Jwma, 20 Qırküyek 2019
Bizdiñ şeneunik 2006 2 pikir 24 Şilde, 2018 sağat 09:30

Şımkenttik äkim halıqtı meyramhanada qabıldaydı

Şımkenttik äkimder qaşanda kreativti oylarımen erekşelenedi. Jaqında ğana elimizdiñ üşinşi megopolisine aynalğan Şımkent qalasına qarastı äl-Farabi audanınıñ äkimi Ğabit Mäulenqwlov halıqpen kezdesuin qımbat meyramhanada ötkizip, aydı aspanğa bir-aq şığardı.

Jañadan tağayındalğan äkim özine bağınıştı qwrılım basqaruşılarımen jaqın tanısıp, jwmısın bastamas bwrın jergilikti ziyalı qauım ökilderin aq dastarhan basına şaqırudı jön köripti. "Ay-ğasır" meyramhanasında ötken kezdesude audan aqsaqaldarı bata berip, Abdul Hamit Qattani meşitiniñ naib imamı äruaqtarğa qwran bağıştağan. Bwl turalı audan äkimdiginiñ feysbuk paraqşasında jariyalandı.

Äkim - jergilikti biliktiñ aynası. Ärine, qazaqılıq reñk berip, äruaqtarğa qwran oqıtu bir qarağanda dwrıs ta şığar. Biraq, bwl asqa qarjı qaydan alındı? Memleketten be? Eldiñ şökimdep jiğan salığın meyramhanada as beruge jwmsauğa eşkimniñ haqısı joq. Bwl - bir. Ekinşiden, "qarjı äkimniñ jeke qaltasınan tölendi" degenniñ özinde aşıqtan aşıq (äleumettik jelige jariyalap) ziyalı qauımnıñ auzın maylap,  tamaqqa toydıru sıbaylas jemqorlıqqa jol aşarı anıq. "Su işken qwdığına tükirmeytin qazaq, türli jağday tua qalsa Mäulenqwlovtıñ dastarhanın attap kete almaytını tağı anıq. Üşinşiden, bwl ürdis basqa äkimderge "ülgi” bolıp ketse, sorımız jäne qaynaydı. Dastarhan bası - ağıl-tegil tilek pen maqtau üşin taptırmaytın orın. Mwnıñ paydasınan ziyanı köp ekenin meyramhanada kezdesu ötkizbey-aq körip jürgen joqpız ba?

Jalpı, Şımkenttik äkimderdiñ erekşelenuge beyim ekenin jii añğaramız.

Osığan deyin Şımkent qalasınıñ äkimi Ğabidolla Äbdirahmanov ta äkimdiktiñ barlıq basşılarına:  “Jwmısqa qoğamdıq kölikpen kelip, keşke qoğamdıq kölikpen ketuin talap etemin. Bolmasa şaytanarbamen jüruge boladı. Onı özderiñiz  şeşiñizder", - degeni esimizde. Tipti, ülgermey qalıp avtobustıñ artınan jügirgen de osı Ğabidolla äkim bolatın. Äkimniñ osı tapsırmasınan keyin äleumettik jelide “avtobusta selfi jasap jatqan şeneunikter köbeyip” tegin komediyağa qarq bolğan edik. Tipti, barlıq avtobusta kölik jolı böliminiñ basşısı Quatjan Jwmataevtıñ suretin ilip tastap, qoğamdıq köliktiñ problemalarına kim jauaptı ekenin tüsindirmek bolğandığı tağı bar.

Biz osınday arzan piardı körip jürgen Mäulenqwlovtıñ halıqpen kezdesuin qımbat meyramhanada ötkizuine tük te tañ qalğan joqpız. Tek bwl "indet" özgelerge jwqpay twrıp, saqtandırğımız keledi.

Äkimmen kezdesu toyğa aynalmauı kerek. Asta-tök dastarhan jayıp, bata tilep, qol jayıp jürgen Mäulenqwlovtıñ sıbağasın Ğabidolla Äbdirahmanov beruge tiis. Al, köşede şaytanarba minip, ädemi suretterge tüsudi ğana biletin Şımkent qalasınıñ äkimi turalı alda tağı da jaza jatarmız. Äzirge osı!

Nwrbike Bekswltanqızı

Abai.kz

2 pikir