Düysenbi, 10 Tamız 2020
COVID-19 QAZAQSTANDA. Jwqtırğandar — 99442. Jazılğandar — 72523. Qaytıs bolğandar — 1058
46 - söz 1795 7 pikir 9 Şilde, 2020 sağat 11:13

Bir qadam alğa, jartı qadam artqa

nemese prezidenttiñ  ündeui turalı bir auız söz

Prezident telearnalardan kezekti ündeuin jariya etip, halqınıñ aldına şıqtı. Onısı dwrıs boldı.

Iä, el işinde aytılıp jürgen biraz jayttardı qozğadı. Ol da bir qadam bolsa da alğa jılju dep esepteymin.
YAğni, prezident jwrttıñ köñil-küyinen birşama habardar bolsa kerek.

Medicina salasın tığırıqqa tiregen DM-niñ "bwrınğı basşılığınıñ jüyelik kemşilikteri" turalı da ayttı. Ol da dwrıs.

Däri-därmek bağaların jönsiz şarıqtatıp jibergenderdiñ qılmıstıq derlik äreketi tergelip jatqanın da ayttı. Ol da orındı.

Ne jetpedi?

TJ kezi men karantin kezinde jwmıssız, tabıs közinsiz qalğan ağayın men toqtap qalğan otandıq biznestiñ tağdırına qatıstı eşnärse aytılmadı. Ne äleumettik kömek joq, ne käsipkerlerge naqtı qarjılay qoldau mehanizmi joq.

Osı künderi jwrt qoğam ömiriniñ köptegen salasınıñ jazda, küzde ne bolatının qızu talqılap jatır. Mäselen, iri jäne şağın käsiporındar qalay jwmıs istemek, mektep pen universitterdegi oqu procesi qalay jürgizilmek jäne tt. Olarğa äli de jauap joq.

Iä, tiisti memlekettik komissiya bar. Olar öz aqparatın bere jatar.

Biraq osınau el basına kün tuğan tağdırlı kezeñde eñ bastı mäseleler jöninde jwrt öz prezidentiniñ kesimdi de şeşuşi pikir aytuın kütedi. Al ol degeniñiz jauapkerşilikti tömengi jaqqa sırğıtpay, öz moynına alu degen ülken söz.

Tört ay boyına indetpen arpalısıp, ärbir jan üşin küresip jatqan därigerler qauımına qosımşa qanday kömek boladı? Ol da aytılmadı.

Meniñşe, eldiñ öz prezidentinen kütkeni naq osı, naqtı kömek mäselesi edi!

Iä, byudjet jağdayı qiın. Onı tüsinemiz.

Biraq kezinde jeke bankterdi dağdarıstan qwtqaruğa 12 milliardtay dollar jwmsağanda asa qinala qoymağan bilik nege qarapayım halıqqa, öz biznesine kömektesuge kelgende "şıq bermes, Şığaybayğa" wqsap, sonday jomarttıq tanıtpaydı?

Osındayda, şın mäninde el qırılıp jatqan näubet kezinde nege Wlttıq qordan tiisti qarjı qarastırılmaydı? 60 milliardqa juıq ol edäuir qordı kim üşin, ne üşin saqtap otırmız?! Öytpese, erteñ kömekke mwqtaj adam da qalmaydı ğoy!

PS. Osınau sıni kezeñde prezidenttiñ el aldına jii şığıp twrğanı dwrıs. Halıqpen birge ekenin körsetsin.

Tek onday jariya şığısı -

tikeley efir bolsa,

bügingidey tım kelte qayrılmasa,

aldın-ala tüsken swraqtarğa, sonıñ işinde, sıni sipattağı hattarğa, mäselen, keşegi salyutke qatıstı aşulı sözderge, jauap berse,

qağazğa qaramay, jandı äri öz sözimen elimen sırlassa,

eldegi jağdaydı jüyeli türde qiındatıp jibergen biliksiz byurokrattardıñ atın atap, tüsin tüstep, sol sätte qatañ jauapkerşilikke tartsa -

degen käsibi tehnologiyalıq-kommunikaciyalıq wsınıstar bar...

PS 2. Aytpaqşı, nege aldağı parlament saylauınan dämeli partiyalar qala men auılda qinalıp qalğan ağayınnıñ mwñ-mwqtajın prezidentke aşıq aytıp, jetkizbeydi? Osınday kezde halıqtıñ sözin söylese, bälkim, erteñ saylauda jwrttıñ beti beri qarar ma edi, ä? Älde joğarı jaqtıñ rwqsatın kütip otır ma?

PS 3. Nege osı bizdiñ basşılardıñ orıs tilindegi sözderi ana tilindegi mätinge qarağanda anağwrlım mändi de mazmwndı, sondıqtan - mañızdı bop şığa beredi?

Ämirjan Qosanovtıñ jazbası

Abai.kz

7 pikir