رەسەي پرەزيدەنتى ۆلاديمير پۋتين اشحابادتا ءوتىپ جاتقان تمد ەلدەرى باسشىلارى كەڭەسىندە ورتاق ۆاليۋتا ەنگىزۋ ماسەلەسىن تاعى دا ۇسىندى. 

ورتاق اقشا جايلى اڭگىمەنىڭ ايتىلىپ جۇرگەنى بۇگىن عانا ەمەس. بۇعان دەيىن ەاەو-قا مۇشە ەلدەرگە ورتاق ۆاليۋتا ەنگىزسەك دەپ ارمانداپ جۇرگەندەر از ەمەس ەدى. ەندى پۋتين بۇدان دا اسىپ ءتۇسىپ، تمد ەلدەرىندە ورتاق قارجى نارىعىن قالىپتاستىرساق، ءبارىمىز باي-باقۋاتتى بولار ەدىك دەپ تامسانىپ وتىر.

ونىڭ ايتۋىنشا، ورتاق ۆاليۋتا بۇكىل الەمدە بولىپ جاتقان ساۋدا سوعىستارى مەن تاۋارلار قوزعالىسىنا ءارتۇرلى شەكتەۋلەر تاپ بولاتىن ماسەلەلەردى شەشۋگە كومەكتەسەدى ەكەن. ءارى مۇنداي ۇدەرىستەر تمد ەلدەرىنىڭ ورتاق باسەكەگە قابىلەتتىلىگىن جوعارىلاتادى دەپ سانايدى.

رەسەي 2010 جىلدان باستاپ ەۋرازيالىق ەكونوميكالىق وداق اياسىندا بىرىڭعاي ۆاليۋتاعا كوشۋدى ۇسىنىپ كەلە جاتقانىن بىلەمىز. ماسكەۋدىڭ بۇل ۇسىنىسىن قولدايتىندار جوق ەمەس. بيىل جىل باسىندا بەلارۋس پرەزيدەنتى الەكساندر لۋكاشەنكو رەسەيمەن ارادا ورتاق ۆاليۋتا ەنگىزۋدى جانە ورتاق ەميسسيالىق (قۇندى قاعازدار) ورتالىق قۇرۋدى قولدايتىنىن ايتقان. «قازىر بىزگە ورتاق ۆاليۋتا ەنگىزۋ تۋرالى ۇسىنىس ءتۇسىپ جاتىر. ءبىز مۇنى قولدايمىز! جانە بۇل ۆاليۋتا – رۋبل بولادى», - دەگەن ەدى بەلارۋس باسشىسى.

ال قىرعىز پرەزيدەنتى سوورونباي جەەنبەكوۆ ورتاق اقشانى قولدايتىنىن وتكەن جىلى ايتقان بولاتىن.

«مەن ەاەو بولاشاعىنا سەنەمىن. ءبىزدىڭ مۇمكىندىگىمىز جوعارى. ەۋرووداقتا ورتاق ۆاليۋتا بار.  ارينە، ءبىز دە سوعان كەلەمىز، بىراق ۋاقىت كەرەك»، دەگەن ەدى جەەنبەكوۆ.

ورتاق ۆاليۋتانى قولدايتىن ساياساتكەرلەر ءبىزدىڭ ەلدەن دە تابىلادى. ەاەو ەلدەرىمەن بىردەي اقشا پايدالانساق شەكەمىز شىلقىپ ءومىر سۇرەر ەدىك دەگەن تۇسىنىك قالىپتاسىپ تا ۇلگەرگەن. ءتىپتى كەيبىر دەپۋتاتتارىمىز اشىق ايتىپ تا ءجۇردى. ورتاق ۆاليۋتا تاۋەلسىزدىككە قاۋىپتى ەكەنى ايتىلعانىمەن، بۇل ۇسىنىستىڭ تامىرىنا ءالى تولىق بالتا شابىلعان جوق. سول ءۇشىن تمد-عا، ەاەو-قا مۇشە ەلدەر وسى باستان قاتاڭ تۇردە قارسىلىق تانىتپاسا، رەسەي ەرتە مە، كەش پە ورتاق ۆاليۋتا ەنگىزۋ ماقساتىنا جەتەتىن بولادى...

Abai.kz