Jwma, 20 Qırküyek 2019
Dep jatır 2457 10 pikir 10 Qırküyek, 2018 sağat 15:50

"Bwl orınğa jabısıp qalğan eşteñem joq"

QR Wlttıq sport qauımdastığınıñ prezidenti Bekbolat Tileuhan bügin Astanada Düniejüzilik köşpendiler oyındarınıñ qorıtındısına oray baspasöz jiının ötkizdi. 

Jiın barısında Bekbolat Tileuhan soñğı köşpendiler oyınında orın alğan kökparşılarğa qatıstı keleñsiz oqiğanı tüsindirip, jurnalisterdiñ swraqtarına jauap berdi.

Abai.kz saytı aldımen kökpar dodasınıñ jartılay finalında Özbekstannan jeñilgen qazaq kökparşılarınıñ äreketi sayasat pa degen swraq töñireginde taldau jasap, odan keyin "qazaq kökparşıları özbekterden ädeyi jeñildi" dep ayıptağan qırğız azamatınıñ sözine QR Wlttıq sport qauımdastığınıñ jauap beruin talap etken edi.

Bügin atalğan qauımdastıqtıñ prezidenti Bekbolat mırza el aldında bergen tüsiniktemesine nazar audarıp, öz swraqtarımızdıñ jauabın izdedik. Bekbolat Qanaywlınıñ aytuınşa, Özbekstannan jeñiluimizge bizdiñ qwramanıñ täjiribesizdigi sebep bolğan. Qırğız jerine elimizdiñ ekinşi qwramı barğan eken.

— Köşpendiler oyınına bizdiñ eresekter qwraması barğan joq. Aldıñğı eresekter qwraması barğan kezde bizdiñ kökparşılar ekinşi orın alıp qalğan. Sondıqtan, jalpı kökparşılarmen, osı saladağı mamandarmen aqıldastıq. Bwl Aziya nemese Älem çempionatı emes, bar bolğanı festival' ğoy. Biz bwl dodağa jastar komandasın saldıq. Jastar da dodağa tüsip, sol sınnan ötui kerek. Qırğızstanda oynağan - Qazaqstannıñ jastar komandası. Maqsatımız orındaldı. Bardı, oynadı, öte jaqsı därejede öner körsetti dep oylaymın, - dedi Bekbolat Tileuhan.

QR Wlttıq sport qauımdastığınıñ prezidenti äleumettik jelidegi köpşiliktiñ elimiz kökpar qwramasın qattı sınap jatqanına kelispeydi. Ol kisiniñ aytuınşa, sportta jeñis pen jeñilis qatar wğım. Onıñ üstine, elimizde ötken jarısta qırğız sportşılarına qiyanat jasaldı degen bos söz eken.

— Sport bolğannan keyin bireu jeñedi, bireu jeñiledi. Eresekterdi jibersek, jeñetinimiz anıq. Endi jastar da kirispey me!? Bizdiñ jetekşi retinde aldımızğa qoyıp otırğan negizgi maqsat bar - bwl ädildik. Qazaqstannıñ jerine kep oynağanda, audarıspağıñız bolsın, kökparıñız bolsın - ädildikten bir santimetr tayğan jeri joq. Öytkeni, qalıptasu kezeñindegi oyın bolğannan keyin bastalmay jatıp, ädiletsizdikke baratın bolsaq, berekesi ketip qaladı, - deydi ol.

Bekbolat Tileuhan sonımen qatar, Wlttıq sportqa bölingen qarjınıñ qayda jwmsalğanın da aytıp berdi. Ol kisiniñ aytuınşa, Wlttıq sportımızğa bölinetin qarjınıñ mölşeri az bolğandıqtan qajet kezde qarjını basqa jaqtan izdeuge de tura keletin körinedi.

— Aşığın aytayın, osı uaqıtqa deyin 200 million teñge bölindi. 40 payızğa juığı jülde qorına ketti. Onı bilu qiın emes. Jeñis twğırında twrğan sportşılar qolına sertifikattı wstap twr ğoy. Sonda sanap alsañızdar, sol somanıñ 30-40 payızı şığadı.

Basıñnan tömen qaray aspa-tök aqşa tögilip jatsa qızıq şığar?! Aynalıp kelgende anağan-mınağan jalpaqtap jalığasıñ. "Äy, jigitter, bere twrıñdarşı. Senderge bergenge aqşa bolmay twr. Osınıñ bir esebin tabarmın" dep özderine jalınıp ketesiñ, - dey kele Bekbolat Tileuhan osı uaqıtqa deyin wlttıq sport türlerin örkendetuge üles qosıp jürgen azamattarğa alğısın bildirdi.

Söz soñında Wlttıq sport qauımdastığınıñ prezidenti qızmetinen ketuge de qarsı emes ekenin ayttı. Soñğı uaqıtta Bekbolat Tileuhannıñ ornın bosatuın talap etuşiler qarası artqan bolatın.

Däl qazir quana-quana ketuge dayınmın. Jwmısımdı istey alatın adam wsınsa, ornımdı qazir-aq bosatuğa dayınmın. Bwl orınğa jabısıp qalğan eşteñem joq. Men özime tiesili jwmıstı orındadım dep oylaymın. Äli de orınday bermekpin.

Tağı da aytayın, Bwl orınğa jabısıp qalğan eşnärsem joq. Rahatanıp basqarıp, atın şığarıp otır dese — ol ekinşi mäsele. Jasıratın eşteñesi joq. At pen tanımaldılıqqa zäru bolıp jürgen adam emespin. "Wlttıq sport Bekbolatqa kerek pe? Bekbolat wlttıq sportqa kerek pe?" degen tağı bir mäsele bar. Maqtanıp jatqanım joq. "Taza minsiz asıl söz şer tolqıtsa şığadı" demekşi, aldılarıñızda şerimdi tarqatıp otırmın, - dep qorıtındıladı sözin Bekbolat Tileuhan.

Ayta ketsek, osığan deyin Qırğız Respublikasında ötken İİİ Düniejüzilik köşpendiler oyındarında Qazaqstan qwraması jalpıkomandalıq esepte ekinşi orın alğan bolatın. Sonday-aq, özbekten jeñilgen qazaq kökparşıları köşpendiler oyınınıñ qola jüldegeri atanğan.

Quanış Qappas

Abai.kz

10 pikir