بۇرىنعى ۇلتتىق ەكونوميكا ءمينيسترى قۋاندىق بيشىمباەۆ تۇرمەدەن شىقتى. بۇل تۋرالى بۇگىن ەكس-ءمينيستردىڭ ادۆوكاتى ءمادي مىرزاعاراەۆ مالىمدەدى.
قۋاندىق بيشىمباەۆ قر قىلمىستىق كودەكسىنىڭ 28-بابىنىڭ 3-بولىگى ("قىلمىستىق قۇقىق بۇزۋشىلىققا سىبايلاس قاتىسۋشىلاردىڭ تۇرلەرi"), 189-بابىنىڭ 4-بولىگى 2-تارماعى ("سەنiپ تاپسىرىلعان بوتەن مۇلiكتi يەمدەنiپ الۋ نەمەسە تالان-تاراجعا سالۋ") جانە 366-باپتىڭ 4-بولىگى ("پارا الۋ") بويىنشا ايىپتالعان بولعان.
2018 جىلدىڭ ناۋرىز ايىندا وعان قاتىستى "10 جىلعا باس بوستاندىعىنان جانە ءومىر بويىنا مەملەكەتتىك قىزمەتتەردە باسشىلىق لاۋازىمدارىندا جۇمىس ىستەۋ قۇقىعىنان ايىرىلسىن. جازاسىن ماكسيمالدى قاۋىپسىز مەكەمەدە وتەسىن، سونداي-اق، مۇلكى تاركىلەنسىن", - دەگەن سوت ۇكىمى شىققان.
ودان كەيىن ەكس-مينيستر وزىنە جاقسىباەۆ، جاقىپوۆ دەگەن ازاماتتاردىڭ كەسىرى تيگەنىن ايتىپ، ەلباسى نۇرسۇلتان نازارباەۆتان كەشىرىم سۇراعان.
"بارلىق جەتىستىكتەرىم مەملەكەت باسشىسىنىڭ ارقاسىندا. "سامۇرىقتا", "بايتەرەكتە", مينيسترلىكتە، قايدا جۇمىس ىستەسەم دە مەملەكەت باسشىسى بەرگەن تاپسىرمالاردى ورىنداۋعا تىرىستىم. مەن سياقتى جاس ازاماتقا سەنىپ، وعان جانە ەلگە قىزمەت ەتۋگە مۇمكىندىك بەرگەنى ءۇشىن پرەزيدەنتكە شەكسىز العىس ايتامىن.
پرەزيدەنتتىڭ الدىندا كىنالى ەكەنىمدى بىلەمىن. ءوزىم جۇمىسقا شاقىرعان جاقسىباەۆ، جاقىپوۆ جانە باسقالار ماعان كەسىرىن تيگىزدى. كادرلاردى تاڭداۋ كەزىندە قاتتى قاتەلەستىم. ادامداردى وزىمە جاقىنداتتىم. ولار سەنىمىمە كىرىپ، مەنى پايدالانىپ كەتتى. پرەزيدەنتتەن كەشىرىم سۇرايمىن، حالىقتان وسى ءۇشىن كەشىرىم سۇرايمىن",-دەگەن ەدى سول كەزدە.
كەيىنىرەكتە بيشىمباەۆتىڭ تۋىستارى ەكس-ءمينيستردىڭ اباقتىدا اراب جانە قىتاي تىلدەرىن ۇيرەنىپ جاتقانىن ايتقان.
ءتۇيىن. حوش! سونىمەن، بيشىمباەۆ مەرزىمىنەن بۇرىن بوساپ شىقتى. مەرزىمىنەن بۇرىن بوساپ شىعۋ دەمەكشى، وتكەندە، شىلدەدە اباقتىدا وتىرعان "قازاتومونەركاسىپ" ۇلتتىق كومپانياسىنىڭ ەكس-باسشىسى مۇحتار جاكىشەۆتىڭ دە ءىسى قارالىپ، مەرزىمىنەن بۇرىن بوساتۋ ماسەلەسى ءسوز بولعان. ەسىمىزدە.
مۇحتار جاكىشەۆ سوتتى بولىپ، تۇرمە كورگەلى دە 9 جىل بولدى. ونىڭ دەنساۋلىعىنىڭ ناشارلاعانى جايلى بىرنەشە مارتە ايتىلدى. تۇرمەدە ونىڭ كوزىنە وتا جاسالعانى دا بەلگىلى. قارت اناسى ۇلىنا راقىمشىلىق جاساۋدى سۇراپ، پرەزيدەنتكە حات تا جازدى. جاكىشەۆتى قولداۋشى جۇرت وعان اراشا سۇراپ، قول جينادى دا. ودان كەيىن قىلمىستى بولعان ازاماتتاردىڭ كەيبىرى 2016 جىلى تاۋەلسىزدىكتىڭ 25 جىلدىعىنا وراي راقىمشىلىق جاساۋ تۋرالى زاڭنىڭ اياسىندا بوساپ شىقتى. ال 2009 جىلى تۇتقىندالىپ، 2010 جىلى سوتتالعان جاكىشەۆ سول وتىرعاننان ءالى وتىر.
Abai.kz
