «سوقىر، مىلقاۋ» ۇكىمەتىنىڭ تالاپ ەتە بەرەتىن قۇجاتتارىن شارق ۇرىپ ىزدەۋمەن ءجۇر. تولەرانتتىلىعىنىڭ ارقاسىندا مۇقىم قيىندىققا ءتوزىپ ءجۇر. ءماسىموۆ، نە قۇلىباەۆ ءبىر-اق كۇن، جالقى رەت ورالماننىڭ باسىنداعى كەپپەن ءومىر ءسۇرىپ كورسىنشى –  ورتەنىپ ولەر ەدى.

ە-ە، ايتا بەرسەك اڭگىمە كوپ. قازاقستاننىڭ ازاماتتىعى قازىر كىمگە، نەگە بۇيىرماي جاتىر؟ اعىلشىندىق ات، ايعىر، بيەلەرگە دە، تۇركپەننىڭ الاباي توبەتتەرىنە دە، اسىلجان مامىتبەكوۆتىڭ اۋسىل شىققان الا باس سيىرلارىنا دا بۇيىردى (ويتكەنى، وسىلاردىڭ بارلىعى - تىركەلىپ، قۇجاتتالعان جانۋارلار مەن تىرشىلىك يەسى). تاياۋ كۇندەرى اقش-تىڭ گۋانتانامو بازاسىنداعى اسكەري تۇرمەسىنەن بوساعان ءۇش يەمەندىك پەن ەكى تۋنيستىك تە قازاقستان ازاماتتىعىن قابىلدايتىن شىعار. ۋكراينا-رەسەي قاقتىعىسىنان بولعان ۇركىنشىلىكتەگى ەلدىڭ الدى قازاقستانعا كەلىپ بوسقىندار مارتەبەسىن يەلەنىپ ۇلگەردى. ولار ءۇشىن الدا ازاماتتىقتىڭ اۋىلى الىس ەمەس. تەك قازاق قانا قازاقستان ۇكىمەتى مەن زاڭدارىنىڭ الدىندا ءوزىنىڭ سوتتالماعاندىعىن دالەلدەي الماي ايىپتى بولىپ ءجۇر. سول «ايىپتارى» دالەلدەنبەي - ەتنيكالىق قازاقتاردىڭ ازاماتتىقتان  دامەتپەي-اق قويعانى ءجون.

داۋرەن قۋات

Abai.kz