سوعىستان كەيىن بۇل ەسىم كوپ بولدى. جۇرت بىتكەننىڭ بارلىعى ۇلدى بولسا – باۋىرجانداي باتىر، باۋىرجانداي ەرجۇرەك، داڭقتى... اتى اڭىزعا اينالعان قاھارمان بولسا ەكەن دەگەن... شۇكىر بۇگىندە ەل ىشىندە باۋىرجاندار بارشىلىق... رامازان دا شاقالاعىنىڭ اتىن ىرىمداپ باۋىرجان دەپ اتاعان...

باۋىرجان نوگەربەك - ۇلىتاۋدىڭ تۋماسى. اكەسى رامازان سوعىستان كەيىنگى قيىندىق، جوقشىلىق، تاپشىلىق كەزدەردە جەزقازعان قالاسىنداعى تىگىن فابريكاسىندا ءبولىم باسشىسى بولدى. ەر-ازاماتتاردىڭ كوبى سوعىسقا كەتىپ، ورالماعان، قايتقاندارى – مۇگەدەك، ءبىرىنىڭ قولى، ءبىرىنىڭ اياعى جوق، ۇستەرىندەگى گيمناستەركالارىن ءالى شەشپەي جۇرگەن كەزi ەدى بۇل... ەل ءىشى جۇدەۋ... اشارشىلىق، رەپرەسسيا، سوعىس... بىرىنەن سوڭ ءبىرى كەپ ەلى ەسەڭگىرەپ قالعان شاق ەدى بۇل... دەي تۇرعانمەن... ۇلى جەڭىس ەل كوڭىلىن كوتەرگەن... «بۇدان جامان كۇندە دە تويعا بارعام» دەيتىن قازاقتىڭ سوعىستان سوڭ دا تويى تارقاماعان...

جەسىر اتانعان كەلىنشەكتەر  كۇيەۋى قايتىس بوپ، جەتىمدەرىن جەتەلەپ ءجۇرىپ وسىرگەن ايەلدەر دە بۇنداي توي-جيىننان قۇر الاقان ەمەس-ءتى. رامازان وسىنداي ءبىر وتىرىستا باۋىرجاننىڭ شەشەسىمەن كەزدەسكەن... باس قوسقان...

باۋىرجان جەزقازعاندا قازاق مەكتەبى بولماعاندىقتان، ورىس مەكتەبىنە باردى. العىر، زەرەك بولدى. كلاسستا دا، كوشەدە دە دوستارىنىڭ الدى بولدى. بىرتە-بىرتە كەلە-كەلە باۋىرجان – بوريس بولدى. مەكتەپتە دە، كوشەدە دە باۋىرجاندى بوريس دەگەن... ول كەزدە وپەرا تەاترى تەك الماتىدا، دراما تەاترلارى دا باس شاھاردا. ال، وبلىس ورتالىقتارى، كىشىگىرىم قالالاردا تەك كينوتەاترلار بولاتىن... ەل-جۇرتتىڭ كوڭىل كوتەرەتىن دە، باس قوساتىن دا، قىز-كەلىنشەكتەردىڭ وزدەرىنىڭ تىگىپ-پىشكەن كويلەكتەرىن كورسەتەتىن دە سول كينوتەاتر بولاتىن... قىز-جىگىتتىڭ اكە-شەشەدەن سىتىلىپ، كەزدەسەتىن ورىندارى دا سول كىشكەنە عيمارات بولاتىن. كينو – عاجاپ دۇنيە عوي. ىشىنە ءبىر كىرىپ كەتسەڭ، ەرتەگىگى ەنگەندەي بولاتىن...

