سەنبى, 25 مامىر 2019
دەپ جاتىر 2262 10 پىكىر 10 قىركۇيەك, 2018 ساعات 15:50

"بۇل ورىنعا جابىسىپ قالعان ەشتەڭەم جوق"

قر ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحان بۇگىن استانادا دۇنيەجۇزىلىك كوشپەندىلەر ويىندارىنىڭ قورىتىندىسىنا وراي ءباسپاسوز جيىنىن وتكىزدى. 

جيىن بارىسىندا بەكبولات تىلەۋحان سوڭعى كوشپەندىلەر ويىنىندا ورىن العان كوكپارشىلارعا قاتىستى كەلەڭسىز وقيعانى ءتۇسىندىرىپ، جۋرناليستەردىڭ سۇراقتارىنا جاۋاپ بەردى.

اbai.kz سايتى الدىمەن كوكپار دوداسىنىڭ جارتىلاي فينالىندا وزبەكستاننان جەڭىلگەن قازاق كوكپارشىلارىنىڭ ارەكەتى ساياسات پا دەگەن سۇراق توڭىرەگىندە تالداۋ جاساپ, ودان كەيىن "قازاق كوكپارشىلارى وزبەكتەردەن ادەيى جەڭىلدى" دەپ ايىپتاعان قىرعىز ازاماتىنىڭ سوزىنە قر ۇلتتىق سپورت قاۋىمداستىعىنىڭ جاۋاپ بەرۋىن تالاپ ەتكەن ەدى.

بۇگىن اتالعان قاۋىمداستىقتىڭ پرەزيدەنتى بەكبولات مىرزا ەل الدىندا بەرگەن تۇسىنىكتەمەسىنە نازار اۋدارىپ، ءوز سۇراقتارىمىزدىڭ جاۋابىن ىزدەدىك. بەكبولات قانايۇلىنىڭ ايتۋىنشا، وزبەكستاننان جەڭىلۋىمىزگە ءبىزدىڭ قۇرامانىڭ تاجىريبەسىزدىگى سەبەپ بولعان. قىرعىز جەرىنە ەلىمىزدىڭ ەكىنشى قۇرامى بارعان ەكەن.

— كوشپەندىلەر ويىنىنا ءبىزدىڭ ەرەسەكتەر قۇراماسى بارعان جوق. الدىڭعى ەرەسەكتەر قۇراماسى بارعان كەزدە ءبىزدىڭ كوكپارشىلار ەكىنشى ورىن الىپ قالعان. سوندىقتان، جالپى كوكپارشىلارمەن، وسى سالاداعى ماماندارمەن اقىلداستىق. بۇل ازيا نەمەسە الەم چەمپيوناتى ەمەس، بار بولعانى فەستيۆال عوي. ءبىز بۇل دوداعا جاستار كومانداسىن سالدىق. جاستار دا دوداعا ءتۇسىپ، سول سىننان ءوتۋى كەرەك. قىرعىزستاندا ويناعان - قازاقستاننىڭ جاستار كومانداسى. ماقساتىمىز ورىندالدى. باردى، وينادى، وتە جاقسى دارەجەدە ونەر كورسەتتى دەپ ويلايمىن, - دەدى بەكبولات تىلەۋحان.

قر ۇلتتىق سپورت قاۋىمداستىعىنىڭ پرەزيدەنتى الەۋمەتتىك جەلىدەگى كوپشىلىكتىڭ ەلىمىز كوكپار قۇراماسىن قاتتى سىناپ جاتقانىنا كەلىسپەيدى. ول كىسىنىڭ ايتۋىنشا، سپورتتا جەڭىس پەن جەڭىلىس قاتار ۇعىم. ونىڭ ۇستىنە، ەلىمىزدە وتكەن جارىستا قىرعىز سپورتشىلارىنا قيانات جاسالدى دەگەن بوس ءسوز ەكەن.

— سپورت بولعاننان كەيىن بىرەۋ جەڭەدى، بىرەۋ جەڭىلەدى. ەرەسەكتەردى جىبەرسەك، جەڭەتىنىمىز انىق. ەندى جاستار دا كىرىسپەي مە!؟ ءبىزدىڭ جەتەكشى رەتىندە الدىمىزعا قويىپ وتىرعان نەگىزگى ماقسات بار - بۇل ادىلدىك. قازاقستاننىڭ جەرىنە كەپ ويناعاندا، اۋدارىسپاعىڭىز بولسىن، كوكپارىڭىز بولسىن - ادىلدىكتەن ءبىر سانتيمەتر تايعان جەرى جوق. ويتكەنى، قالىپتاسۋ كەزەڭىندەگى ويىن بولعاننان كەيىن باستالماي جاتىپ، ادىلەتسىزدىككە باراتىن بولساق، بەرەكەسى كەتىپ قالادى, - دەيدى ول.

