Senbi, 19 Qazan 2019
Dep jatır 892 1 pikir 8 Säuir, 2019 sağat 11:35

Swlulardı batısşıl bäygege emes, World Muslimah bayqauına qatıstıru kerek

Biz älemdik örkenietten wlttıq bet-beynemizdi izdep, özindik sara jolğa tüsudiñ jol ayırığında twrmız. Osı bağıtta «Bar boluımız da, borday tozuımız da» öz qolımızda. Qazaq arularınıñ batıs pen şığısqa qatıstı  öz wstanımı boluı turasında Elanası Zeynep Ahmetova «Batıs kelip jalañaştap, Şığıs kelip twmşaladı» degen bolatın. 

Qazaq dilimen sorpası qosılmaytın orıs tildi aqparat pen bilik biılğı «Qazaqstan aruı – 2019» bayqauına ündi men qıtaydan turister kelip, el qazınasına aqşa tüsiredi dep jatqan jılannıñ qwyrığın basıp eldi bir dürliktirdi. Mwsılman memleketi bolıp sanalatın Alaş jwrttı bwl mälimdemeni auır qabıldadı. Biz bwl jağdayğa qalay jettik degen oy keledi osı orayda.

KSRO qwlauınıñ aldında batıstan talay ar men jandı jalañaştap, ruhani azdıratın talay jañalıqtar endi. Sonıñ biri – swlulıq bayqauı. Ol twñğış ret elimizde 1989 jılı ötip, 20 jasar balerina Säule Rahmedova «Miss Qazaqstan» dep tanıldı. Bügingi künniñ däregeyindegi keñ auqımdı «Miss Qazaqstan» bayqauı 1997 jılı jetti. Wlttıq konkurs degen ataudı ielendi. Jaña twrpattağı 1997 jılğı arular bayqauınıñ jeñimpazı almatılıq student Jämila Bisembieva atandı. Osılayşa kapitalistik Qazaqstannıñ swlulıq bayqauı älemdik standartpen kindiktesti. Jahandıq bayqaularğa arular jiberu qwqığın ielendik. Osı mäselege sol kezdegi dini basqarmamız jaq aşpay ünsiz qalğanı ökinişti.

Bwl konkurstı OA elderinde tek qazaq pen qırğız ğana ötkizip keledi.

2013 jılı öz elderinde miss atanğan qazaqstandıq Aynwr Töleuovanı, qırğızstandıq Jibek Nukeevanı artta qaldırğan özbekstandıq  Rahima Ganievanıñ Gvineya, Kamerun, Gvineya-Bisau, Kosovo swlularımen birge Özbekstandı Älem Missi bayqauınıñ ümitkeri atandıruı osı konkurstıñ mayın işken orıs tildi qazaq pen qırğızdardıñ jüregine şoq tüsirdi.  Biraq Özbekstannıñ Mädeniet pen sport ministrliginiñ jäne Äyelder isi boyınşa Wlttıq komitetiniñ ökilderi öz elderinde bwnday konkurstıñ ötpeytini turalı mälimdeme jasadı. Al, sol kezdegi el Prizidenti Islam Karimovtiñ qızı  Gul'nara Karimov bolsa, Rahima Ganieva täşkendik özbek qızı emes, samarqandıq täjik dep öz pikirin BAQ betinde jariya etti.

Täjikter bolsa, jas erekşeligine şekteu qoymay «Miss Täjikstan»  atağı üşin aru qızdarmen qatar 3 pen 13 jasar büldirşinderdi de qatıstıradı. 2011 «Miss BWW» konkursınıñ jeñimpazı täjik qızı Nilufar Şerzod atandı.

Öz elderinde özbek, türkimen men täjikter biz ben qırğızdarday batıstıq ürdistegi swlulıq konkurstarın ötkizbegendikten özge elde twratın osı wlttardıñ aruları sol jergilikti eldiñ atınan türli swlulıq bayqaularına qatınasıp jeñimpaz ben jüldeger atanıp jür.

Bizdegi din ieleri osınday konkurstıñ jabıluına qatıstı nege mäsele kötermeytine tañımız bar. Batıs ürdisindegi arular bayqauı bizge jat. Odan bas tartu öz qolımızdağı dünie. Swlular bayqauınıñ ötuine eşkimde qarsı emes, biraq onıñ wlttıq dästürimizben qabısuın dinimizge kirbiñ tüsirmeu jağı qarastırıp, näsildik häm dildik twrpatta Şımqalada twraqtı ötetin halıqaralıq «Türkistan aruı» bayqauın ömirge äkeletin uaqıt tudı. Äri bärimiz jabıla, batıstıñ azğın aytağına ilesip,  hidjab kigen qızdarımızben kürese bermey, olardı 2011 jıldan Indoneziyada twraqtı ötip kele jatqan World Muslimah (Mwsılman aruları) bayqauına qatıstırıp, bağın sınatuğa jol aşu kerek.

Qazaq qızdarınıñ swlulığına şeteldikterdiñ tamsanğanın dwrıs dep esepteytin QR mädeniet jäne sport ministriniñ orınbasarı Erlan Qojağapanov  qate közqarasın özgertip, qaraközderimizdi wlttıq sipattağı alamanğa qatıstırudı oylauğa tiis.

Miss Qazaqstandı wlttıq dästürimizge beyimdemesek, nağız azğındanu jolına tüsemiz. Batıstan kelgen älemdik bayqaulardıñ bäri qazaqqa qajet dünie emes. Siz bwğan qalay qaraysız, ağayın?!

Äbil-Serik Äliakpar

Abai.kz

 

1 pikir