ءيا، كينونىڭ ول كەزدەگى ءرولى ۇلكەن ەدى... تىم ۇلكەن بولاتىن... كوزى اشىق رامازان قولى قالت ەتكەندە كينوعا بارعىش ەدى... جانە كوبىندە بالاسى باۋىرجاندى قاسىنان تاستامايتىن. فيلمنەن سوڭ ەكەۋى ۇيگە بىرگە قايتادى. كينودان العان اسەرلەرىمەن بولىسەدى. قىزىل-كەڭىردەك بوپ كەيدە اكەسىمەن سالعىلاسادى. سودان سوڭ ۇيىقتار الدىندا قيالدايتىن... ءاربىر كورگەن فيلمدەرىن وي وزەگىنەن وتكىزەتىن. اسىرەسە، وتكەن عاسىردىڭ 60-شى جىلداردى بۇل ەلگە ءۇندى كينولارى كەلە باستادى. بالا قيالىن بۇل كينولار، بەيتانىس اۋەن، وزگە دۇنيە، باسقا ءداستۇر، ادەت-عۇرىپ بالا تۇيسىگىنە الەمدە دە باسقا ەل-جۇرت بار ەكەنىن، ولاردىڭ دا وزدەرىندەي جوقشىلىق، تاپشىلىق، ادىلەتسىزدىك بار ەكەنىن بالا باۋىرجان سول رادج كاپۋردىڭ فيلمدەرىنەن ۇعا باستادى. ول تۋرالى اكەسى ەكەۋى ۇزاق سويلەسكەن. باۋىرجان العاش رەجيسسەر بولۋدى ارماندادى.

مەكتەپ بىتىرۋگە ءبىر-ەكى جىل قالعاندا كينو جايلى جازىلعان ماقالا، بولماسا اكتەرلەردىڭ سۋرەتى بولسا، قيىپ الىپ، جيناپ قوياتىن. باۋىرجان وسىلايشا كينوعا بەت بۇردى. الايدا باۋىرجان مەكتەپ بىتىرگەن جىلى وقۋعا بارا المادى. جەزقازعانداعى تريكوتاج فابريكاسىندا ءبولىم باستىعى بولعان رامازان توسەك تارتىپ قالعان... ۇيدەگى جالعىز بالا... امال نە؟ باۋىرجان اكەسىنىڭ قاسىنان شىعا المادى. دۇنيەدەگى ەڭ قيىنى ءوزىنىڭ وزگەلەردەن بيىكتىگى بىلە تۇرا ساپتىڭ سوڭىندا تۇرعانداي باۋىرجان دا قاتتى قينالعان. امال نە؟! اكەسىن تاستاپ كەتە المادى. قينادى. ەڭ بولماسا قاسىندا بولىپ، كوكەسىنە كومەكتەسەم دەگەن.