بەكبولات تىلەۋحان سونىمەن قاتار، ۇلتتىق سپورتقا بولىنگەن قارجىنىڭ قايدا جۇمسالعانىن دا ايتىپ بەردى. ول كىسىنىڭ ايتۋىنشا، ۇلتتىق سپورتىمىزعا بولىنەتىن قارجىنىڭ مولشەرى از بولعاندىقتان قاجەت كەزدە قارجىنى باسقا جاقتان ىزدەۋگە دە تۋرا كەلەتىن كورىنەدى.

— اشىعىن ايتايىن، وسى ۋاقىتقا دەيىن 200 ميلليون تەڭگە ءبولىندى. 40 پايىزعا جۋىعى جۇلدە قورىنا كەتتى. ونى ءبىلۋ قيىن ەمەس. جەڭىس تۇعىرىندا تۇرعان سپورتشىلار قولىنا سەرتيفيكاتتى ۇستاپ تۇر عوي. سوندا ساناپ الساڭىزدار، سول سومانىڭ 30-40 پايىزى شىعادى.

باسىڭنان تومەن قاراي اسپا-توك اقشا توگىلىپ جاتسا قىزىق شىعار؟! اينالىپ كەلگەندە اناعان-مىناعان جالپاقتاپ جالىعاسىڭ. ء"اي، جىگىتتەر، بەرە تۇرىڭدارشى. سەندەرگە بەرگەنگە اقشا بولماي تۇر. وسىنىڭ ءبىر ەسەبىن تابارمىن" دەپ وزدەرىنە جالىنىپ كەتەسىڭ, - دەي كەلە بەكبولات تىلەۋحان وسى ۋاقىتقا دەيىن ۇلتتىق سپورت تۇرلەرىن وركەندەتۋگە ۇلەس قوسىپ جۇرگەن ازاماتتارعا العىسىن ءبىلدىردى.

ءسوز سوڭىندا ۇلتتىق سپورت قاۋىمداستىعىنىڭ پرەزيدەنتى قىزمەتىنەن كەتۋگە دە قارسى ەمەس ەكەنىن ايتتى. سوڭعى ۋاقىتتا بەكبولات تىلەۋحاننىڭ ورنىن بوساتۋىن تالاپ ەتۋشىلەر قاراسى ارتقان بولاتىن.

ءدال قازىر قۋانا-قۋانا كەتۋگە دايىنمىن. جۇمىسىمدى ىستەي الاتىن ادام ۇسىنسا، ورنىمدى قازىر-اق بوساتۋعا دايىنمىن. بۇل ورىنعا جابىسىپ قالعان ەشتەڭەم جوق. مەن وزىمە تيەسىلى جۇمىستى ورىندادىم دەپ ويلايمىن. ءالى دە ورىنداي بەرمەكپىن.

تاعى دا ايتايىن، بۇل ورىنعا جابىسىپ قالعان ەشنارسەم جوق. راحاتانىپ باسقارىپ، اتىن شىعارىپ وتىر دەسە — ول ەكىنشى ماسەلە. جاسىراتىن ەشتەڭەسى جوق. ات پەن تانىمالدىلىققا ءزارۋ بولىپ جۇرگەن ادام ەمەسپىن. "ۇلتتىق سپورت بەكبولاتقا كەرەك پە؟ بەكبولات ۇلتتىق سپورتقا كەرەك پە؟" دەگەن تاعى ءبىر ماسەلە بار. ماقتانىپ جاتقانىم جوق. "تازا ءمىنسىز اسىل ءسوز شەر تولقىتسا شىعادى" دەمەكشى، الدىلارىڭىزدا شەرىمدى تارقاتىپ وتىرمىن, - دەپ قورىتىندىلادى ءسوزىن بەكبولات تىلەۋحان.

ايتا كەتسەك، وسىعان دەيىن قىرعىز رەسپۋبليكاسىندا وتكەن ءىىى دۇنيەجۇزىلىك كوشپەندىلەر ويىندارىندا قازاقستان قۇراماسى جالپىكوماندالىق ەسەپتە ەكىنشى ورىن العان بولاتىن. سونداي-اق، وزبەكتەن جەڭىلگەن قازاق كوكپارشىلارى كوشپەندىلەر ويىنىنىڭ قولا جۇلدەگەرى اتانعان.

قۋانىش قاپپاس

Abai.kz

10 پىكىر