قازاقستاندىق جازۋشى ساۋلە دوسجاننىڭ اعىلشىن تىلىندە جارىق كورگەن نوۆەللالار جيناعى 2019 جىلعى «The Man Booker International»(لوندون) سىيلىعىنا ۇمىتكەرلەر تىزىمىنە ەندى.

2018 جىلدىڭ قازان ايىنىڭ باسىندا «Hertfordshire Press» بريتاندىق باسپا ءۇيى ساۋلە دوسجاننىڭ «The tragedy of a bastard» جانە «My own strange heart» اتتى ۇزدىك  نوۆەللالارى ەنگەن پروزا جيناعىنىڭ اعىلشىن تىلىندەگى نۇسقاسىن حالىقارالىق «بۋكەر» ادەبي سىيلىعىنا ۇسىنعان بولاتىن.

جازۋشىنىڭ بۇرىن ەشقايدا جارىق كورمەگەن «The tragedy of a bastard» («كوردەمشەنىڭ قاسىرەتى») حيكاياتى بريتاندىق رەتسەنزەنتتەر تاراپىنان جاقسى پىكىرگە يە بولعان. تانىمال ادەبي سىنشى كەرولاين ۋولتون «Our dear ancestors said honour is more valuable than life» («ءبىزدىڭ قاسيەتتى بابالارىمىز ومىردەن دە قىمبات - ار ەكەنىن ايتىپ وتكەن») رەتسەنزياسىندا «كوردەمشەنىڭ قاسىرەتى» حيكاياتىنىڭ يدەياسى تەرەڭ ەكەنىن اتاپ وتەدى. حيكايات جەتى اتادان قان ارالاستىرماۋ سالتىن ۇستانىپ كەلگەن تەكتى حالىق ۇرپاقتارىنىڭ ۇساقتالىپ، ازىپ بارا جاتقانى تۋرالى ۇلت تاعدىرىنا قاتىستى ۇلكەن پروبلەمانى كوتەرەدى.

ساۋلە دوسجان – جازۋشى، اقىن، جۋرناليست، بىرنەشە ادەبي سىيلىقتىڭ لاۋرەاتى. سونىڭ ىشىندە، جازۋشىنىڭ اعىلشىن تىلىنە اۋدارىلعان «وگەي جۇرەك» شىعارماسى 2017 جىلى شۆەتسيادا وتكەن اشىق ەۆرازيالىق ادەبي كونكۋرسىندا «پروزا» جانرى بويىنشا جۇلدەلى ءىىى ورىندى يەلەنگەن.

جازۋشىنىڭ شىعارمالار جيناعىن اعىلشىن تىلىنە ەلدەن سارىباي ءتارجىمالادى.

ەلدەن سارىباي «پەرو» جەكە قورىنىڭ نەگىزىن قالاۋشى ءھام ۇيىمداستىرۋشىسى، اقىن-اۋدارماشى، ساياساتتانۋشى. 1989 جىلى الماتى قالاسىندا تۋعان، لوندون ۋنيۆەرسيتەتىندە ءبىلىم العان.

بۇل اسا ابىرويلى ادەبي سىيلىقتىڭ شورت-پاراعىنا ىلىنگەن جەتى ۇمىتكەردىڭ ارقايسىسى 1000 فۋنت كولەمىندە سىياقى الادى.

ال جەڭىمپازعا 50 مىڭ فۋنت بەرىلەدى. بۇل سوما اۆتور مەن اۋدارماشىعا تەڭ بولىنەدى.

اbai.kz