Düysenbi, 16 Qırküyek 2019
Bizdiñ şeneunik 6582 0 pikir 11 Qaraşa, 2015 sağat 16:22

MAMITBEKOV MAL BAĞA ALA MA?

Auılşaruaşılığı ministri Asıljan Mamıtbekov juırdan beri tağı da BAQ-tıñ «batırı», yağni bas keyipkerleriniñ biri bolıp jatır. Öytkeni, mwnaydıñ älemdik narıqtağı qwnı kemip, dağdarıs küşeygen sayın Qazaqstan öziniñ agrarlıq el ekendigin esine tüsirip jantalasuda.

Şındıqtı bwra tartpayıq, memleket osı künge deyin auılşaruaşılığın subsidiyalaudan bas tartqan emes. Sonıñ nätijesinde jılda pälenbey pwt astıq bastırıp, şetelderge eksprottap kelemiz. Tört tülik mal da eselep köbeydi. Jılıjaylar salınuda. Bwnıñ bäri jaqsı, ärine. Maldıñ twqımın asıldandıramın dep Asıljan Sarıbaywlı Gollondiyadan ala bas siırlar men bwqalardı da äkeldi. Onısınan biraq ausıl şığıp 700 basın örtep tındıq. Qısqası, 2011 jıldan beri Auılşaruaşılığı ministriniñ orıntağına mıqının mıqtap  batırğan Mamıtbekov barğa ie bolıp qana jür desek jañsaq ketpeymiz. Öytkeni, Sarıbaywlı saylanıp jwmısqa  kiriskendey  sıñay tanıtqanımen bitip jatqanı şamalı. Auılşaruşılığın memleket qazınası asıru kerek ekendigin, tipti, Prezidenttiñ özi de moyındap  qalğanğa wqsaydı. Qırküyek ayında astıqtı oblıstardı aralağan saparında Nazarbaev: «Biz auılşaruaşılığına qarjı böluden tınbay kelemiz, alayda qaytarım az. Auılşaruaşılığın qarjılandırmasa jäne bolmaydı... Endi sizder mınanday dağdarıs kezinde elge järdemderiñizdi tigiziñizder», - degendi ayttı dihandarğa qarap. Änebir küni jiın ötkizgen Mamıtbekov te Elbasınıñ sözin alğa tarta otırıp bir şındıqtıñ basın aşqanday boldı.

-         Biz, - dedi ol, - egistik jerleri bar dihandarğa ökimetten alıp qarjı beremiz. Al, olar jerdi jırtıp öñdeudiñ nemese auılşaruaşılığına qajetti tehnikalardı satıp aludıñ ornına Djip köligin satıp alğan. Söytip ziyan keltirgen, qaytarımsız berilgen qarjını jelge wşırğan!

Ministr osılay dep biraz keyip söyledi. Söytip söziniñ soñında: «Endi subsidiya tek jerden önim ala alatın mümkindigi bar qojalıqtarğa ğana beriledi», - dep qortındı jasadı.

Osındayda, «apır-au» deysiñ eriksiz. Apır-au, sonda qarjı dağdarısı bolmasa, mwnaydıñ qwnı älemdik narıqta kemimese, ministr Djip mingişterdi körmeytin be edi? Bw qaytkeni? Bwl, anığına köşsek, auılşaruaşılığı salasında dwrıs eseptiñ, baqılaudıñ joqtığın bildiredi.  Monitoring joq. Swrıptau joq. Tüptep kelgende mwnıñ aqırı tağı da jeñ wşınan jalğasatın tirlikke barıp tireledi. Abai.kz ministrdi «paraqor», «korrupcioner» ataudan aulaq. Alayda, bası darday istiñ ayağı qılday bop bituine sebep:  Auılşaruaşılığınıñ «aulasınan» tıs oyındarda jatqan siyaqtı . Osını baspasözdiñ sınınan qorıqpaytın, är sözine jauaptı Asıljan Sarıbaywlı qanşalıqtı biledi eken? Endi bilui, juıq arada memleket qarjısına swrau salıp nauqan bastauı äbden mümkin. Öytkeni bizde bülingen birdeñege bireu kinäli boluı tiis. Al, naqtısına jüginsek, şirek ğasırdan beri auılşaruaşılığın jaña sapağa köşire almağan Auılşaruaşılığı ministrligi (bwrınğı soñğı ministrlerdi qos alğanda) aldımen jauap berui qajet.

Bwl taqırıpta äñgime wzaq. Sondıqtan qısqa qayırayıq. Mamıtbekov mırza mal bağa ala ma? Dwrıs wğıñız, Mamıtbekovke eşkim mal baqtırayın dep otırğan joq. Biraq Asekeñ bügingi maldıñ twyağın qazaqtıñ öz malınıñ wrqımen asıldandıra ala ma? Äy, qaydam? Öytkeni Sarıbay balası da özge «balalar» sekildi şetelşil, qala berdi reseyşil. Sodan ğoy Niderlandıdan ala bas siırlar äkelip jürgeni. Onısın bağa almay qırıp salğanın joğarıda ayttıq. Al, eger ministr qazaq malınıñ tabiğatın biletin jan bolsa, tipti, bilmey-aq qoysınşı, biletinderdiñ tilin alatın kisi bolsa, alısqa emes, Altayğa baratın edi. Altayda, Şığıs Qazaqstan oblısınıñ Zaysan audanımen şekaralas Şäueşek degen qala twr (QHR ŞWAR). Sol qalada, sol öñirde aruağıñnan aynalayın Başpay atamnıñ arqarmen budandasqan altı müyizdi qoşqarları jayılıp jür. Ärqaysısınıñ salmağı 200-250 kele tartadı. Etti, jündi. Äri qazaq dalasınıñ tabiğatımen bite qaynap birge tuğan töl. «Qoşqardıñ basın alamız deseñder de, wrığın alamız deseñder de, meyilderiñ», - deydi Başpay babamnıñ qoyın bağıp jürgen arğı bettegi ağayındar. Başpay qoyları –  Qıtayda eñ bağalı qoylar. Qıtay ökimeti onı brendtegeli jür. Menşiktep almaq. Al, mında biz otırmız: eldiñ ausıl basqan ala bas siırların bağıp, bağa almsaq örtep, külin şaşıp.

Maldıñ twqımın asıldandıru degennen şığadı. Sonau swm zamanda, Stalinniñ «qızıl qırandarı» qılışın jalañdatıp, jartı älemdi «halıq jaularınıñ» lagerlerine aynaldırğan jıldarda, Qarağandı jerindegi  Karlagta jazasın ötegen ğalımdar qorlıq pen zorlıqtı köre jürip, qazaq dalasınan tömendegidey maldıñ twqımın örgizipti. QARAÑIZDAR:

Bwl taqırıpqa aldağı künderi qaytıp oralamız. Äzirge aytpağımız mınau: eger Mamıtbekov «mal bağa alatın» bolsa, osınday twqımdı osı künge deyin tirilte alsa kerek edi. Joq, ökinişke qaray olay bolmay twr.

Däuren Quat

Abai.kz           

0 pikir