شىمكەنتتىك اكىمدەر قاشاندا كرەاتيۆتى ويلارىمەن ەرەكشەلەنەدى. جاقىندا عانا ەلىمىزدىڭ ءۇشىنشى مەگوپوليسىنە اينالعان شىمكەنت قالاسىنا قاراستى ءال-فارابي اۋدانىنىڭ اكىمى عابيت ماۋلەنقۇلوۆ حالىقپەن كەزدەسۋىن قىمبات مەيرامحانادا وتكىزىپ، ايدى اسپانعا ءبىر-اق شىعاردى.

جاڭادان تاعايىندالعان اكىم وزىنە باعىنىشتى قۇرىلىم باسقارۋشىلارىمەن جاقىن تانىسىپ، جۇمىسىن باستاماس بۇرىن جەرگىلىكتى زيالى قاۋىم وكىلدەرىن اق داستارحان باسىنا شاقىرۋدى ءجون كورىپتى. "اي-عاسىر" مەيرامحاناسىندا وتكەن كەزدەسۋدە اۋدان اقساقالدارى باتا بەرىپ، ابدۋل حاميت قاتتاني مەشىتىنىڭ نايب يمامى ارۋاقتارعا قۇران باعىشتاعان. بۇل تۋرالى اۋدان اكىمدىگىنىڭ فەيسبۋك پاراقشاسىندا جاريالاندى.

اكىم - جەرگىلىكتى بيلىكتىڭ ايناسى. ارينە، قازاقىلىق رەڭك بەرىپ، ارۋاقتارعا قۇران وقىتۋ ءبىر قاراعاندا دۇرىس تا شىعار. بىراق، بۇل اسقا قارجى قايدان الىندى؟ مەملەكەتتەن بە؟ ەلدىڭ شوكىمدەپ جيعان سالىعىن مەيرامحانادا اس بەرۋگە جۇمساۋعا ەشكىمنىڭ حاقىسى جوق. بۇل - ءبىر. ەكىنشىدەن، "قارجى اكىمنىڭ جەكە قالتاسىنان تولەندى" دەگەننىڭ وزىندە اشىقتان اشىق (الەۋمەتتىك جەلىگە جاريالاپ) زيالى قاۋىمنىڭ اۋزىن مايلاپ،  تاماققا تويدىرۋ سىبايلاس جەمقورلىققا جول اشارى انىق. "سۋ ىشكەن قۇدىعىنا تۇكىرمەيتىن قازاق، ءتۇرلى جاعداي تۋا قالسا ماۋلەنقۇلوۆتىڭ داستارحانىن اتتاپ كەتە المايتىنى تاعى انىق. ۇشىنشىدەن، بۇل ءۇردىس باسقا اكىمدەرگە "ۇلگى” بولىپ كەتسە، سورىمىز جانە قاينايدى. داستارحان باسى - اعىل-تەگىل تىلەك پەن ماقتاۋ ءۇشىن تاپتىرمايتىن ورىن. مۇنىڭ پايداسىنان زيانى كوپ ەكەنىن مەيرامحانادا كەزدەسۋ وتكىزبەي-اق كورىپ جۇرگەن جوقپىز با؟

جالپى، شىمكەنتتىك اكىمدەردىڭ ەرەكشەلەنۋگە بەيىم ەكەنىن ءجيى اڭعارامىز.

وسىعان دەيىن شىمكەنت قالاسىنىڭ اكىمى عابيدوللا ءابدىراحمانوۆ تا اكىمدىكتىڭ بارلىق باسشىلارىنا:  “جۇمىسقا قوعامدىق كولىكپەن كەلىپ، كەشكە قوعامدىق كولىكپەن كەتۋىن تالاپ ەتەمىن. بولماسا شايتاناربامەن جۇرۋگە بولادى. ونى وزدەرىڭىز  شەشىڭىزدەر", - دەگەنى ەسىمىزدە. ءتىپتى، ۇلگەرمەي قالىپ اۆتوبۋستىڭ ارتىنان جۇگىرگەن دە وسى عابيدوللا اكىم بولاتىن. اكىمنىڭ وسى تاپسىرماسىنان كەيىن الەۋمەتتىك جەلىدە “اۆتوبۋستا سەلفي جاساپ جاتقان شەنەۋنىكتەر كوبەيىپ” تەگىن كومەدياعا قارق بولعان ەدىك. ءتىپتى، بارلىق اۆتوبۋستا كولىك جولى ءبولىمىنىڭ باسشىسى قۋاتجان جۇماتاەۆتىڭ سۋرەتىن ءىلىپ تاستاپ، قوعامدىق كولىكتىڭ پروبلەمالارىنا كىم جاۋاپتى ەكەنىن تۇسىندىرمەك بولعاندىعى تاعى بار.

ءبىز وسىنداي ارزان پياردى كورىپ جۇرگەن ماۋلەنقۇلوۆتىڭ حالىقپەن كەزدەسۋىن قىمبات مەيرامحانادا وتكىزۋىنە تۇك تە تاڭ قالعان جوقپىز. تەك بۇل "ىندەت" وزگەلەرگە جۇقپاي تۇرىپ، ساقتاندىرعىمىز كەلەدى.

اكىممەن كەزدەسۋ تويعا اينالماۋى كەرەك. استا-توك داستارحان جايىپ، باتا تىلەپ، قول جايىپ جۇرگەن ماۋلەنقۇلوۆتىڭ سىباعاسىن عابيدوللا ءابدىراحمانوۆ بەرۋگە ءتيىس. ال، كوشەدە شايتاناربا ءمىنىپ، ادەمى سۋرەتتەرگە ءتۇسۋدى عانا بىلەتىن شىمكەنت قالاسىنىڭ اكىمى تۋرالى الدا تاعى دا جازا جاتارمىز. ازىرگە وسى!

نۇربيكە بەكسۇلتانقىزى

Abai.kz