Särsenbi, 11 Jeltoqsan 2019
Bizdiñ şeneunik 8965 39 pikir 18 Qazan, 2018 sağat 11:00

Dariğa Nazarbaeva: "Orıs tilin wmıtpay, qıtay tilin üyreniñder"

Almatıda qalalıq belsendi jastarmen kezdesken Parlament Senatınıñ deputatı Dariğa Nazarbaeva qaşanğı ädetine basıp eldi auızına qaratatın birqatar mälimdemeler jasadı. Eldiñ jay-küyin jaqsartudıñ jalğız jolı şetelge jaltaqtau dep biletin Dariğa hanım almatılıq jastarğa jatpay-twrmay qıtay tilin üyreniñder dep keñes berdi.

- Qıtay tilin oqıñdar. Men mwnı qadap aytamın. Wltşıl patriottar meni osı pikirim üşin sögip jatadı. Biraq, bolaşaq sonda dep oylaymın. Qıtay narığınıñ mümkindigi şeksiz. Halqınıñ sanın aytsañızşı. Qanday is bastamañız, milliarder bolıp şığa kelesiz, - dep tamsanğan senator Qıtay narığında milliondar şaşılıp jatqanın aytıp jinalğan jastardıñ auızınıñ suın qwrıttı.

- Orıs tilin wmıtuğa bolmaydı. Biz ortaq ekonomikalıq, kedendik aymaqtamız. Şekara arqılı da eş kedergisiz ötuge boladı. Bwl - ülken artıqşılıq, sondıqtan onı paydalana biluimiz kerek. Kez kelgen isti qolğa alğanda osı narıqtardağı swranıs turalı oylanu kerek. Odan bölek, bwl - beybitşilikti saqtaudıñ eñ jaqsı täsili, - dep jalğadı sözin Dariğa Nazarbaeva.

Körip otırsızdar, Dariğa hanım jastarğa "öz ana tilderiñdi üyreniñder" dep jaq aşqan joq. Orıs tilin wmıtpay, qıtay tilin üyreniñder dedi. Äri osı altınğa bermes aqıl-keñesteriniñ bärin öz tüsiniginde mülde wmıtuğa bolmaytın tilde ayttı. Salauattı senatordıñ osı sözderinen keyin onsız da säl ğana demep jiberseñ şeteldik bolıp ketuge beyim jürgen jastar oylanıp-aq qalğanı ras. Oylanğanda - bolaşağımdı qay şetelmen baylanıstırsam eken dep bas qatırğanın ayta keteyik. Oylanbağanda qaytedi, qıtay tilin bilse milliarder bolıp ketuge mümkindik mol eken. Al orıs tilin bilse şekaradan ötuden eş qiındıq körmey, kedendik aymaq degen «öte ülken» keñestikti erkin şarlaytını tağı bar.

Negizi Dariğa Nazarbaevanıñ qazaqstandıqtardı qıtay tilin meñgeruge şaqırıp jürgenine birneşe jıldıñ jüzi boldı. Onsız da Qıtaydıñ elimizge ıqpalı jıldan-jalğa wlğayıp kele jatqanın bärimiz körip otırmız. Dariğa hanımnan däris alğandar erteñ Qıtay kommunisteri Qazaqstanğa kelse, qızıl tu köretip şığıp kütip alatın şığar mına türimen.

Senator Almatıdağı kezdesu barısında söz etken tağı bir taqırıp balalarğa jınıstıq qatınas jaylı 11-13 jastan bastap üyretu boldı. Qazaqtıñ ğasırlar boyı «wyat boladı» dep tärbielep kelgen balasın Dariğa hanım wyatsızdıqpen tärbielemekşi körinedi.

- Qanşalıqtı erterek bastasaq, sonşalıqtı jaqsı nätije beredi. 18 jastı kütip otıra bermey, 11-13 jastan bastap kontracepciya turalı tüsindiru kerek. Sebebi keñestik kezde bolmağan jınıstıq qatınastıñ jarnamaları qazir ğalamtorda tolıp twr, - degen Dariğa Nazarbaeva şeteldegi täjiribeni mısalğa keltire otırıp, balalardıñ sanasın erte jastan oyatu kerektigin alğa tarttı. Künde bola bermeytin kezdesu sätinde senatordıñ jastarğa otbasın josparlau men saqtap qalu turalı aqıl-keñes aytqanı äbden orındı. Alayda halıqtıñ ğasırlar boyı qalıptastırğan ädebin qayırıp qoyıp, ata-ana besikten beli şıqpağan balasımen jınıstıq qatınas jaylı aşıq äñgimelessin dep kesip-pişudiñ keregi joq edi dep esepteymiz.

Tırnaq astınan kir izdegenimiz emes. Halıq el aldında jürgen twlğalardan ülken ümit kütedi. Biliktegi kisiler eldiñ jırtığın jamap, qisığın tüzese eken deydi. Alayda bildey senator bizdiñ jastarğa ne üyretip jür degen swraq mazalaydı. Dariğa Nazarbaevanıñ jastarmen kezdesu barısında izdenis pen iskerlik, oqu men bilim, talap pen maqsat - osınıñ barlığı jastar boyınan tabıluı tiis asıl qasiet dep bastağan keñesine quana qwlaq qoyğan edik. Biraq ol kisiniñ osı asıl qasietterdiñ bärin qıtay men orıs tilin üyrenuge telip qoyğanına narazılığımız bar.

Quanış Qappas

Abai.kz

 

39 pikir