Düysenbi, 17 Mausım 2019
Dabıl 15195 49 pikir 25 Mamır, 2018 sağat 09:22

Sayragül Sauıtbaydı Qıtayğa qaytaru – eldigimizge sın!

Redakciyadan: Küni keşe ğana «Abai.kz» aqparattıq portalınıñ redakciyasına Asan Nwrbolat esimdi azamat bas swğıp, jeñgesi Sayragül Sauıtbaydı şekaralıq policiya (WQK) ökilderi kelip, alıp ketkenin habarladı. Artınşa Asannıñ aytuı boyınşa  «Şekaralıq policiya ökilderi «Qıtay swratıp jatır» dep jeñgemdi alıp ketti»  attı maqala jariya boldı. Qoğam belsendilerimen kezdesken Asan beyneündeu jasap, äleumettik jelige şığardı.

Sol küni «Qamşı.kz» saytı Wlttıq qauipsizdik komitetiniñ resmi jauabın jariyaladı. 

«Abai.kz» kötergen mäselege jäne «Qamşı.kz» saytında jariyalanğan WQK jauabına oray, belgili advokat Abzal Qwspan öz pikirin jazıp, poştamızğa joldağan edi.


Keşegi «Qamşı.kz» saytında jariyalanğan WQK jauabına oray mınanı mälimdegim keledi:

Sayragül Sauıtbaydı Qıtayğa qaytaru, ol – eldigimizge sın! Sayragüldiñ isi - ol onıñ jäne onıñ otbasınıñ nemese oralmandarğa ğana qatıstı is emes, barlıq, özin qazaqpın dep esepteytin Halıqtıñ isi!

Men äzirge Sayragüldiñ advokatı emespin, ol üşin tuıstarımen kelisim-şartqa otıruım kerek. Zañ talabı solay. Alayda, «Qamşı.kz» saytındağı qısqa ğana WQK jauabın oqi otırıp, mınaday oy tüyip otırmın;

«Sayragül Sauıtbaydıñ QR aumağına kiretin zañdı qwqığı bolmağan. Sebebi onıñ QKP (Qıtay kommunistik partiyası bolar) müşelerine şetelge şığuğa mümkindik beretin tölqwjatı tartıp alınğan (balabaqşa meñgeruşisi bolıp jwmıs istegen).

Säuir ayında Qıtaydıñ şekara qızmetindegi jemqor şeneunikterdiñ kömegimen "Qorğas" ŞIHO-ğa kiretin jalğan rwqsatnama jasap alıp, şekaranı zañsız kesip ötken» - deydi.

Endi osı sözderge nazar audarsaq, şekaranı kesip ötu faktisi eki ayğa jetpeytin uaqıt aralığında, yağni säuir ayında bolğan. Sonda qalay, osı uaqıt işinde Qıtay jağı «şekara qızmetindegi jemqor şeneunikterdi» anıqtap, olarğa sot ükimin şığartıp, ol zañdı küşine enip ülgergen be? Qıtayda sot ükimi şığarılmağan adamdı ayıptap söyleuge zañ mümkindik bere qalğan jağdaydıñ özinde, Qazaqstannıñ zañı boyınşa ol mümkin emes, bwl jerde bizdiñ WQK öz zañımızdı basşılıqqa aluı kerek.

Odan keyin, balabaqşa meñgeruşisi Qıtaydan şığuğa bolmaydı, onıñ tölqwjatı tartıp alınğan degen ne söz? Biz sonda şınımen Qıtay jağınıñ bwl uäjimen kelisip, öz qandastarımızdı osılay op-oñay jığıp bere salmaqpız ba? Eger ol Qıtaydıñ qauipsizdik organdarında qızme etse tüsinuge boladı, al balabaqşa meñgeruşisi biz bilmeytin qanday memlekettik qwpiyanı jariya etui mümkin?

Sonımen qatar, Qıtaydan Qazaqstanğa tölqwjatsız, bir rettik rwqsatnamamen öte aladı degenge öz basım senimsizdikpen qaraymın. Qoldanıstağı zañ talaptarına säykes, adamnıñ jeke basın säykestendiru (identifikaciya liçnosti) tölqwjat arqılı jüzege asırıladı. Al, rwqsatnama tölqwjattı almastıra almaydı. Osığan baylanıstı, Qazaqstan tarapınan şekara qızmeti ökilderine qatıstı Sayragül Sauıtbaydıñ QHR-dan QR-ğa memlekettik şekaranı zañsız kesip ötu faktisi boyınşa qılmıstıq is qozğaldı ma eken, älde is tek qana Sayragülge ğana qatıstı qozğalıp otır ma degen zañdı swraq tuındaydı mende.

Ärine, äzirge ol iske tikeley aralasa almağan soñ, qolda bar aqparat boyınşa boljam jasau ğana qoldan keledi, degenmen qazir barlıq BAQ ökilderi bwl mäseleni barınşa taratıp qoğamnazarına wsınbasa, WQK şekara qızmeti Sayragül Sauıtbaydı Qıtayğa berip jiberui äbden mümkin närse, ol özderiniñ profil'di zañdarımen naqtı közdelgen.

Sondıqtan, zañger retinde Sayragül Sauıtbayğa nemese onıñ tuıstarına meniñ tarapımnan naqtı wsınıs, ol – Qazaqstan Respublikası Prezidentiniñ janındağı Azamattıq mäseleleri jönindegi komissiya aldında Sayragül Sauıtbayğa sayasi baspana swrau!

Qıtaydağı qazaqtardıñ qısımğa wşırap jatqanı qazirgi tañda bükil älemge mälim, onıñ üstine WQK jauabınan-aq körinip twrğanday balabaqşa meñgeruşisi qızmetin atqarğanı üşin, elden şığuğa tiım salu faktisiniñ özi-aq, Sayragüldiñ azamattıq qwqığın ayaqqa taptau bolıp tabıladı.

Sonımen qatar, bwl mäselege adam qwqıqtarı jönindegi uäkil, yağni ombudsmen Asqar Şakirovtıñ da nazarın audaru qajet. Sayragüldiñ mında, Qazaqstanda zañdı nekedegi küyeui jäne kämeletke tolmağan balaları bar ekenin este wstayıq.  Sayragül Sauıtbaydıñ özi äzirge Qazaqstannıñ azamatı emes şığar, biraq ol birinşi kezekte ADAM! Änşeyinde, boqtan özgeniñ bärine aralasatın, al qazaq mäselesine kelgende jwmğan auzın aşpaytın ombudsmenniñ biz üşin paydası bar ma, joq pa sınalatın kezi keldi.

Bwl mäseleni, bir Sayragüldiñ tuıstarınıñ moynına artıp qoymay bükil el bolıp, qoğam bolıp köteruimiz qajet! Sonda ğana nätije boluı mümkin! Sonda ğana qandasımızdı AJALdan aman alıp qala aluımız mümkin...

Abzal Qwspan, advokat

Abai.kz

49 pikir