ەل قاتارلى وقۋعا بارعان جوق. وزىمەن بىرگە وقىعان كلاسستاستارى، الماتى، قاراعاندى، ءتىپتى بىرەۋلەرى موسكۆا، لەنينگراد سياقتى ۇلكەن قالالارعا كەتتى. بىرەۋلەرى وقۋعا ءتۇستى، بىرەۋلەرى ۇلكەن شاھاردا جۇمىستا قالعان. ال باۋىرجان سول تىگىن فابريكاسىنا كىرىپ، جۇمىسشى بوپ ىستەدى. بىراق كوڭىلدەگى قيال بۇعىپ جاتقان بۇلان كۇش... وعان تىنىشتىق بەرمەگەن... ءوستىپ جۇرگەندە «قازاقفيلمنىڭ» حابارلاندىرۋىن گازەتتەن وقىعان. كەلەر جىلى جاز شىعا باۋىرجان الماتىعا، قازىرگى 8-مارت كوشەسىندەگى «قازاقفيلمگە» كەلدى. بۇل كەزدە كامال سمايلوۆ «قازاقفيلمنىڭ» ديرەكتورى كەزى-ءتىن. كالەكەڭ ول كەزدە ۇلكەن-ۇلكەن ىستەر تىندىرىپ جاتقان. كومسومولدان كەلگەن جاس جىگىت قىرۋار جۇمىس ءبىتىردى. جانە وسى كەزەڭدەردە ايگىلى «قىز-جىبەك» پەن «اتاماننىڭ اقىرى» فيلمدەرى تۇسىرىلگەن ەدى... ك.سمايلوۆ موسكۆاداعى ۆگيك-كە باراتىن جاستارعا «ستسەنارلىق شەبەرحانا» اشتى. ياعني وقۋعا تۇسەتىن بالالارعا دايىندىق كۋرسى ەدى. ونى العاش «قازاقفيلمنىڭ» رەداكتورى لەۆ ۆارشاۆسكي باستاپ، كەيىن ۆالەري ستاركوۆ جالعاستىرعان. ستاركوۆ ءوزى كينونىڭ تاريحىن جاقسى بىلەتىن رەداكتور، وقىعان-توقىعانى كوپ، ءبىلىمدى ادام ەدى. رەجيسسەر بولام دەپ كەلگەن باۋىرجاندى ستاركوۆ ءارى-بەرى تىڭداپ، ونىڭ جازعاندارىن وقىپ-تالداپ، باسقا ۇسىنىس ءبىلدىردى. «سەنىڭ ويلاۋ-تالداۋ، اناليز جاساۋ قابىلەتىڭ جاقسى ەكەن. سەن ودان دا «كينوتانۋ» ماماندىعىنا بارساڭ قايتەدى؟» دەگەن. باۋىرجان كەلىسە كەتتى. ءسويتىپ بارىن سالىپ دايىندالعان. سولاي باۋىرجان ۆگيك-ءتىڭ «كينوتانۋ» ماماندىعىنا ءتۇستى. بۇل كەزدە «قازاقفيلمدە» كاسىبي كينوسىنشىلار جوقتىڭ قاسى-تىن. قازاق كينو ونەرىنىڭ تۇڭعىش سىنشىسى – قابىش سيرانوۆتىڭ تاسى ورگە دومالاپ تۇرعان شاعى-تىن. ستاركوۆتىڭ ويى دا وسى ەدى... ۇلتتىق كادرلەردى دايىنداۋ – ول كەزدە اۋاداي قاجەت بولاتىن. ءبىر ايتا كەتەتىنى سول جىلى قازاقستاننان جەتى جىگىت وقۋعا تۇسكەن.

