جەكسەنبى, 21 شىلدە 2019
انىق 2180 15 پىكىر 10 قاڭتار, 2019 ساعات 15:55

ءار سوزدەن ساياسات ىزدەۋدىڭ قاجەتى جوق

كۇنى كەشە الماتىدا قالاداعى 27 شاعىناۋداننىڭ اتاۋلارى وزگەرگەنىن رەسمي مالىمدەگەن بولاتىن. ياعني، كسرو ۋاقىتىنان كەلە جاتقان ەسكى اتاۋلار قازاقشالاندى. بۇعان باستى سەبەپتەردىڭ ءبىرى – جەرگىلىكتى تۇرعىنداردىڭ ءوتىنىشى مەن ۇسىنىسى دەيدى ونوماستيكالىق كوميسسيانىڭ وكىلدەرى.

جاڭا اتاۋلار قالالىق ءماسليحاتتىڭ كەزەكتەن تىس وتكەن 39-شى سەسسياسىندا ماقۇلدانعان. ال، بۇل جاڭالىق باق ارقىلى جاريالانىسىمەن قوعامدا قىزۋ تالقىعا ءتۇسىپ ۇلگەردى. اسىرەسە، «نۇرشاشقان»، «نۇر الاتاۋ» سەكىلدى اتاۋلارعا قاتىستى پىكىر ايتۋشىلاردىڭ قاتارى كوپ. «انا ءتىلى» گازەتىنىڭ باس رەداكتورى، اقىن جاناربەك ءاشىمجاننىڭ ايتۋىنشا، «نۇر» ءسوزىنىڭ استارىنان ساياسات ىزدەۋدىڭ ەش قاجەتى جوق.

«قالا ۇلعايىپ جاتىر. الماتى – ەلىمىزدەگى ەڭ ءىرى مەگاپوليس. جىل سايىن قالا اۋماعىنا جاڭا ەلدىمەكەندەر قوسىلىپ جاتىر. ولاردىڭ اتاۋلارى قايتالاناتىن كەزدەر ءجيى بولادى، ونىڭ ۇستىنە، كەڭەس زامانىنان قالعان اتاۋلار بار، ولاردى قازاقشالاۋىمىز كەرەك... سوندىقتان جاڭارتىپ جاتقان بولۋى كەرەك. مەن بۇل وزگەرىستەردى قۇپتايمىن. «نۇر» دەگەن سوزدەن استار ىزدەۋدىڭ قاجەتى جوق، ءبىز ءار سوزدەن ساياسات ىزدەيتىن ساتتەن وتتىك. نەگە ءبىز بۇل سوزدەن باس تارتۋىمىز كەرەك؟ ناعىز قازاقى ءسوز عوي. ءتىپتى، ءدىن تۇرعىسىنان قاراساق تا «نۇر» ءسوزى وتە جاقسى ماعىنادا ايتىلادى»، - دەيدى ج.ءاشىمجان.

ايتا كەتەيىك، اتاۋى وزگەرگەن شاعىناۋدانداردىڭ ءبىرازى بۇعان دەيىن ورىسشا اتالىپ كەلسە، وزگەلەرى ءبىرىن-ءبىرى قايتالاعان. ماسەلەن، الماتىدا 6 – «العاباس»، 3 – «كامەنكا»، 2 – «دۋبوك»، 2 – «شكولنىي» شاعىناۋداندارى بار. بۇدان بىلاي ولاردىڭ ءاربىرى جاڭاشا اتالاتىن بولادى.

الماتى قالاسى تىلدەردى دامىتۋ باسقارماسى ونوماستيكا ءبولىمىنىڭ باسشىسى وتەپبەرگەن قالابايدىڭ ايتۋىنشا، شاعىناۋدانداردىڭ اتاۋىن وزگەرتۋدە سول ەلدىمەكەندەر تۇرعىندارىنىڭ تالابى مەن ۇسىنىسى ەسكەرىلىپتى.

«جاڭا اتاۋلار ءوزىمىزدىڭ قازاقي، ۇلتتىق تانىمدىق اتاۋلار. ەجەلگى اتاۋلاردى ۇسىندىق. سونى جالپى جاستارعا ناسيحاتتاۋ بارىسىندا ءارى سولاردىڭ بويىنا ءسىڭىرۋ ءۇشىن، وتانسۇيگىشتىككە تاربيەلەۋ ءۇشىن جاسالىپ جاتقان ۇلكەن ءبىر جۇمىس», - دەيدى ونوماستيكا ءبولىمىنىڭ باسشىسى.

ايتا كەتەيىك، تۇرعىندارعا قولايسىزدىق تۋدىراتىن ارنايى راسىمدەردى ءوتۋ قاجەت ەتىلمەيدى. مەملەكەتتىك ورگان تاراپىنان دەرەكقوردا اتاۋ وزگەرتىلگەن جاعدايدا بارلىق قاجەتتى انىقتامالاردى ەسق-نى (ەلەكتروندىق ساندىق قولتاڭبانى) قولدانا وتىرىپ، «ەلەكتروندى ۇكىمەت» پورتالى ارقىلى نەمەسە حقكو (حالىققا قىزمەت كورسەتۋ ورتالىعىنىڭ) كەز كەلگەن بولىمشەسىنەن بىرنەشە مينۋت ىشىندە الۋعا بولادى.

جاناربەك ءاشىمجان

Abai.kz

15 پىكىر