Düysenbi, 25 Mausım 2018
463 0 pikir 14 Mamır, 2018 sağat 08:46

Özbekstanda tağı bir sayasi twtqın türmeden şıqtı

Oppoziciyalıq Özbekstan halıq qozğalısınıñ belsendisi Fahriddin Tillyaev 12 mamırda türmeden bosap şıqtı. Eñbek migranttarınıñ qwqıqtarın qorğaumen aynalısqan belsendi 2014 jılı "adam saudası üşin" 11 jılğa sottalğan edi.

Fahriddin Tillyaev Özbekstan Joğarğı sotınıñ şeşimi negizinde bostandıqqa şıqqanın ayttı. "Meniñ bosağanımdı habarladı, sot anıqtamasımen tanıstırdı, qwjattarğa qol qoyuımdı swradı, sosın köşege şığardı", - dedi ol.

Eske salayıq, 2014 jılı 6 naurızda Taşkent qalasınıñ qılmıstıq ister jönindegi Şayhontohur audandıq sotı Fahriddin Tillyaevti 10 jıl jäne 8 ayğa türmege qamağan. Onımen birge tağı bir özbek belsendisi Nüriddin Jwmaniyazov 8 jıl jäne üş ayğa sottalğan. Sot bwl ekeuin de adam saudasımen aynalıstı dep ayıptadı. 2016 jılı 31 jeltoqsanda Nüriddin Jwmaniyazov türmede qaytıs boldı.

Tillyaevtiñ äriptesteri tört jıl boyı oğan qarsı istiñ qoldan wyımdastırılğanın, istiñ sayasi astarı barın aytıp keldi. Halıqaralıq adam qwqıqtarın qorğau wyımdarı Tillyaevti türmede azaptağanı turalı habarlağan.

"Meni azaptadı. Sotqa deyin azaptadı. Azaptau türmede de toqtağan joq. Meni qinadı, qısım körsetti. Mısalı, tırnaq astına jäne ayaq sausaqtarınıñ arasına ine tıqtı. Tırjalañaş şeşindirip, ayazdı künderi köşege quıp şığardı, mwzday su şaştı. Şınşırmen tabannan wrdı. Altı adam meni azaptadı, menimen bilgenin istedi. Men türmede ötkizgen künderime ökinemim. Öytkeni men bostandığımnan, erkindigimnen, bärinen ayrıldım", - dedi adam qwqığın qorğauşı.

Sottalğanğa deyin Fahriddin Tillyaev pen Nüriddin Jwmaniyazov mardikorlar - qara jwmısşılardıñ täuelsiz käsipodağın qwrıp, eñbek migranttarınıñ qwqıqtarın qorğaumen şwğıldanğan. Türmeden şıqqan küni Tillyaev adam qwqıqtarın qorğay beretinin mälimdedi. "Men wyım jwmısın jalğastırğım keledi. Ädiletsiz sottalğan din ökilderiniñ qwqıqtarın qorğap, solardıñ sottarına qatısqım keledi", – dedi ol.

Abai.kz

0 pikir