اتىراۋدا قازاقستاننىڭ ەڭبەك سىڭىرگەن قايراتكەرى، پرەزيدەنت سىيلىعىنىڭ لاۋرەاتى، جازۋشى مەرەكە قۇلكەنوۆتىڭ 65 جاسقا تولۋىنا ارنالعان «ەلىم دەپ سوققان جۇرەگى» اتتى شىعارماشىلىق كەش ءوتتى. اتىراۋ جۇرتى لىق تولىپ جيىلعان شاراعا جازۋشى نەسىپبەك ءداۋتايۇلى، دراماتۋرگ راحىمجان وتارباەۆ، اتىراۋ وبلىسىنىڭ قۇرمەتتى ازاماتى، قوعام قايراتكەرى نۇرپەيىس ماقاشەۆ، ساياساتانۋشىلار ايدوس سارىم مەن راسۋل جۇمالى، جازۋشى سەرىكقالي حاسان، اقىن باۋىرجان حاليوللا سىندى ءبىر توپ ازاماتتار قوناق بولىپ قاتىستى.

كەشكە وبلىس اكىمى نۇرلان نوعاەۆ تا كەلدى. ايماق باسشىسى مەرەيتوي يەسىن 65 جىلدىعىمەن قۇتتىقتاپ، بۇل شارانىڭ ەلباسىنىڭ “بولاشاققا باعدار: رۋحاني جاڭعىرۋ” باعدارلامالىق ماقالاسىنداعى مىندەتتەردى جۇزەگە اسىرۋ ماقساتىندا ءوتىپ وتىرعانىن ايتتى.

– اقتى اق، قارانى قارا دەپ ايتىپ، بۇعىپ قالمايتىن مىنەزىڭىزدىڭ ارقاسىندا ازاماتتاردى  قابىلداتا ءبىلدىڭىز. ابىلايدىڭ تۇسىندەگى ءبىز قاسقىرمىز با، شايانبىز دا دەگەن سۇراقتارعا جاۋاپ بەرەتىندەي جاعدايدا كەلە جاتىرسىز. بۇل – كوزى اشىق، كوكىرەگى وياۋ، ەلدىڭ بولاشاعى بۇلىڭعىر بولماسىن دەگەن ادامعا ازاماتتىق پارىز. بۇل تۇستا ەلباسىنىڭ “رۋحاني جاڭعىرۋىنداعى” ايتىلعان ماسەلەلەردىڭ ماڭىزى زور. بۇگىنگى كەش سول جۇمىستى ىسكە اسىرۋ جولىنداعى شارۋانىڭ جالعاسى، – دەدى ول.

– ءيىسى قازاقتا پاراسات پايىمى، تۇسىنىگى، كىسىلىگى قابات كەلىپ وتىراتىن، ەلدىڭ جۇرتتىڭ قادىر-قاسيەتىن بىلەتىن، نامىسقا شاباتىن ازاماتتار از با كوپ پە، ونى مەن بىلمەيمىن. مەنىڭ بىلەتەنىم، ول كوپ بولسا دا، از بولسا دا، سونىڭ الدىڭعى ساپىندا مەرەكە دوس ءجۇر، – دەدى جازۋشى نەسىپبەك ءداۋتايۇلى ساحنادا تۇرىپ.

بەلگىلى ساياساتتانۋشى ايدوس سارىم مىنەز تۋرالى ءسوز قوزعادى:

– باياعىدا ۇلت كوسەمى ءاليحان بوكەيحانوۆ “ۇلتقا قىزمەت ەتۋ بىلىمنەن ەمەس، – مىنەزدەن” دەپ ايتقان ەكەن. وسى مىنەز دەگەن ەڭ ۇلكەن نارسەنىڭ ءبىرى سياقتى. نامىس تا مىنەزدەن، تاكاپپارلىق تا مىنەزدەن، ىزدەنۋ دە مىنەزدەن. اينالىپ كەلگەن كەزدە، بۇل دۇنيەدە جازۋشى بولۋ ءۇشىن دە مىنەز كەرەك، رەداكتور بولۋ ءۇشىن دە مىنەز كەرەك، قايراتكەر بولۋ ءۇشىن دە، بيزنەسمەن بولۋى ءۇشىن دە مىنەز كەرەك. وسى مىنەز دەگەن قاسيەتتىڭ ەڭ جاقسى، جارقىلداعان تۇستارىنىڭ ءبارى مەكەڭنىڭ بويىندا بار، – دەدى ول.

جازۋشىنىڭ ىشكى مونولوگىنا قۇرىلعان درامالىق كورىنىسپەن اشىلعان شىعارماشىلىق كەش، سالتاناتتى كونتسەرتپەن جالعاستى.

مەرەكە قۇلكەنوۆ 1951 جىلى 8 قاراشادا اتىراۋ وبلىسىندا تۋعان. «قازاقستان پيونەرى» (قازىرگى «ۇلان»), «پيونەر»، «قازاق ادەبيەتى»، «جالىن» سياقتى گازەت-جۋرنالداردا، قازاق تەلەديدارىندا قىزمەت ىستەگەن. رەسپۋبليكالىق «انا ءتىلى» گازەتىنىڭ، «تاڭ شولپان» جۋرنالىنىڭ باس رەداكتورى بولدى. قازىر «ولكە» باسپاسىنىڭ باس ديرەكتورى.

ماحامبەتتىڭ ءومىرىن ايشىقتاعان، دراماتۋرگ ر.وتارباەۆپەن بىرىگىپ جازعان «باس» دراماسى 2003 جىلى قازاقستان رەسپۋبليكاسى مادەنيەت مينيسترلىگىنىڭ ەكىنشى جۇلدەسىن يەلەندى. ماحامبەتتىڭ 200 جىلدىق مەرەيتويى قارساڭىندا «ماحامبەت كىتاپحاناسى» سەرياسىمەن 20 تومدىق كىتاپتى جانە «ماحامبەت ەلى» كىتاپ البومىن ءۇش تىلدە دايىنداۋدا جالپى رەداكتسيانى باسقاردى.

«جىبەك جەل»، «تاڭعى سامال»، «ۇرەي»، «حالەل دوسمۇحامەدوۆتىڭ ءومىرى مەن قىزمەتى»، «قازاقستان» جانە تاعى دا باسقا پروزالىق جانە پۋبليتسيستيكالىق شىعارمالاردىڭ، «ماحاببات مۇناراسى»، «جاڭگىر حان» پەسالارىنىڭ اۆتورى. شىعارمالارى بىرنەشە تىلگە اۋدارىلعان.

سۋرەتتەردى تۇسىرگەن: ءانۋار ابىلعازيەۆ