ءۇمىت ساۋلەسىن تۋدىرعان سايلاۋ
بۇل سايلاۋعا «حالىقتى ساياسي شىڭداۋ تاجىريبەسى» دەگەن ات بەرەر ەدىم.
سايلاۋ قورىتىندىسىنا كوڭىلى تولماي، «داۋسىمدى جەپ قويدى»، «ءۇمىتىمدى ءسوندىردى»، «بەكەر بارعان ەكەم، وسىلاي بولارىن ءبىلدىم عوي»، «ەندى سايلاۋعا بارماسپىن» دەپ رەنجىپ جاتقاندار كوپ. ودان بولەك وكپەسى قارا قازانداي بوپ جۇرگەن تاۋەلسىز باقىلاۋشىلار دا تابىلىپ جاتىر. «تاڭعى ساعات التىدان بارىپ، ءتۇن اۋعانشا سابىلعان ەڭبەگىم، تۇستەنۋگە شىقپاي، دارەتحاناعا بارماي جۇرگەندەگى قايران ءتىرلىگىم بوسقا كەتتى» - دەپ جاتىر.
بيلىكتىڭ شەشىمىنە باس شۇلعىعان قوسانوۆتى جەردەن الىپ، جەرگە سالىپ، قارعىس ايتىپ جاتقاندار بار. بۇل وكپە-رەنىشتىڭ ءبارى، ءبىر جاعىنان، ورىندى. ويتكەنى بۇل سايلاۋدىڭ سوڭى ەكىنشى تۋردى تالاپ ەتەتىن بەيبىت شەرۋگە ۇلاسۋى كەرەك ەدى.
ەكىنشى جاعىنان، ءبىر كۇندىك بەلسەدىلىكپەن دەموكراتيا ورناتقان ەشكىم جوق.
وسى ناتيجەنىڭ وزىنەن كوپ نارسە الىپ تۇرمىز.
1) حالىقتىڭ ساياسي بەلسەندىلىگى ارتتى.
2) قۇقىقتىق ساۋاتى اشىلدى.
3) سايلاۋشى مەن باقىلاۋشىنىڭ تاجىريبەسى كۇشەيدى (اسىرەسە باقىلاۋشىنىڭ ماڭىزى جانە مۇمكىندىگىمەن تانىستىق).
4) سايلاۋ ءادىل بولعان جاعدايدا جەڭىس كىمنىڭ جاعىنا اۋاتىنىن كوردىك.
5) بيلىك بۇكىل رەسۋرستارى مەن رىچاگتارىن ىسكە قوسىپ، وزىنە تاۋەلدى قۇرىلىمدار ارمياسىن ىسكە قوسىپ جاتىپ، كۇمانسىز كارتينا كورسەتە المادى.
6) كەلەسى سايلاۋدا مۇمكىندىگىمىز اناعۇرلىم ارتاتىنىن بايقادىق. سەبەبى پوستنازارباەۆتىق كەزەڭدە بيلىككە كىم كەلسە دە اۆتوريتاريزم السىرەيدى.
ادەتتەگىدەي قوعامدىق ليدەرلەر دەفيتسيتى ءالى دە بار. بۇل اتقا ءجۇز پايىز لايىق بولماسا دا، گەوگرافياسى مەن بيوگرافياسى جاعىنان حالىقتىڭ جاعىنا شىعادى-اۋ دەگەن ءبىر ادامىمىزدىڭ سولقىلداقتىق تانىتۋىنىڭ ءوزى بىزگە تاجىريبە بولدى.
ول ءۇشىن قوسانوۆقا رەنجۋدىڭ دە قاجەتى جوق؟ سەبەبى، ءبىز ونىڭ قانداي دەڭگەيدەگى قىسىمعا توتەپ بەرە الماعانىن بىلمەيمىز. وبەكتيۆتى-سۋبەكتيۆتى سەبەپتەرى بىزگە بەيمالىم بوپ قالا بەرەدى. ارينە، تاباندىلىق كورسەتە الماعانى وكىنىشتى. بيلىكپەن الدىن الا كەلىسىمگە وتىرعانى دا راس شىعار. بىراق ماسەلە وندا ەمەس. سەبەبى حالىق قوسانوۆقا داۋىس بەرگەن جوق. جالپاق جۇرت ونى تانىمايدى. سويتە تۇرا داۋىس بەردى. حالىق قوسانوۆقا ەمەس، جۇيەگە داۋىس بەردى. قوسانوۆ بۇدان كەيىنگى ناۋقاندارعا كانديداتتىعىن ۇسىنا قويماس. بايمەنوۆ سياقتى ول دا بيلىكتىڭ ءبىر بۇرىشىنان ورنىن تابار.
ال حالىق جۇيەمەن ارى قاراي كۇرەسەدى.
بىراق كەلەسى جولى بەلسەندىلىك سايلاۋ كۇنى عانا ەمەس، كانديداتتى تىركەۋدەن باستالۋ قاجەت ەكەنىن كوردىك. باقىلاۋشىلارعا كەلسەك، قانشاما تاۋەلسىز باقىلاۋشىلار جەمىستى ەڭبەك كورسەتتى. بەلسەندى باقىلاۋشىلاردىڭ ۋچاسكەلەرىندە قوسانوۆ جەڭىپ جاتتى. ءوزىمنىڭ عانا اينالامداعى تانىس-ءبىلىس جىگىتتەردىڭ اراسىنان سونداي ون شاقتى جىگىت شىعىپ، كورگەن بىلگەندەرىن، كەلەسى جولى ەسكەرەتىن تاجىريەلەرىن ايتىپ جاتىر. رەسپۋبليكا بويىنشا سونداي ازاماتتار قانشاما. ولاردىڭ ءبارى كەلەسى سايلاۋدا ارتىنان تالاي «شاكىرت» ەرتىپ، تاجىريبەسىمەن ءبولىسىپ، ىقپالىن كۇشەيتەدى دەگەن سەنىمدەمىن.
تاۋەلسىز باقىلاۋشىلاردى توبىن ۇيىمداستىرىپ، ولاردىڭ زاڭدىق ساۋاتىن اشىپ، سايلاۋ ەرەجەسىمەن تانىستىرعان دەموكراتيالىق ۇيىمدار، جەكەلەگەن بەلسەندى ازاماتتار، تاۋەلسىز بلوگەرلەر، ازاتتىق راديوسىنىڭ ۇجىمى العىسقا لايىق.
ساكەن نۇرقابەكۇلىنىڭ facebook-تەگى پاراقشاسىنان
Abai.kz