ولار ماكسيم سماگۋلوۆ، سەرىك رايباەۆ، سلامبەك تاۋەكەل، جاكەن دانەنوۆ، بولات وماروۆ، ساپار سۇلەيمەنوۆ جانە باۋىرجان نوگەربەكوۆ ەدى. باۋىرجان كينوتانۋشى نينا تۋمانوۆانىڭ شەبەرحاناسىنا ءتۇستى. ستۋدەنتتىك جىلدار ۆگيك-ءتىڭ جاتاقحاناسى، موسكۆانىڭ قىزىقتى دا شۋاقتى كۇندەرى زۋ ەتە وتە شىقتى. اسىرەسە ۇلاعاتتى ۇستازى نينا پەتروۆنا تۋمانوۆا وتە ءبىلىمدى، وقىعان-توقىعانى مول كىسى ەدى. جانە ول باۋىرجاندى ەرەكشە جاقسى كوردى. مىنەزى ۇياڭ، كوپ سويلەمەيتىن، سويلەسە ءاردايىم ورنىمەن ءوز ويىن ناقتى دا ءدال جەتكىزەتىن شاكىرتىنەن ءۇمىت كۇتەتىن. ءيا... باۋىرجان ۇستازىنىڭ سەنىمىن اقتادى. «قازاقفيلمگە» كەلگەن سوڭ، رەداكتورلىق جۇمىسقا كىردى. بۇل كەزدەرى «قازاق مۋلتيپليكاتسياسىنىڭ» اياققا تۇرىپ، قاز-قاز باسقان كەزى-ءتىن. «قازاق مۋلتيپليكاتسياسىنىڭ اتاسى» اتانعان امەن حايداروۆ جاقسى ۇيىمداستىرۋشى بولا ءبىلدى. اسىرەسە، «قارلىعاشتىڭ قۇيرىعى نەگە ايىر؟» ءفيلمى جارق ەتىپ ۇشتى. فيلم 1968 جىلى لەنينگراد قالاسىندا وتكەن بۇكىلوداقتىق كينوفەستيۆالدا، 1975 جىلى نيۋ-يورك قالاسىندا وتكەن حالىقارالىق مۋلتيپليكاتسيالىق فيلمدەر فەستيۆالىندە جۇلدەلەر الىپ، جۇلدىزى جانعان كەزى ەدى بۇل. امەن اعامىز موسكۆاعا كەلىپ ۆگيك-تەگى جاستارمەن جولىققان. سەبەبى امەن حايداروۆقا ءبىلىمدى، العىر جاستار كەرەك ەدى. امەن اعا قاتەلەسپەدى. سول جىلى ەكونومفاكتى بىتىرگەن سلامبەك تاۋەكەل، جاكەن دانەنوۆتى – سۋرەتشى-مۋلتيپليكاتور، ال باۋىرجاندى رەداكتورلىق قىزمەتكە شاقىرعان بولاتىن... ويتكەنى باۋىرجان ديپلومدىق جۇمىسىن امەن حايداروۆ ايتقان – «قازاق مۋلتيپليكاتسياسىنىڭ ءوسۋ جولى» تاقىرىبى بويىنشا قورعاعان بولاتىن. سوندىقتان ول «قازاقفيلمگە»  كەلگەن سوڭ رەداكتورلىق جۇمىسقا كىردى. بۇل كەز قازاق مۋلتفيلمىندە امەن اعادان باسقا فلوبەر مۇقانوۆ، تامارا مۇقانوۆا، عاني قىستاۋوۆ، جاكەن دانەنوۆ، سلامبەك تاۋەكەل ت.ب. قىزۋ جۇمىس ىستەپ جاتقان شاعى بولاتىن. باۋىرجان بۇل جەردە ون بەس شاقتى جىل قىزمەت اتقاردى. تەك مۋلتفيلمدەردىڭ عانا ەمەس، «قازاقفيلمدەگى» كوركەم فيلمدەرىنىڭ دە رەداكتورى بولدى.

تالدىقورعان وبلىستىق دراما تەاترىندا اكتەرمىن... وينايتىن رولدەرىم دە، وتباسىم دا، پاتەرىم دە بار. بىراق كوڭىل شىركىن كوك دونەن... ساحناعا سياتىن ءتۇرىم جوق. ونىڭ ۇستىنە ول كەزدە وبلىستىق «وكتيابر تۋى»، رەسپۋبليكالىق «لەنينشىل جاس» گازەتتەرىنە اڭگىمە، ماقالام شىعا باستاعان جوق. اياق استىنان ءبىر كۇنى كىلت بۇزىلدىم. موسكۆاعا ۆگيك-كە بارسام دەدىم... قىسقاسى شىققانى بار، شىقپاعانى بار اڭگىمە، نوۆەللوسىماق جازعاندارىمدى «قازاقفيلمگە» جىبەرگەم... ارادا 2-3 ايدان سوڭ الماتىعا كەلسەم مەنىڭ اڭگىمەلەرىم جايلى «ستسەنارلىق شەبەرحاناسىنىڭ» جەتەكشىسى ەكاتەرينا ۆاسيلەۆنا رۋبانوۆيچ بۇگە-شۇگەسىنە دەيىن قالدىرماي ايتىپ وتىر... سويتسەم مەنىڭ جازعاندارىمدى باۋىرجان نوگەربەك ورىسشاعا اۋدارعان ەكەن. ءيا، وسىلاي باۋكەڭ وسىلاي مەنىڭ ماسكەۋ اتانۋىما ءوز ۇلەسىن قوسقان ازامات بولاتىن... جانە ونى مەن كەيىن... كوپ كەيىن عانا ءبىلدىم. باۋكەڭدى كورگەن سايىن ول كىسىگە دەگەن قۇرمەت، سىيلاستىعىم... سول ءۇشىن «سىزگە راحمەت» دەپ ايتقىزبادى. دۇرىسى، بىردە «باۋكە، باياعى مەنىڭ اڭگىمەلەرىمدى ورىسشاعا اۋدارعانىڭىزعا راحمەت» دەي بەرگەنىمدە ءسوزىمدى ءبولدى. «جارايدى، قويشى ونى» دەگەن. نەتكەن قاراپايىمدىلىق، نەتكەن سىربازدىق، تەكتىلىك...

