Jwma, 13 Jeltoqsan 2019
Anıq 2595 15 pikir 10 Qañtar, 2019 sağat 15:55

Är sözden sayasat izdeudiñ qajeti joq

Küni keşe Almatıda qaladağı 27 şağınaudannıñ atauları özgergenin resmi mälimdegen bolatın. YAğni, KSRO uaqıtınan kele jatqan eski ataular qazaqşalandı. Bwğan bastı sebepterdiñ biri – jergilikti twrğındardıñ ötinişi men wsınısı deydi onomastikalıq komissiyanıñ ökilderi.

Jaña ataular qalalıq mäslihattıñ kezekten tıs ötken 39-şı sessiyasında maqwldanğan. Al, bwl jañalıq BAQ arqılı jariyalanısımen qoğamda qızu talqığa tüsip ülgerdi. Äsirese, «Nwrşaşqan», «Nwr Alatau» sekildi ataularğa qatıstı pikir aytuşılardıñ qatarı köp. «Ana tili» gazetiniñ bas redaktorı, aqın Janarbek Äşimjannıñ aytuınşa, «Nwr» söziniñ astarınan sayasat izdeudiñ eş qajeti joq.

«Qala wlğayıp jatır. Almatı – elimizdegi eñ iri megapolis. Jıl sayın qala aumağına jaña eldimekender qosılıp jatır. Olardıñ atauları qaytalanatın kezder jii boladı, onıñ üstine, Keñes zamanınan qalğan ataular bar, olardı qazaqşalauımız kerek... Sondıqtan jañartıp jatqan boluı kerek. Men bwl özgeristerdi qwptaymın. «Nwr» degen sözden astar izdeudiñ qajeti joq, biz är sözden sayasat izdeytin sätten öttik. Nege biz bwl sözden bas tartuımız kerek? Nağız qazaqı söz ğoy. Tipti, din twrğısınan qarasaq ta «Nwr» sözi öte jaqsı mağınada aytıladı», - deydi J.Äşimjan.

Ayta keteyik, atauı özgergen şağınaudandardıñ birazı bwğan deyin orısşa atalıp kelse, özgeleri birin-biri qaytalağan. Mäselen, Almatıda 6 – «Alğabas», 3 – «Kamenka», 2 – «Dubok», 2 – «Şkol'nıy» şağınaudandarı bar. Bwdan bılay olardıñ ärbiri jañaşa atalatın boladı.

Almatı qalası Tilderdi damıtu basqarması onomastika böliminiñ basşısı Ötepbergen Qalabaydıñ aytuınşa, şağınaudandardıñ atauın özgertude sol eldimekender twrğındarınıñ talabı men wsınısı eskerilipti.

«Jaña ataular özimizdiñ qazaqi, wlttıq tanımdıq ataular. Ejelgi ataulardı wsındıq. Sonı jalpı jastarğa nasihattau barısında äri solardıñ boyına siñiru üşin, otansüygiştikke tärbieleu üşin jasalıp jatqan ülken bir jwmıs», - deydi onomastika böliminiñ basşısı.

Ayta keteyik, twrğındarğa qolaysızdıq tudıratın arnayı räsimderdi ötu qajet etilmeydi. Memlekettik organ tarapınan derekqorda atau özgertilgen jağdayda barlıq qajetti anıqtamalardı ESQ-nı (elektrondıq sandıq qoltañbanı) qoldana otırıp, «Elektrondı ükimet» portalı arqılı nemese HQKO (halıqqa qızmet körsetu ortalığınıñ) kez kelgen bölimşesinen birneşe minut işinde aluğa boladı.

Janarbek Äşimjan

Abai.kz

15 pikir