Senbi, 21 Qırküyek 2019
«Abai.kz» reytingi 3359 0 pikir 27 Jeltoqsan, 2017 sağat 11:29

Jıldıñ sayasi kelbeti

2017 jıl elimiz üşin jaqsılığı men qiınşılığı, quanışı men ökinişi, jañalığı, tosındığı qosqabat almasqan şaq boldı. Mine, ümit pen küdik arpalısqan osı bir uaqıt mejesiniñ tarih qoynauına enuine de birneşe kün qaldı.

Bwl jıl Qazaqstannıñ sayasi, äleumettik, ruhani ömirine de tıñ özgerister ala kelgeni belgili.

Memleket basşısı «Qazaqstannıñ Üşinşi jañğıruı» strategiyasın jariya etkennen keyin elimizde sayasi, ekonomikalıq jäne ruhani modernizaciya bastaldı.

Prezident pen zañ şığaruşı, atqaruşı bilik arasındağı mindet bölinisi, ekonomikanı ärtaraptandıru jäne qoğamdıq sananı jañğırtu kün tärtibine şıqtı.

Bilik bwl bastamağa halıqtı, qoğamdı barınşa jwmıldıruğa, tartuğa tırısqanın, onıñ birşama nätije bergenin de körip otırmız.

Sayasi elita ökilderi de meylinşe belsendi boluğa tırısıp baqtı. Bwrın bayqala bermeytin mwnday qwbılısqa qoğamdağı, aqparat keñistigindegi, äleumettik jelidegi äreket, oy, pikirlerdiñ qozğau salğanı tağı anıq.

Osını eskerip, «Abai.kz» öziniñ sayasi jıl qorıtındısında 2017 jılğı eñ ıqpaldı, tanımal sayasatkerlerdiñ reytingin tüzudi jön kördi. Reyting tüzu kezinde bizdiñ saytta, sonday-aq özge de aqparat qwraldarında jii atı atalğan, joğarı lauazımdağı sayasatkerlerdiñ qızmet-äreketine jiti taldau jasaldı. Sarapşılardıñ oy-pikirlerine basa köñil bölindi.    

Sonımen, 2017 jılğı «Jıldıñ sayasi kelbeti» mınaday:

 1. Ädilbek Jaqsıbekov

Memleket basşısı Ä.Jaqsıbekovti 2016 jıldıñ jazında Prezident Äkimşiligine qaytara äkeldi.

Bwl, birinşiden, Memleket basşısınıñ Jaqsıbekovke degen ülken senimin añğartadı. Ekinşiden, Üşinşi jañğıru kezeñinde Prezident Äkimşiligi siyaqtı asa jauaptı bilik tarmağına zor täjiribesi men ıqpalı bar twlğanıñ qajet bolğanın körsetedi.

Ädilbek Jaqsıbekov qazirgi uaqıtta «Modernizaciya 3.0» jobasın tabıstı iske asıruğa jauaptı äri bilik bölinisiniñ tetigin qolına wstap, sayasi elitanıñ teñgerimin jüyelep, saqtauğa ıqpal etip otır.

 2. Kärim Mäsimov

Qazaqstannıñ Ükimetin eñ wzaq uaqıt basqarğan K.Mäsimov qazir Wlttıq Qauipsizdik Komitetiniñ tizginin mıqtap wstap otır.

2017 jıl sayasi ğana emes, küştik, qwqıq qorğau qwrılımdarınıñ arasındağı mindet bölinisimen, işinara reformalarımen de este qaladı. Bwl özgerister kezinde  wtısqa şıqqan bir organ bolsa, ol – Kärim Mäsimov basqaratın WQK.

Bügingi küni Wlttıq Qauipsizdik Komitetiniñ qwzıreti küşeyip, onıñ törağasınıñ ıqpalı barınşa arttı.

 3. Marat Täjin

Soñğı jıldarı «Avgiydiñ at qorasına» aynalğan ideologiyalıq salanı jönge keltirudi Elbasınıñ Marat Täjinge tapsıruı sarapşılar tarapınan da, qoğam tarapınan da qoldau tapqanı anıq.

Onıñ üstine, 2017 jılı memlekettik, qoğamdıq mañızı twrğısınan Elbasınıñ «Ruhani jañğıru» bağdarlaması kün tärtibinde birinşi orınğa şıqtı. Bağdarlamanı iske asıru üşin aqparattıq-ideologiyalıq resurstar, sarapşılar men ziyalı qauım, ortalıq, jergilikti atqaruşı bilik tolıqtay jwmıldırıldı. Jalpı ideologiyalıq saladağı jwmıs memlekettik, wlttıq sipat aldı.

Osı bağıttağı maqsat-mindetterdi jüzege asıru jwmısın M.Täjin asa biliktilikpen jürgizip otır.

