دۇيسەنبى, 25 ماۋسىم 2018
462 0 پىكىر 14 مامىر, 2018 ساعات 08:46

وزبەكستاندا تاعى ءبىر ساياسي تۇتقىن تۇرمەدەن شىقتى

وپپوزيتسيالىق وزبەكستان حالىق قوزعالىسىنىڭ بەلسەندىسى فاحريددين تيللياەۆ 12 مامىردا تۇرمەدەن بوساپ شىقتى. ەڭبەك ميگرانتتارىنىڭ قۇقىقتارىن قورعاۋمەن اينالىسقان بەلسەندى 2014 جىلى "ادام ساۋداسى ءۇشىن" 11 جىلعا سوتتالعان ەدى.

فاحريددين تيللياەۆ وزبەكستان جوعارعى سوتىنىڭ شەشىمى نەگىزىندە بوستاندىققا شىققانىن ايتتى. "مەنىڭ بوساعانىمدى حابارلادى، سوت انىقتاماسىمەن تانىستىردى، قۇجاتتارعا قول قويۋىمدى سۇرادى، سوسىن كوشەگە شىعاردى", - دەدى ول.

ەسكە سالايىق، 2014 جىلى 6 ناۋرىزدا تاشكەنت قالاسىنىڭ قىلمىستىق ىستەر جونىندەگى شايحونتوحۋر اۋداندىق سوتى فاحريددين تيللياەۆتى 10 جىل جانە 8 ايعا تۇرمەگە قاماعان. ونىمەن بىرگە تاعى ءبىر وزبەك بەلسەندىسى ءنۇريددين جۇمانيازوۆ 8 جىل جانە ءۇش ايعا سوتتالعان. سوت بۇل ەكەۋىن دە ادام ساۋداسىمەن اينالىستى دەپ ايىپتادى. 2016 جىلى 31 جەلتوقساندا ءنۇريددين جۇمانيازوۆ تۇرمەدە قايتىس بولدى.

تيللياەۆتىڭ ارىپتەستەرى ءتورت جىل بويى وعان قارسى ءىستىڭ قولدان ۇيىمداستىرىلعانىن، ءىستىڭ ساياسي استارى بارىن ايتىپ كەلدى. حالىقارالىق ادام قۇقىقتارىن قورعاۋ ۇيىمدارى تيللياەۆتى تۇرمەدە ازاپتاعانى تۋرالى حابارلاعان.

"مەنى ازاپتادى. سوتقا دەيىن ازاپتادى. ازاپتاۋ تۇرمەدە دە توقتاعان جوق. مەنى قينادى، قىسىم كورسەتتى. مىسالى، تىرناق استىنا جانە اياق ساۋساقتارىنىڭ اراسىنا ينە تىقتى. تىرجالاڭاش شەشىندىرىپ، ايازدى كۇندەرى كوشەگە قۋىپ شىعاردى، مۇزداي سۋ شاشتى. شىنشىرمەن تاباننان ۇردى. التى ادام مەنى ازاپتادى، مەنىمەن بىلگەنىن ىستەدى. مەن تۇرمەدە وتكىزگەن كۇندەرىمە وكىنەمىم. ويتكەنى مەن بوستاندىعىمنان، ەركىندىگىمنەن، بارىنەن ايرىلدىم", - دەدى ادام قۇقىعىن قورعاۋشى.

سوتتالعانعا دەيىن فاحريددين تيللياەۆ پەن ءنۇريددين جۇمانيازوۆ مارديكورلار - قارا جۇمىسشىلاردىڭ تاۋەلسىز كاسىپوداعىن قۇرىپ، ەڭبەك ميگرانتتارىنىڭ قۇقىقتارىن قورعاۋمەن شۇعىلدانعان. تۇرمەدەن شىققان كۇنى تيللياەۆ ادام قۇقىقتارىن قورعاي بەرەتىنىن مالىمدەدى. "مەن ۇيىم جۇمىسىن جالعاستىرعىم كەلەدى. ادىلەتسىز سوتتالعان ءدىن وكىلدەرىنىڭ قۇقىقتارىن قورعاپ، سولاردىڭ سوتتارىنا قاتىسقىم كەلەدى", – دەدى ول.

Abai.kz

0 پىكىر