باۋىرجاننىڭ قازاق مۋلتيپليكاتسياسى تۋرالى جازعان العاشقى كىتابى 1984 جىلى «كوگدا وجيۆايۋت سكازكي» دەگەن اتپەن شىقتى. جانە سول كىتابى ءۇشىن باۋكەڭ «قازاقستان لەنين كومسومولى سىيلىعىنىڭ يگەرى» دە بولدى.

جەتپىسىنشى جىلداردىڭ ورتاسىندا «قازاق تەلەۆيزياسىندا» جەڭىس كۇنىنە ارنالعان حاباردان ۇلى باۋكەڭنىڭ – باۋىرجان مومىشۇلىنىڭ ءبىر سۇحباتىن كورگەنىم بار. باۋكەڭ باسى جالاڭ باس، بۋرىل شاشىن ارتقا قايىرعان، قاسى مەن مۇرتى تىكىرەيگەن... ابايشا ايتقاندا، قويۋ مۇرتى اۋزىنا تۇسكەن، ۇستىندە ويۋى بار، قازاقى شاپان... كىشكەنە ستولدىڭ ۇستىندە سۇحبات بەرىپ وتىر ەكەن. داۋىسى كۇركىرەگەن كۇندەي... بولماسا ارىستاننىڭ اقىرعانى ىسپەتتى. باۋكەڭ سويلەپ وتىر. ءبىر كەزدە جۇدىرىعىمەن ستولدى ءبىر پەرىپ قالعاندا ستاكانداعى سۋ توگىلىپ كەتتى. ءالى كوز الدىمدا. ول ورىسشا «يا پولكوۆنيك ۆ وتستاۆكە، نو نە گراجدانين ۆ وتستاۆكە» دەگەن... سول ءسوز ەسىمدە قالىپ قويىپتى. اللا پۋگاچەۆانىڭ ءبىر ءانى بار ەدى. سوندا ءسوز بار. «ناستوياششي پولكوۆنيك» دەگەن... ءيا، باۋكەڭ ناعىز پولكوۆنيك ەدى-اۋ.

باۋىرجان «قازاقفيلمدەگى» رەداكتورلىقتان سوڭ قازاقستان كينوماتوگرافتار وداعىندا ەكىنشى حاتشى بولىپ ۇزاق ىستەدى. سودان سوڭ عىلىم اكادەمياسىندا، كەيىن قازاق ۇلتتىق ونەر اكادەمياسىندا ۇستازدىق قىزمەتكە اۋىسقان.