 4. Qasım-Jomart Toqaev

Biılğı jılı Senat ta, Senat spikeri de aytarlıqtay belsendilik tanıttı. Senat deputattarınıñ qoğamdıq, äleumettik ötkir mäselelerge aralasa bastauın sarapşılar Qasım-Jomart Toqaevtıñ twlğasımen tikeley baylanıstıradı.

Senat spikeri eldegi ğana emes, halıqaralıq deñgeydegi aytulı oqiğalardan da tıs qalğan joq. Aşıq pikirlerin, saliqalı oyların qoğamğa üzbey jetkizip otırdı.

Onıñ, äsirese, äleumettik jelilerde Siriyadağı, Qazaqstan men Qırğızstan arasındağı ahual turalı, işki mäseleler turalı jazbaları ülken qoldauğa ie boldı.

 5. Nwrlan Nığmatulin

Mäjilis törağası N.Nığmatullin biılğı jılı Mäjilis qızmetin halıqqa barınşa aşıq körsetuge tırıstı. Mäjilis otırıstarınan tikeley efirler berildi.

Ol Ükimet sağattarındağı  ministrler men lauazımdı twlğalarğa qarata aytılğan sındarımen sarapşılardıñ esinde qalıptı.

Sayasi jañğırudıñ ayasında Parlamenttiñ, sonıñ işinde Mäjilis qwzıretiniñ küşeyui de Nığmatulliniñ ıqpalın arttıra tüsui mümkin.

 6. Baqıtjan Sağıntaev

2016 jıldan beri Ükimetti basqarıp kele jatqan B.Sağıntaevtıñ qızmeti ünemi qoğamnıñ nazarında, atqaruşı biliktiñ is-äreketi jwrttıñ talqısında boldı.

Baqıtjan Sağıntaevtıñ operativti jwmıs jasau maşığın, käsibi biliktiligin Ükimettiñ plenarlıq otırıstarınan bayqauğa boladı. Lauazımınıñ erekşeligine qaray Ükimet basşısı talay märte sınnıñ astında da qaldı.

Alayda, menedjer retinde ol nätijeli jwmıs jasadı deydi sarapşılar.

 7. Timur Qwlıbaev

Timur Qwlıbaevtı jwrt Qazaqstandağı auqattı äri ıqpaldı adam retinde biledi.

Alayda, ünemi tasada jürudi qalaytın biznesmen osı jılı memlekettik deñgeydegi şaralardan, ükimettik jiındardan jii töbe körsetti. Käsipkerlerdiñ qwqın qorğau, biznes jürgizudi zañ ayasında jeñildetu mäselesinde Ükimetpen de teke-tiresip qalıp jürdi.

Biılğı jılı T.Qwlıbaev öziniñ sayasi bolmısın da birşama añğartqanday.

 8. Ahmetjan Esimov

 

A.Esimov «EKSPO-2017» halıqaralıq körmesiniñ ötuine baylanıstı eldiñ köz aldında boldı.

Körme tabıstı ötkizilgennen keyin sarapşılar Esimovtiñ qayda baratınına naqtı boljam jasay almağan edi. Al, Ahmetjan Esimov küni keşe «Samwrıq-Qazına» wlttıq äl-auqat qorınıñ törağası bolıp tağayındaldı.

«Samwrıq-Qazına» qorınıñ el ekonomikasınıñ lokomotivi ekenin, negizgi önerkäsipti qwrauşı kompaniyalardıñ barlığı osı qordıñ qwramına kiretinin eskersek, onıñ poziciyası bwdan äri de nığaya tüsetinin bayqaymız.

 9. Jaqıp Asanov

Qwqıq qorğau organdarınıñ jabıqtığına, tipti salqındığına eti üyrenip ketken jwrtşılıq biılğı jılğı Bas prokuraturadağı özgeristerdi jılı qabıldağan tärizdi.

Qazir qızmeti auısqanımen Jaqıp Asanov Bas prokuraturada atqarğan qızmeti arqılı birşama tanımaldıqqa, bedelge ie boldı.

Prokuratura jwmısınıñ aşıqtığın qamtamasız etu, öz işin biliksiz kadrlardan tazalau jäne paraqorlıqpen küresu äreketi bwrınğı bas prokurordıñ bastı eñbegi sanaladı.

 10. Däuren Abaev

D.Abaev Ükimet qwramındağı jas sayasatkerlerdiñ tobına jatadı. Soğan qaramastan Aqparat jäne kommunikaciyalar ministri osı salada birqatar özgerister engizuge talpınıp jatır. Eñ bastısı, ol jurnalistermen, jwrtşılıqpen barınşa aşıq, jüyeli qarım-qatınas jasau jağında ekenin isimen körsetip jür. Sarapşılar Däuren Abaevtıñ qızmetin oñ bağalauda.

Abai.kz

0 pikir