Senbi, 4 Säuir 2020
COVID-19 QAZAQSTANDA. Jwqtırğandar — 500. Jazılğandar — 35. Qaytıs bolğandar — 4
El işi... 2775 23 pikir 7 Aqpan, 2020 sağat 16:53

Isqaqov üşin qalanıñ qalay ataluı mañızdı emes eken

Pavel men Petrdiñ atın iemdengen soltüstiktegi qazaqtıñ qos qalası Täuelsizdik deytin kieli wğımnıñ qadirin ketirip twr. Astananı Nwr-Swltanğa äp-sätte auıstıratın bizdiñ bilik osı eki qalağa kelgende nege kümilji beredi?!

Bwl mäsele qoğam tarapınan az aytılıp, az jazılıp jatqan joq. Äsirese, bıltır astana atauı özgergende qoğam belsendileri qos qalanıñ atın qazaqşalau turalı birneşe ret mäsele köterdi. Olar Pavlodar qalasın Sarıarqa yaki Ertis dep ataudı nemese şaharğa qazaqtıñ soñğı hanı Kenesarınıñ atın beru turalı birneşe ret wsınıs jasağan. Alayda, ol wsınıstardıñ birde-bireui bilik tarapınan qoldau tappadı.

Endi bwl mäsele oblısqa jañadan tağayındalğan äkim Äbilhayır Isqaqovtı da aynalıp ötpedi. Alayda ol bwl mäselege asa bas qatırmaytının, odan da aymaq twrğındarınıñ jağdayın jaqsartudı oylaytının aytıptı. Isqaqov BAQ ökilderine bergen swhbatında:

-Qalanıñ atın auıstıru mäselesi kün tärtibinde twrğan joq. Qaladağı belgilerdi özgertu, barlıq qwjattama mäseleleri ülken şığın. Bwl biznes üşin de, memlekettik organdar üşin de öte ülken jwmıs. Bwl mäseleniñ tek bir jağı. Ärine, tarihi mädenietke, kelbetke, qalanıñ qalıptasuına mañızı bar. Biraq meniñ oyımşa, qazir biz bwl mäseleni birinşi orınğa qoymauımız kerek. Bwl meniñ pikirim...,- dedi.

Sonday-aq, ol qalanıñ atın auıstıru barlıq mäseleniñ şeşimi emes degendi aytıptı. YAğni, Isqaqovqa qalanıñ atı qanday bolsa da mañızı joq.

Alayda, eks-prezidenttiñ "Ruhani jañğıru" deytin bağdarlamasın birinşi bolıp qolday ketetin de Isqaqov siyaqtılar emes pe? Endeşe, nağız "Ruhani jañğıru" keñestik kezeñniñ atributtarınan arıludan bastalatının jap-jaña äkim tüsinse deymiz. Bälkim, bwl mäselege şendilerdiñ aqılı jetkenmen batılı jetpeytin bolar. Biraq, azattıq alğanına 30 jılğa juıqtağan eldiñ eñ bolmasa eki qalanı qazaqşalauğa batılı jetpese, Täuelsizdikke de kümänmen qaraytındar köbeymey me?

Onıñ üstine qazir qaladağı qazaqtardıñ ülesi artıp keledi. Äkimdik mälimetine süyensek, şahardağı qazaqtar - 46,9 %, orıstar – 41,8 %-dı qwraydı eken. Sonımen qatar, Pavlodardan tarihi otanı Reseyge köşip jatqandardıñ köptiginen öñirdegi key auıldar tipti bos qalıp jatqanı aytılğan bolatın. Al, bos qalğan jerlege oñtüstikten köşip jatqan qazaqtar sanı az emes. Demek, bwl qalanıñ atı orıstanıp twr demeseñiz, zatı qazaqılanıp keledi. Endeşe, nege osınday sätti paydalanbasqa?

Tüyin. Juırda ğana osı Pavlodarda 13 köşeniñ atı qazaqşalanıp, köpşilikti quanttı. Karl Markstı Älihannıñ atına auıstırıp, Volodarskiy köşesin - 1986 jılğı Jeltoqsan köterilisiniñ qwrmetine atağan Kereku jwrtı qala atın da qazaqşalauğa müddeli dep senemiz. Tek, oğan basşılıqtıñ batılı ğana kerek bop twr.

Nwrbike Bekswltanqızı

Abai.kz

23 pikir