1991 جىلى ۇلى يمپەريا كسرو قۇلاعاندا جىلاعانداردان قۋانعاندار كوپ بولدى. تاۋەلسىزدىكپەن بىرگە ەكونوميكالىق كريزيس، ساياسي داڭدارىس، اقشانىڭ قۇنسىزدانۋى، تاعى دا باسقا قيىندىقتار كوپ بولدى. سونىڭ ءبىرى رەسەي ەندى باسقا رەسپۋبليكالاردىڭ ازاماتتارىن وقۋعا قابىلدامادى. ارمان قۋعان جاستاردىڭ تاۋى شاعىلدى. مەن سول كەزەڭدەردە الماتىداعى تەاتر جانە  كوركەمسۋرەت ينسيتۋتىنا باسشى بوپ كەلدىم. وسى شاقتا باۋىرجان بىزدە پرورەكتور بوپ قىزمەت اتقاراتىن. ءبىزدىڭ بولاشاعىمىز ءۇشىن وزىمىزدە بۇرىن بولماعان، تەك موسكۆا، لەنينگراد سياقتى ۇلكەن قالالاردا عانا وقىتاتىن جاڭا مامانداردى دايىنداۋ كەرەك ەدى. سول جاڭادان اشىلعان ون ءۇش  ماماندىقتىڭ ءبىرى – ول كينوتانۋ بولىپ ەدى. باۋىرجان وسى ىسكە بار ىنتاسىمەن، كۇش-قايراتىمەن كىرىسكەن. شىنداپ كەلگەندە باۋىرجان نوگەربەك - تاۋەلسىز ەلىمىزدەگى كينوتانۋ ماماندىعىنىڭ ىرگەتاسىن قالاۋشى. بىردەن ءبىر سونىڭ اۆتورى. باۋىرجاننىڭ العاشقى شاكىرتتەرىنىڭ الدى بۇگىندە ەلىمىزگە، رۋحانياتىمىزعا بىلگىلى تۇلعالارعا اينالدى.

ولار: گۇلجان ناۋرىزبەكوۆا، نازيرا مۇقىشەۆا، گۇلنار ءمۇرسالىموۆا، باقىت قۇتپانباەۆ، نۇربول المانوۆ، بەرىك ءۋالي، اسەل سارسەنبەكوۆا، سامال ەسەنباەۆا، تولقىن قوجاحمەتوۆا.

باۋىرجان نوگەربەك سوزگە كوپ ارالاسا قويمايتىن، جىميىپ قانا وتىرىپ كۇلگەندە وزىنە عانا جاراسقان شوقشا ساقالى سەلكىلدەپ، ءماز بولعاندا كوزى جۇمىلا كەتەتىن.

2010 جىلى قازاقستاننىڭ ەڭبەك ەرى، قازاق ۇلتتىق ونەر ۋنيۆەرسيتەتىنىڭ رەكتورى ايجان مۋساحودجاەۆانىڭ شاقىرتۋىمەن باۋكەڭ استاناعا كەلدى. ايمان قوجابەكقىزى ونەر ورداسىن تەك مۋزىكا ماماندىقتارىنان تۇراتىن ۋنيۆەرسيتەت ەمەس، تەاتر جانە كينو، حورەوگرافيا ماماندارىن دايىندايتىن ونەر ورداسى جاسايىن دەگەن... الايدا كادر ماسەلەسى قاشان دا تاپشى عوي. وسى ورايدا رەكتور الماتىدان بەلگىلى سىنشى اشىربەك سىعاي، كومپوزيتور كەڭەس دۇيسەكەەۆ، كينوتانۋشى باۋىرجان نوگەربەك سىندى مامانداردى شاقىرتتى. وسى كەزەڭدەردە ۋنيۆەرسيتەت ۇشان-تەڭىز جۇمىس اتقارعان... جاستاردى جىل سايىن وسى ماماندىقتارعا قابىلدادى. باۋىرجان نوگەربەكتىڭ بۇل ەكىنشى تىنىسى اشىلعان شاعى-تىن. جانە استاناداعى ۇشان-تەڭىز شارالاردان باۋكەڭ قالمايتىن. ءبىر توعا، سىرباز، ءار سوزىندە، ءار ويىندا ۇلكەن ادامگەرشىلىك، ادامعا دەگەن ۇلكەن سىيلاستىق، كىسىگە دەگەن قۇرمەت - ونىڭ كرەدوسى ەدى.

بۇگىندە باۋكەڭنىڭ 90 جاسقا كەلگەن اناسى ءانىش اپامىز جەزقازعان قالاسىندا، باۋىرجاننىڭ تۇڭعىش ۇلى ساتتاردىڭ قولىندا. باۋىرجاننىڭ وتباسى تۇگەل ونەر اۋىلىندا تۇرادى دەسە دە بولادى. قىزى التىناي – قازاقستاننىڭ ەڭبەك سىڭىرگەن قايراتكەرى، ق.قۋانىشباەۆ اتىنداعى مەمەلەكەتتىك اكادەميالىق قازاق مۋزىكالىق دراما تەاترىنىڭ اكتريساسى. ۇلكەن تالانت يەسى. ويناعان رولدەرى بىرىنەن-ءبىرى اسەم، بىرىنەن-ءبىرى ارتىق وبرازدار سومداپ ءجۇر. كينودا دا التىناي ۇلكەن بيىكتەرگە كوتەرىلدى. باسقاسىن ايتپاعاندا، تەك اقان ساتاەۆتىڭ «اناعا اپارار جولداعى» باستى ءرولى – قازاق ونەرىندەگى ەرەكشە قۇبىلىس دەۋگە بولادى. ۇلدارى ساكەن نوگەربەك تە، باۋبەك نوگەربەك تە اكە جولىن قۋىپ، ۇستازدىق قىزمەتتى تاڭداعان.  ءبىرى استاناداعى قازاق ۇلتتىق ونەر ۋنيۆەرسيتەتىندە، ءبىرى الماتىداعى قازاق ۇلتتىق ونەر اكادەمياسىندا شاكىرتتەر تاربيەلەۋدە. ولار دا كينوتانۋشى. ءتىپتى نەمەرەسى ارايلىم دا كينوتانۋ ماماندىعىن تاڭداعان.

تاۋدىڭ بيىكتىگى – ول الىستاعان سىيىن كورىنەتىنى سياقتى، ۋاقىت وتكەن سايىن قازاق ونەرىنىڭ حاس تۇلپارى باۋىرجان نوگەربەكتىڭ ورنى ۇڭىرەيىپ تۇر. ومىردەن وتكەنىنە ءبىر جىل بوپ قالدى. كەيدە كينوپرەمەرالاردان كورگەندە قۇشاقتاسىپ، امانداسىپ تۇراتىن ەدىك. بۇگىندە تانىس بەينە كورىنبەيدى. ماڭگىلىككە اتتانعان... اتتاس اعاسى باۋكەڭدەردىڭ دۇنيەسىنە ءوتىپتى.  كەي-كەيدە ەسكە باۋكەڭ-باۋىرجان مومىشۇلى تۇسەدى. ناعىز پولكوۆنيك... ءبىزدىڭ باۋكەڭ،  باۋىرجان نوگەربەك تە – ونەردىڭ، كينونىڭ پولكوۆنيگى ەدى. قازاق كينوتانۋ مەكتەبىنىڭ پولكوۆنيگى. مەنىڭ «تىراۋلاپ ۇشقان تىرنالار» دەگەن سپەكتاكلىمدەگى پولكوۆنيك ەسكە ەرىكسىز تۇسەدى. وندا پولكوۆنيك لۋكيانوۆ جاس جاۋىنگەر پەرنەبەك  بورانباەۆتى سىبىردەن – يت جەككەننەن امان ساقتاپ قالۋ ءۇشىن ءوزى قولباسشىعا جۇرەدى. سول ساتتە اكتەر ت.مەيراموۆ قولىن شەكەسىنە قويىپ، «چەست يمەيۋ» دەيدى. باۋكەڭ دە سول اتتاس اعاسىنداي قولىن شەكەسىنە تاقاپ، «چەست يمەيۋ» دەگەن عوي. «چەست يمەيۋ».  وسىندايدا مەن دە قولىمدى شەكەمە قويىپ، اسكەري ادامشا «باۋكە، چەست يمەيۋ» دەگىم كەلەدى. چەست يمەيۋ، باۋكە!

تالعات تەمەنوۆ، قازاقستاننىڭ حالىق ءارتيسى، پروفەسسور 

Abai.kz